1	Yesu-à táá-mɛ̀ɛ̀bò ni à pe gi-mɛ̀ɛ̀bò' nuu Zudee sɛ́ɛ́ gi, wo à ma' wo: mɛ̂ɛ bhɛ́ibò' wàa Zuifu-a, àng tó ké wɩ́ɩ́yèa Aatana wʋʋ bhà.
2	Piɛli' bo' tɔnngá, ke è waa Zelizalɛm, le Yesu pe gi-mɛ̀ɛ̀ yemò' nuu bhi, ke wó Zuifu-bòa láà, wó à pe' à nɛ̀ wo:
3	Wo wɩɩ wo: í sɔɔyèa mɛ̂ɛ' wàa ló gbùé láà àng pé kwíle, le í kɔɔ daayèa àng pé la wà?
4	Le Piɛli' dɔ' à pe bhɛɛ tà dɔ́ɔ̀nle àng nɛ̀ ye:
5	É nuu kwɛngge láà à gi, ke án Zope, ke án bhàiwoii Aatana zì, le lábhili' daa' n gá, le n yáin' daa' le. Máà n káá' wo, ke pɔngge' nuu ye song gbɛ́ɛ́ ke nɛ̀, e góii lɔngwɛ́ɛ́ gi, ke à bhɛɛ ké dɔyèa à zɔ́ɔ́ yisɛ tó bhà, ke e yɔɔii, ke e yɔ́n-ii n maabhà ziàn.
6	Án à gaa' sɛ́inlé, le án kpoo' gbàà láà à gi, le án kʋ̀sʋ̀ tà-wììbò ni kai-wììbò ni sáaá-pɔ̀ɔ̀nbò ni maabò kpe ye' bhi le.
7	Án dɔlɔ' sɛ́inlé, le wʋʋ ke' daa' n tóló gi ye: Piɛli, walá, ke í pɔɔnbò láà à ke zɛ, ke í à bhɛlɛ.
8	Kɛ́ le án wɩɩ' ma: Áááoo, Gwilinɛ Kpáa! Mɔ́ɔ́ daa n sɛ́ɛ́n lé do bhe.
9	Kɛ́ le wʋʋ láà é wolo piilɛnàà wo' lɔngwɛ́ɛ́ gi ye: Aatana' bo à peá pɔɔn ye' à bhà ye: bian àa à bhà, miá i gban kpɔ́ àleá koo.
10	É kɛɛ' kwɛi gɛnyààn yakaá, le pɔɔn láà é sɛi', le é lo' lɔngwɛ́ɛ́ gi le.
11	Máà n káá' wo, ke bhaamɛ̀ɛ̀ yaka' wó go' Sezalee, ke mɛngge' wó nuu à leeà Kɔlɔnɛi láà é àng bɔ' n lià, wo dɔɔ kwíi' án nuu à gi láà à líɛɛ.
12	Le Waa Zaazaa' à pe' n nɛ̀ ye: Bhè ló àng wɛì, síka òo tóà i gi. É à pe' kwɛi, le ko laànɛ́bò saado' wó dɔɔ é, wó lo' n wɛì le. Kó waa' bhi, le kó sɔɔ' mɛ̂ɛ láà à pé kwíle,
13	le Aatana-à kɩ́ɩ́la' kaa' à gi à pé kwíle kɔɔ' gi, é à tó gɛingo' ko nɛ̀ le. E wɩɩ' ye: Aatana-à kɩ́ɩ́la ké à pe' e nɛ̀ ye: é mɛ̂ɛ bɔ Simon' à tɔ́yààtà' Piɛli-a láà à lee lià Zope,
14	ke e ni epé kwíle-mɛ̀ɛ̀bò tó páipái wo laà wʋʋ' bhà, è à pe e nɛ̀.
15	Kɔlɔnɛi' bo' à gɛin láà à góá kwɛi, le án liangzɛ zigo' le. Kɛ́ n biin lépólóyè' to' kpókpóá, ke Waa Zaazaa' tó ke a yɔɔ àng tà ye é yɔɔ' ko tà à zigó gi kɔɔ' bhà láà à gi le.
16	É kɛɛ' kwɛi, le n zʋʋ' zana' Gwilinɛ Kpáa' wʋʋ' pe' fɔ́ɔ́lé láà à gá le. E wɩɩ' ye: Záàn-le' nùù bhaamɛ̀ɛ̀ zúlúà yí' wɛ́ɛ́ le. Kɛ́ kale ka zúlú- woà Waa Zaazaa' gá le.
17	Ale kɛɛ le án wɩɩ' ma: Aatana leng' pɔɔn' nu' mɛ̂ɛ' kó wɩɩ' Gwilinɛ Yesu Klisi-wùn bhà fɔ́ɔ́lé ko nɛ̀ láà, ya zí pɔngdo láà àle nù' mɛ̂ɛbò é àng lekini nɛ̀ la ò, nle an woo tuàn mɛɛá àlei koo, le an n kɔɔ gbaan n mɔ bhà Aatana nɛ̀ le?
