2 Pierre 1

Nle Simon Piɛli' án Yesu Klisi-à gùá ni àbhà táá-mɛ̀ɛ̀a láà, nle án sɛ́ikwɛ́ é à bɛɛnzɛii le. Ko la-mɛ̀ɛ̀ Yesu Klisi' é koà Aatana-á, ke è wúnsɛ̀ kɛɛ bhaamɛ̀ɛ̀ tó páipái nɛ̀ láà, é kpɔ̀ à lé-zòwɛ́ɛ́ do' daayèa ko gwílé, è àle sínma daayèa ka leng ka gwílé le. Mɛ̂ɛ' ko ni kanù koà kpɔ̀ à lé-yè- mɔɔ kiá kwɛi láà, an sɛ́ikwɛ́ é à bɔii kale ka nɛ̀ le.

Án wɩɩ ma: ko nɛ Aatana ni koà Gwilinɛ Yesu dɔnyè láà, è gɛ̀ilɛ tó ka bhà gbanggbaale, ke è zí ka zowɛ́ɛ́ niidaa tɔ̀kpɛ́tɔ̀kpɛ́lé. Dàà la-zàà tà gi-wùn kɛɛ-kɔ̀ɔ̀

Yesu Klisi bháa' è go Aatana pé láà, àle ko la-zàà ni à zòàwùn kɛɛ-zàà lépólóyèa ko gɔ̀n, ke kó nù táásí à tà, ke kwáá tóyèa zía wúnngewùngge gi le. Sée Aatana do' é ko leeyèa ebhà kpókpónɛ̀ ni ebhà kólósɛ̀nɛ̀ bhà, ke kó nù tó e peá láà, Yesu Klisi- ko yán lépólóyèa àle bhà, le é tóyèa la-zàà láà à lépòlò ko gɔ̀n-kɔ̀ɔ̀a le.

Aatana' zí gɛ̀ilɛbò' tóyèa ko bhà kwɛi láà, àle bháa daa ko gi, le wúnsɛ̀sɛ̀bò' à bhɛɛ' kpáaá, ke à mɔ̀ɔ̀kiá àa bhe, ke é à kɛ̀ɛ̀ ko nɛ̀-wùn píníwoyèa láà, ko ko zi gbaan à gi le. Sée è píníbò láà à woyèa kwɛi, ke ka leng ká nù ka zi gbaan àle gi, ke bhaamɛ̀ɛ̀bò zowɛ́ɛ́' naayèa mɛ̂ɛ gisie-wùnbò' à lé lúyáán tà láà, ká daa à gɔ̀n kai, ke ká gálá, ke àbhà Aatana-zòwɛ́ɛ́' é à gwílé, à ke- nù bhɔ ka nɛ̀ le.

A-wùn gi, ká ka bháa dɔ, ke kaà kpɔ̀ Yesu lé-yè láà, ká à lépa táá-kɔ̀ɔ̀ sɛ̀a, è gò' bhi ke kaà táá-kɔ̀ɔ̀ sɛ̀ láà, ká à lépa wúndɔnnɛ̀a,

ke wúndɔnnɛ̀ láà, ká à lépa kpɔ̀ leng lé-yèa, ke kpɔ̀ leng lé-yè láà, ká à lépa wún kùn ka bhà-yèa, ke wún kùn ka bhà-yè láà, ká à lépa nàà Aatana-wùn bhà-yèa,

ke nàà Aatana-wùn bhà-yè láà, ká à lépa ka kɔɔ tò ka ké kwenglé-yèa ye laànɛ́bhà-mɛ̀ɛ̀bò nɛ̀. È gò' bhi, ke ká zí kaà laànɛ́nɛ̀ láà à leng lépa Aatana ni bhaamɛ̀ɛ̀ tó páipái lɔ̀ɔ̀ ka kɛɛyèa.

E sée kwɛi maiá, sɔng sɛ̀sɛ̀bò láà àle tó- tò' ka lé, ke è daa lesósó' woii à lé ziàn laá, káá kwii-ii koà Gwilinɛ Yesu Klisi dɔnyè gi. Wánglafila, ka à dɔn' wo láà, àle tɔnɔ ké tóà ka bhà kpáaá.

Kɛ́ sɔng sɛ̀sɛ̀bò láà àle àa mɛ̂ɛ ye' à lé, ke yánwili' àle-mɛ̀ɛ̀a le. Atoosiwo à-mɛ̀ɛ̀ yáin ké wàlàòle Yesu Klisi-wùn gi, le Aatana' bɔ́n gó' wo' à bhà, ke è à bhàwùn tó àbhà wúnyóyoobò' nuu fɔ́ɔ́lé à-wùn gi láà, à zʋʋ' gó à tó-wùn-a le.

À kɛ̀ɛ̀ kwɛiyè láà à gi, n laànɛ́bò, án wɩɩ ma: Aatana' ka leeyè' gá dàà e pe gi-wùn-a, ke é ka síyèa bhaamɛ̀ɛ̀bò finibhà láà, ká à kún kpókpóá, ke ká àle gi-dɔ̀ wo gbaiinle le. È tò' kwɛi, ka gɛɛnlé àa maaii Aatana-à zaa tà gbonggbongle.

