1 Thessaloniciens 2

N laànɛ́bò, à gàn ké ka lekini ka yàan ka: ko wàà kaá pée-yè òo tó wún gbáákɔ́á.

Kó nuu Filipe fɔ́ɔ́lé tée' gi, ke kóó waa ka pé Tesaloni bhi bhe, wo wún kpɔ' ko tà, le wó ko wɛ̀ikɛ̀ɛ̀ suu tó páipái wo' le. Kɛ́ àle tó gi, Aatana ké gɛ̀ilɛ to', le é ko zowɛ́ɛ́ gbaan' ko gwílé, le kó lo' àbhà nâa sɛ̀ kpɔ́i ka nɛ̀, sée ke kó gwili kpókpó tulé kwɛi le.

Kó nuu liangbò' zɛà ka nɛ̀ láà, kwáá nuu à zɛà zaa nì ka gɔ̀n lɔ̀ɔ̀ bhà. Kwáá nuu zí à zɛà wún bhúlúbhùlù kɛɛ lɔ̀ɔ̀ bhà. Sée kwáá nuu mɛngge yínígó-lèè guoà.

Kɛ́ Aatana' è lee ye ko zowɛ́ɛ́ pé, ke é ko dɔnyèa ye: kó mɔɔà ebhà nâa kpɔ̀ bhaamɛ̀ɛ̀bò nɛ̀-yè bhà láà, ko liang láà à tó zɛ̀ ke è àle zʋʋ kún le. Kwáá à zɛ bhaamɛ̀ɛ̀bò-le pe zʋʋ kún lɔ̀ɔ̀ bhà.

À gàn ké zí ka yàan kwɛi ka: kóó mɛngge yínígó wʋʋ nɛ́ɛ́nɛ̀ɛ̀ bhà do bhe, sée kóó zí liangzɛ wélé lɔ̀ɔ̀ bhà do bhe. Aatana' ko séeá àlei le.

È to kaá oo, è to mɛ̂ɛ bhɛ́ibòa oo, kwáá nuu bhaamɛ̀ɛ̀bò-le pe lɛ́kwɛ́ yàà ko tà-lèè guoà.

Sée kó woo mɔɔà wunmɛ̀ɛ̀nɛ̀-gbàn dɔá ka tà ko tó' wo Klisi-à táá-mɛ̀ɛ̀bòa láà à-wùn gi. Kɛ́ àle tó gi, kó nuu tááà nà kaá wɛ́ɛ́wɛ̀ɛ̀a, ye nɛ́ kpɔ́-làà- e zuɛ nà ebhà náòa kɔi láà à nɛ̀.

Atoosiwo ka lɔ̀ɔ̀' nuu ko kɛɛà láà, à nààlé àa nuu bhe. Ale kɛɛ le Aatana-à nâa sɛ̀ kpɔ̀ ka nɛ̀-yè-le lengdo òo ko zʋʋ kún, ke kó tó àle-nàà tà bhi, le kó ko lekini yáányè kɔ́nɔ́wo' ka nɛ̀ do le. Sée ka-wùn' woo tó' wo ko gɔ̀n kpókpóá bháalé láà, kó à kɛ̀ɛ̀ kwɛi àlei le.

N laànɛ́bò, kó bháála' kɛɛ', ni kó gii' si' ka finibhà láà, à tó ké tuàn ka yàànlé. Kó nuu Aatana-à nâa sɛ̀ kpɔ́à ka nɛ̀, ke kó bháála kɛɛii yáán gi ni gbɛi gi tó bhà kwɛi, ke koo nù tó kangge ka gwenglé-gbàa.

Mɛ̂ɛ' ká wɩ́ɩ́yèa Yesu-wùn bhà láà, kale ká ko séeá, le Aatana leng' zí ko séeá le. Ká à gànnu ka: ko táá-kɔ̀ɔ̀' nuu ka finibhà, e nuu Aatana zòàyèa, le é nuu dɔɔyèa, le pe àa nuu à bhà le.

À gàn ké ka yàan zí ka: ká kɔi dolodolo láà, kó nuu ka gɔ̀n ye nɛ́ nɛ- to ebhà náò gɔ̀n kɔi láà à nɛ̀.

