2 Corinthiens 1

Nle Pɔli' Aatana' n yaayèa ke án tó Yesu Klisi-à táá-mɛ̀ɛ̀a, ko ni Timotee' é ko laànɛ́á Yesu-à zaa tà láà, kole kó sɛ́ikwɛ́ é à bɛɛnzɛii le. Aatana-à legilizi-bò' ká Kolɛnti oo, ni mɛ̂ɛ páipái' ká yaayèa àbhà yaa gi Akai sɛ́ɛ́ tó páipái gi láà oo, ko à bɛɛnzɛ̀ mɛnó páipái kale ka nɛ̀ le.

Kó wɩɩ ko: ko nɛ Aatana ni koà Gwilinɛ Yesu Klisi-nù- dɔ gbáágbààa ke wò gɛ̀ilɛ tó ka bhà, ke wò zí ka zowɛ́ɛ́ niidaa. Mɛ̂ɛ wɛ̀ilèè yeyè ni mɛ̂ɛ zʋʋ gbaanyè

Aatana' é koà Gwilinɛ Yesu Klisi nɛá, ke bhaamɛ̀ɛ̀bò wɛ̀i- à kɛɛ miniminiyèa, ke è zí mɛ̂ɛ zʋʋ gbaan kɔɔtókɔ̀ɔ̀tó gi láà, kwàa à wánglegó.

Atoosiwo àle ko leng ko zʋʋ gbaan ko wɛ̀ilèè páipái' è go à tó gi le. Kɛ́ sée è àle tó kɛ̀ɛ̀ kwɛi, ke è ko zʋʋ gbaan kɔɔ do' gi láà, ke mɛ̂ɛ bhɛ́ibò wɛ̀ilèè páipái' è go ziàn láà, ko leng kó nù dɔn àng zʋʋ gbaan-á àle tó gi le.

Pɔɔn- àle kɛɛ kwɛi, àle ye: ko wɛ̀ilèè gò Klisi-wùn gi-yè' daaà kpáa gi, ke ko zʋʋ gbààn à-wùn gi-yè leng ké zí daaii kpáa gi. Atoosiwo à lekinilèkini láà àle ko zʋʋ gbaan-mɛ̀ɛ̀a le.

À kɛ̀ɛ̀ kwɛiyè láà à gi, ko wɛ̀ilèè' góii láà, è gò kwɛi ke kale ka zʋʋ- nù gbaan, è gò' bhi ke ká layè' gá láà, è tó àle wun bàn péng-kɔ̀ɔ̀a le. Ko zʋʋ- zí gbààn' laá, ke a tó ka lekini ka zʋʋ gbaan-kɔ̀ɔ̀a. È tò' kwɛi, ko wɛ̀ilèè- go kɔɔ do' gi ziàn láà, ka leng ka wɛ̀ilèè- gò' kwɛi, le ka zí mɔɔ à kún-á ka bhà, ke ka zowɛ́ɛ́ ké saayèa le.

Kɛ́ ko zʋʋ ké zí à gi kelekelele, le ko à gànnu ko: ka wɛ̀ilèè' góii ye ko nɛ̀ kɔɔ do' gi láà, Aatana- zí ka lekini ka zʋʋ gbaan-à ye ko nɛ̀ à-kɔ̀ɔ̀ do láà àle gi le.

N laànɛ́bò, wɛ̀i-wùn' é kɛɛ' n gá Azi lùu gi láà, máá à pé ke ká tó ka tíibhà à-wùn gi. Atoosiwo wún láà é gbɔɔn suu' wo' n tà é, e nuu miniminiyèa. È nù yɔ́n bhi, ke n la-wùn lefienɛ́ àa zí n yàan koo.

À gàn' woo daa n yàànlé ma: n ga-wùn lengdo' ya tó le. Sée àle tó' kɛ̀ɛ̀ kwɛi ke n kpɔ́yè- nù tó Aatana' è mɔɔ ga-mɛ̀ɛ̀bò zanaá láà àle lé, ke mɔɔ nù n zʋʋ yaa n lekini nɛ̀ koo le.

Kɛ́ máà woo wɛ̀i-gà' wo láà, Aatana' n la' à gɔ̀n, le à gàn' zí n yàan ma: àle do láà àle n laà dɔ̀ya le. Atoosiwo n zʋʋ ké à gi ma: àa boii n la ke woá kwɛi dɔ̀ya.

Kɛ́ ka lekini ká dɔ' wo gbáágbààa ke ká n tàkún n lébhàiwoyè bhà le. Ka à kɛ̀ɛ̀' kwɛi, Aatana ké gɛ̀ilɛ tóà n bhà bhaamɛ̀ɛ̀ kpe kpáalàkpàà tó ka nbhà bhài' woà láà à-wùn gi, le à gi-wùn- bò' kɛɛá, bhaamɛ̀ɛ̀ kpe tó- zí à wánglego n nɛ̀ le. Pɔli-à táá yɛ́ɛ́ gɛɛn

Táá-kɔ̀ɔ̀ sɛ̀' Aatana' à gie' n nɛ̀, án àle si' lúyáán tà lɛnói le. Kɛ́ án táá-kɔ̀ɔ̀ sɛ̀ láà à sì- ka pé bhi' wo, le à lé' gie' zaa bhɛ́ibò pe tà le. Sée án nuu táásíà n gwílé púú záázàà tà, ke pe àa n bhà kɔɔkekɔ̀ɔ̀ke gi. Atoosiwo máá nuu tááà bhaamɛ̀ɛ̀bò pe gwílíkaan bhɛ́iwɛ́ɛ́-le bhà. Kɛ́ Aatana' gɛ̀ilɛ' to' n bhà láà, án nùù tááà àle gɛnviin bhà le. Pɔɔn- à kɛɛ ke n zowɛ́ɛ́' kpááyèa tɔ̀kpɛ́tɔ̀kpɛ́lé, ke án n vele gizɛii à peyè tà, àle lɛ́ɛ.