Sée ka à kɛɛà kwɛi' wo, le Aatana- zaa lépolo ka gɔ̀n gbɛ́ɛ́á, le koà Gwilinɛ Yesu Klisi' é ko la-mɛ̀ɛ̀a láà, ka dɔ̀lèè ye àbhà mɛ̂ɛnɛ̀' àa yɛn gbonggbongle láà à bhà le.

Pɔɔn- à kɛɛ ke máá n boii ka zʋʋ zanaá gbonggbongle wúnbò láà à gá kwɛi, àle lɛ́ɛ. Ká wúnbò láà à tó dɔn fɔ́ɔ́lé maiá, le mai-wùn' è go Aatana pé láà, ká wɩ́ɩ́yèa à bhà, le ká à gi-dɔ̀ woii gbaiinle le. Kɛ́ àle tó gi, án tóà ka zʋʋ zanaà kwɛi lɛ́ile.

Atoosiwo án tuàn n yánlé-le maaà tée ye' àle gi é, e n gi sɛ̀a ke án ka zʋʋ zana kwɛi, ke ká nù yaa ka zʋʋá.

Pɔɔn- à kɛɛ ke an àle pe kwɛi, àle ye: à gàn ké n yàan ma: à gi àa dɔ́ɔ́n-á koo, ke má ló táá dɔ́ɔ́n gi. Sée koà Gwilinɛ Yesu Klisi lekini ké zí à tàpólóyèa n nɛ̀ kwɛi.

Ale kɛɛ le an à dɔà kɔɔ' gi, ke an bò' lóá, ke ka zʋʋ- nù zana wúnbò láà à gá bha tó bhà tó bhà, án à-lèè guoii le. (Pɔɔn- à kɛɛ ke án zí sɛ́ikwɛ́ é à bɛɛnzɛii ka nɛ̀, àle lɛ́ɛ.) Mɛ̂ɛbò' wó yáánpa' Klisi-à mɛ̂ɛnɛ̀ zán bhà

Bhaamɛ̀ɛ̀bò- wo zowɛ́ɛ́ sɔ́nɔ́go ke wò dáinwʋʋpé nɛ́ɛ́nɛ̀ɛ̀bò' kpɔ ziàn láà, kole kóó mai sí àle ke tà, ke kó à pe ka nɛ̀ ko: koà Gwilinɛ Yesu Klisi bháa ké kpókpóá, le é tuàn nu dɛ́ɛ ke woà, ke è ebhà mɛ̂ɛnɛ̀ kɛ̂ɛ le. Kɛ́ kole ko yánwɛ́ɛ́ kpèé' pá' wo' àbhà mɛ̂ɛnɛ̀ zán bhà láà, àle kɛɛ le kó à-wùn peii ka nɛ̀ kwɛi le.

Atoosiwo ko nɛ Aatana ké bhɛɛ yaa' e gbe Yesu láà à bhà ko yàànlé, le é à zɛ' tɔ́á le. Abhà gwilinɛnɛ̀' à mɔ̀ɔ̀kiá àa bhe láà, é nùù àle zɔ́ɔ́lé gieà kwɛi, ke ko tóló ké à wʋʋ bhà, ke e à peii ye: Mɛ̂ɛ é, nbhà nɛ́ wùndɔ̀yóoá' à gá, le à lɔ̀ɔ̀' è n kɛɛ láà à nààlé àa bhe le.

Sée wʋʋ' é go' lɔngwɛ́ɛ́ gi kwɛi láà, ko lekini yáányè' kó à ma', ke kó Yesu Klisi wɛì Aatana-à tɔɔn gwenglé le.

À kɛ̀ɛ̀ kwɛiyè láà à gi, Aatana wʋʋ léban-mɛ̀ɛ̀bò' nuu liangbò' zɛà ziàn fɔ́ɔ́lé lii láà, ko à tó páipái dɔ̀n mai lekinilèkiniá wʋʋ do' kó à ma' tɔɔn gwenglé láà àle bhà le. Sée Aatana wʋʋ léban-mɛ̀ɛ̀bò wʋʋ' é kwɛi láà, ka ka tóló dɔ̀' àle bhà, ke ka gɛ̀ilɛ' tóii ka leng bhà lɛ́ɛ. Atoosiwo wʋʋ láà e ye làngbha' wó à dɔyèa lee tíi lià à nɛ̀. À zán ké tóà bhɔà kwɛi kwɛi flúúlé, le lee- kpɔɔ zìgo, le Aatana-à géluu- wolo, le è mɔ̀ng maa ka zowɛ́ɛ́ tà le.

Kɛ́ àle tó liélé, à gàn- tó ka yàan ka: wʋʋ ye óó ye' Aatana-à sɛ́ikwɛ́ gi, mɛnggemɛ̀ngge àa àle ke zía pe e lekini pe zòà-kɔ̀ɔ̀ bhɛ́i-le gi.

Atoosiwo Aatana wʋʋ léban-mɛ̀ɛ̀bò' nuu zí liangbò' zɛà ziàn láà, wòo à kekekèke sí wo lekini zʋʋ pé. Kɛ́ Waa Zaazaa' nuu wʋʋ' daaà àng zʋʋ pé, wó nùù àle léban-à le.