Kó nuu kpɔ́à ka zʋʋ tà, le kó nuu ka zʋʋ gbaan-à, le kó nuu zí fèè yaaà ka bhà, ke ka táá-kɔ̀ɔ̀- bhɛɛ yaa Aatana bhà le. Atoosiwo Aatana- ka leeyè' gá, ke è ka gba dɔ̀lèè sɛ̀a ebhà gwilinɛnɛ̀ bhà, ke ká mɛ̂ɛnɛ̀ kɛ̂ɛ à pé le.

Kó Aatana wʋʋ' pe' ka nɛ̀, ká à ma' wo' ke ká wɩɩ' à-wùn bhà kwɛi láà, àle kɛɛ le kwáá ko bo à wánglegóá à-wùn gi le. Atoosiwo kó wʋʋ' pe' láà, é Aatana wʋʋá kɔɔ leng' gi, ka à kúnyèa àle bhà, le mɛ̂ɛ' ká kpɔ́yèa à lé, é lóii ka zowɛ́ɛ́ seeláá lɛ́ɛ. Káó wʋʋ láà à kún ye mɛ̂ɛ' bhaamɛ̀ɛ̀bò wʋʋ bhɛ́iwɛ́ɛ́ kún.

N laànɛ́bò, àle kɛɛ le kaá lùu gi-mɛ̀ɛ̀bò' ka wɛ̀ikɛ̀ɛ̀woii le. È tò' kwɛi, ke Aatana-à legilizi-bò' wó Yesu Klisi-à zaa tà Zudee lùu gi, ke Zuifu-bò' àng wɛ̀ikɛ̀ɛ̀wo' láà, ka lekini káé zinná àngle gbóló lé lɛ́ɛ.

Sée Zuifu-bò láà àngle wó nuu Aatana wʋʋ léban-mɛ̀ɛ̀bò zɛà lii, le è zí gò' bhi le wó koà Gwilinɛ Yesu lekini zɛ' le. Angle do láà àngle wó zí ko leng ko wɛ̀ikɛ̀ɛ̀wo' le. À kɛ̀ɛ̀ kwɛiyè láà à gi, àng kɛɛ-wùn liá àa Aatana gi, le mɛnómɛ̀nó' àng yáòa le.

Wo tuàn zin lefienɛ́ woà ko gɔ̀n zaalé dɔkɔ̀ɔ̀ é à gi, ke koo nù Yesu-à liangzɛ mɛ̂ɛ' wàa Zuifu-a àng nɛ̀, ke wòo nù la. Sée wò woà wúnyóo kɛɛyè lépà kuo bhà kwɛi' wo lɛ́ile le. Kɛ́ Aatana' bo tó' wo e bhɔlɔ góá àng gɔ̀n lɛ́ɛ. Yáán dɛ́ɛ ke pà Tesaloni-mɛ̀ɛ̀bò bhà lɔ̀ɔ̀ ké nuu Pɔli kɛɛà

N laànɛ́bò, kole laá, ko yáán kwìì ka gi lɔ̀ɔ́nɛ́ ke ké mɔ́yèa. Kɛ́ ko zowɛ́ɛ́-le àa káányèa ka bhà. Yáánpà ka bhà lɔ̀ɔ̀ ké nuu ko kɛɛà bháalé, le kó nuu à-wùn gikún-à miniminiyèa le.

Ale kɛɛ le kó nuu à pé woo, ke kó ló zin-i ka lià le. Yàani yéè woo tó nle Pɔli n lengdo lefienɛ́á, lò ka lià lɔ̀ɔ̀ ké nuu woo n bhà gɛnyààn do ni piilɛ tóá, kɛ́ le Sɔtana' à-zàà léta' n gɔ̀n le.

Pɔɔn- à kɛɛ ke an àle pe kwɛi, àle ye: ko zʋʋ àa mɛ̂ɛ bhɛ́i ke gi, ke è tó ko niidaa-mɛ̀ɛ̀a, ke àa kale kaá. Le koà Gwilinɛ Yesu nu-kwèèi- bhɔ̀' la ò, wò zí lɛ́kwɛ́ yaaà ko tà wáa ni wáa-wùn gi à zué, ke àa kale kaá le?

Mai lekinilèkini' à gá le, kale ká ko vele tóii dɔ́ɔ́n-á, le ká ko niidaaii le.