A-kɔ̀ɔ̀ do láà à gi zí, an sɛ́ikwɛ́' bɛɛnzɛ ziàn láà, ka wʋʋ ye' à bɛɛn ye bhi, ni ka à ye' gima à gi, ke àle n wʋʋá do le.

À kɛ̀ɛ̀ kwɛiyè láà à gi, n kpɔ́yè ké à lé ma: ká à gimaà kpákpálé ka: koà Gwilinɛ Yesu-à yáán yàà lɔng bhà-kwèèi- bhɔ̀', ka tɔ́ ké bhɔà n-wùn gi, le n lekini n pe- zí bhɔ ka leng ka-wùn gi le. Sée ká zí à ke-le gimayèa dɔkɔ̀ɔ̀ é à gi.

Sée à gàn- tó' wo n yàan kwɛi láà, án nuu à pé woo ke án ló bhɔi ka lià fɔ́ɔ́lé, é kɛ̂ɛ kwɛi ke n zìn ka lià gi-wùn sɛ̀- nù kɛɛ ka nɛ̀ gɛnyààn piilɛ tóá.

Pɔɔn- à kɛɛ ke an àle pe kwɛi, àle ye: án nuu à pé woo ke n gieyè- waa ka lià líe, ke án nuu lóà Masedoni sɛ́ɛ́ gi, ke an bò' góá bhi, ke án sɛí, ke án waa piilɛnàà wo ka lià, ke an zí gò' ka pé bhi, ke ká woo nù n dɔ zaá, ke án ló Zudee sɛ́ɛ́ gi.

Án nuu lò ka lià lóó' kpɔ́à kwɛi láà, e ka gi ye: án nùù à kpɔ́' woà n wun kpu bhà bhiábhiá, ke máá n zʋʋgɔɔnyèa la è? Tààn e ka gi ye: an n pe wúnbò' à yàkisi n zowɛ́ɛ́ pé ziàn láà la ò, an à yàkisì kwɛi è sɛɛ n lekini pe zowɛ́ɛ́ nɛ̀ kɔɔ' bhà àle gi la è? Tààn e ka gi ye: án à peii wún do' bhà ma iin láà, an à pe ke wò àle bhà zí ma ááo la è?

Àa kwɛi. Án à zɛ Aatana' àa gó e wʋʋ tà láà à nɛ̀ ma: an liangbò' zɛ ka nɛ̀ ziàn láà, áá ni iin àa tó kaanyèa kiá à kekekèke gi.

Sée Aatana gbe Yesu Klisi' ko ni Silivɛn ni Timotee kó à-wùn-nàà kpɔ' ka nɛ̀ láà, àle àa nuu áá ni iin tó kààn kiá-mɛ̀ɛ̀a. Wánglafila, àle to' Aatana' iin' pe' láà àle gi-wùn kɛɛ-mɛ̀ɛ̀a le.

E sée kwɛi maiá, Aatana' wúnsɛ̀ páipái' à kɛɛ-wùn píníwo' iin peyèa fɔ́ɔ́lé láà, Klisi' to' à tó wun bàn péng-mɛ̀ɛ̀a le. Ale kɛɛ le kó zí tɔ́ ban-à ziàn Aatana bhà Yesu Klisi' gɛ̀ilɛ' tóyèa ko bhà láà à-wùn gi, le ko àbhà iin láà à lékun à gɔ̀n, le ko wɩɩ ko àmiina le.

Atoosiwo Aatana lekini' ko nà kanù konó zʋʋ gbaan Klisi-à zaawɛ́ɛ́ tà le. Ale do láà àle zí ko yaayèa e tùbhà,

le é Waa Zaazaa daayèa ko zowɛ́ɛ́ pé, ke è tó leekpɔ̀ɔ̀tili-sànmá' é à yaayèa ko gɔ̀n láà à liélé-bhɛ̀ɛ̀a le. Aatana- kɛ́ɛ kpɔ́yèa ko bhà kwɛi' wo le.

À kɛ̀ɛ̀ kwɛiyè láà à gi, mɔ́ɔ́ nù ló' wo ka lià Kolɛnti koo láà, án à kɛ̀ɛ̀ kwɛi ke mɔɔ nù gbɔɔn' wo ka tà le. Án à zɛ sii tà. Aatana' n séeá àle gi le. Òo tò' maiá, án ga.

An à pè' kwɛi, ke àa ye ko yaayè' gá ka wunlé, ke ka kpɔ́à Klisi lé kɔɔ' gi, kole kó à-kɔ̀ɔ̀ pe ka nɛ̀ le. Àbin, àa kwɛi. Atoosiwo ka gɛɛn ké gbaanyèa kelekelele kpɔ̀ à lé-yè-le gi. Kɛ́ an dɔà kɔɔ' gi ke án ka tàkún ke ka zowɛ́ɛ́ nii- daa tɔ̀kpɛ́tɔ̀kpɛ́lé laá, an àle-lèè guoii le.