18	Wó bo' Piɛli wʋʋ láà àle maá, àng tó zowɛ́ɛ́' saa' wo', le wó gbaan' Aatana wánglegóà le. Wo nuu wɩ́ɩ́à wo: È tò' àleá, ke Aatana leng' gɛ̀ilɛ tóyèa, le é wɩ́ɩ́yèa à bhà, ke mɛ̂ɛ lefie' wàa Zuifu-a, àng tó- wo kɔɔ gó wo sɔng lé, ke wò nù sii' àa yɛn à sɔlɔ lɛ́ɛ. Legilizi-wùn zigò Antiɔsi-kɔ̀ɔ̀
19	É go' bhi, wó nuu Yesu pe gi-mɛ̀ɛ̀bò wɛ̀ikɛ̀ɛ̀' woà Etiɛni zɛ téei láà, mɛ̂ɛ' wó daa' kai à-wùn gi, wo wɛinna', le àng kemò' lo' flúúlé, le wó waa' Fenisi lùu ni Sipɛlɛ lùu gi, le àng kemò' waa' zí Antiɔsi-pɛ̀ɛ̀ yáànbhà le. Wo nuu lóà Aatana-à liangzɛ bhɛɛá dɔ́ɔ̀nle. Kɛ́ wó nùù à zɛà Zuifu-bò lengdo' nɛ̀ le.
20	Kɛ́ sée kpɔ̀ Yesu lé-mɛ̀ɛ̀ kemò' nuu góà Sipɛlɛ lùu ni Silɛni lùu gi, àngle wó waa' Antiɔsi, wo lo' mɛ̂ɛ' wàa nuu Zuifu-a àng tó pé, le wó wúnsɛ̀' è zin Gwilinɛ Yesu-wùn bhà láà à-nàà kpɔ' àng nɛ̀ le.
21	Gwilinɛ Kpáa ké nuu e kɔɔ yaaà àng kɛɛ-wùn tó bhà, le bhaamɛ̀ɛ̀ kpe kpáa' wɩɩ' à-wùn bhà, le wó wo zowɛ́ɛ́ seela' à pé le.
22	Ang wʋʋ' daa' legilizi-mɛ̀ɛ̀bò' wó Zelizalɛm àng tóló gi, le wó Banaba bɔ' Antiɔsi le.
23	É bo' waaá bhi, ke Aatana' gɛ̀ilɛ' to' bhi-mɛ̀ɛ̀bò bhà láà, è à-lèè ye, à liá ké waa' à gi, le é àng bháa dɔ' ye: wò wo zʋʋ gbaan, ke wò wo kɔɔ kún Gwilinɛ Kpáa-wùn bhà kelekelele le.
24	Banaba' nuu' wo' wúnsɛ̀ kɛɛ-mɛ̀ɛ̀a, ke kpɔ̀ Aatana lé-zòwɛ́ɛ́ ni Waa Zaazaa ké à payèa kelekelele láà, àle kɛɛ le é àle pe' kwɛi le. Bhaamɛ̀ɛ̀ kpe kpáalàkpàà tó' zí wɩ̀ɩ̀ dàà Gwilinɛ Kpáa pe gi-wùn bhà àle-wùn gi le.
25	Banaba' go' bhi, le é lo' Sɔli leei Tasi le.
26	É bo' à yeá, le é à si' e gɛin, le wó lo' kiá Antiɔsi le. Wó waa' bhi, wo kwee do tó zin' kélé, ke wo ban-ii ké tà nàa legilizi-bòa ziàn. Wó mɛ̂ɛbò' àng dɔɔ' Aatana wʋʋá bhi, àng kpulu ké nuu kpáaá miniminiyèa. Sée Antiɔsi-lèè láà, wó Yesu pe gi-mɛ̀ɛ̀bò lee zigò- bhi' wo wo: Keletiɛn-bò le. Agabu ké vɔ́n ke daa-nàà kpɔ'
27	À tée láà à gi, Aatana wʋʋ léban-mɛ̀ɛ̀ kemò ké go' Zelizalɛm, le wó yɔɔ' Antiɔsi le.
28	À mɛngdo ke' wó nuu à leeà Agabu láà, é wala', le é à pe' Waa Zaazaa-à pe gi ye: À gi àa mɔ́ii koo, ke vɔ́n kpáa' daa sɛ́ɛ́ tà lɛnólɛ̀nó gi. Sée vɔ́n láà e nu' daai kwɛi maiá gwilinɛbòà gwilinɛ' wó nuu à leeà Kolodi láà à yànmai gi.
29	Kɛ́ Yesu pe gi-mɛ̀ɛ̀bò' bo' Agabu wʋʋ láà àle maá kwɛi, le wó yààkébhà kɛɛ' wo: mɛ̂ɛ ye' à kɔɔ- mɔɔà pɔɔn' bhà, è à nu, ke wò à bɔ wo laànɛ́ Yesu pe gi-mɛ̀ɛ̀bò' Zudee lùu gi àng tàkún-pɔ̀ɔ̀n-a.
30	Wó bo' wo kɔɔ ban-á ké tà, le é mɔɔ' pɔɔn' à bhà, wó à dɔ' Banaba ni Sɔli gɔ̀n, ke wò ló nàa legilizi liélé sí-mɛ̀ɛ̀bò' wó nuu Zudee sɛ́ɛ́ gi láà àng nɛ̀ le.