Actes 19

Apolo' nuu Kolɛnti tée' gi láà, Pɔli ké gie' Azi lùu lɛayè gi, le é waa' Efɛzi le. E Yesu pe gi-mɛ̀ɛ̀ dolodolo kemò ta' bhi,

le é àng bhàgilawo' ye: Ká wɩɩ' Yesu-wùn bhà tée' gi láà la ò, ká Waa Zaazaa sɔlɔ' è? Le wó à yoobɔ' à gɔ̀n wo: Kóó à ma lefienɛ́ wo do bhe wo: Waa Zaazaa ké bhe.

Wó à pe' kwɛi, le Pɔli' wɩɩ' ye: Ká sée mɛɛ-zùlù wo' àlei le? Le wo: Kó dàà Záàn pe gi-zùlù' wo' le.

Pɔli' wɩ̀ɩ̀ àle gi ye: Záàn-le' nuu à pe mɛ̂ɛ zúlú' woà láà, mɛ̂ɛbòà gò wo sɔng gi-zùlù' nuu àleá le. Ale kɛɛ le Záàn leng' nuu à peà mɛ̂ɛbò nɛ̀ ye: wò kpɔ́ mɛ̂ɛ' é nuii e zíà láà àle lé le. É nuu mɛ̂ɛ' à peà kwɛi láà, àle nuu Yesu-á le.

Pɔli' bo' àle peá kwɛi, mɛ̂ɛbò láà wó tó' wo', le wó dàà Gwilinɛ Yesu pe gi-zùlù wo' le.

Wó bo', le Pɔli' e kɔɔ dɔ' àng tà, le Waa Zaazaa' to' le é yɔɔ' àng tà le. Wo to' sáabhi, le wó sɔɔ' wʋʋ dɛ́dɛɛbò peà, ke wo Aatana wʋʋ léban-ii le.

Ang tó bànkétàyè ké nuu mɔɔà bhaamɛ̀ɛ̀ buu-ni-wɛ́ɛ́-piilɛ bhà.

É go' bhi, le Pɔli' sɔɔ' Aatana-kwìle, le Aatana-à liangzɛ-kɔ̀ɔ̀' nuu sɛɛà à nɛ̀ kɔɔ' gi, é gbaan' à zɛà à-kɔ̀i, ke mɛnggeà wúngge àa à bhà le. Mɛ̂ɛnɛ̀' è go Aatana pé, e nùù àle-wùn peà àng nɛ̀, le è dɔà kɔɔ' gi ke è wʋʋ' peà láà è bhɔ àng gi mai bhà, è àle-lèè guo le.

Kɛ́ mɛnggoò' nuu bhi, àngle zowɛ́ɛ́ ké to' tílíkpátìlìkpàa, le wòo wɩ́ɩ́ kpɔ̀ Aatana wʋʋ lé-wùn bhà le. È nù yɔ́n bhi, ke wò Gwilinɛ Kpáa-à zaaɛ́ɛ́ bhàsaa' woii bhaamɛ̀ɛ̀ tó yàànlé le. Kɛ́ le Pɔli' go' àng kpe gi, le é lo' nà Yesu pe gi-mɛ̀ɛ̀bòa mɛngge' wó nuu à leeà Tilanu láà à pé kalang-kwìle, le é nuu Aatana-à liangzɛà bhi yáángɛɛn tó páipáiá le.

Wo tò- àle bhà kwɛi flúúlé kwee piilɛá, le mɛ̂ɛ páipái' wó nuu Azi lùu gi, Zuifu-bò ni Gɛlɛki-bòa, àng tó' Gwilinɛ Kpáa wʋʋ ma' le. Seva gbebò yínaa yóyoobò kɛ̀ɛ̀ Yesu-tɔ̀ gi-kɔ̀ɔ̀

À tée láà à gi, Aatana ké nuu sɔ́n-wùn miniminiyèbò kɛɛà ziàn Pɔli kɔ̀ɔ̀tà.

È nù yɔ́n bhi, ke giè wɛí-gbààbò ninà wélé pɛ́ɛ́nbò' é nuu zin-à Pɔli kwîi bhà, ke wò lóii nà àleá bhàyúá-mɛ̀ɛ̀bò nɛ̀ le. Wò bò' àle zin-á àng kwîi bhà, àngbhà yúábò- bo' wo, le mɛ̂ɛbò' àng pe' nuu yínaa yóyoobòa, à tó- go àng wɛì le.

À tée do láà à gi, Zuifu kemò' nuu bhi, wo nuu gieà pɛ́ɛ bhɛɛ tà yínaa yóyoobò kɛɛ kàngbhà, le wó sɔɔ' yínaa yóyoobò piékɛ̀ɛ̀ Gwilinɛ Yesu tɔ́á-yè gidan-à le. Wo nuu à peà yínaabò nɛ̀ wo: Má ka piékɛɛ Yesu do', Pɔli' à-wùn lòlòkpɔ́ii láà à tɔ́á.

Mɛ̂ɛ' wó nuu à kɛɛà kwɛi láà, wo nuu bhaamɛ̀ɛ̀ yílí saapiilɛá. Yíkpáá-mɛ̀ɛ̀ kpáè' wó nuu à leeà Seva láà, àle gbebò' nuu àng gá le.

Kɛ́ le yínaa yóo' wɩɩ' àng nɛ̀ kwɛnggei ye: Án Yesu dɔn, le an zí Pɔli lekini dɔn le. Kɛ́ wáa kale kaá le?

Le é to' le yínaa yóo-mɛ̀ɛ̀ láà é daa' àng tà bhi, le à kɔɔ' gie' àng tó gɔ̀n, le é àng zuu gi-zùù wo', le àng tó' wolo' bàlàa kpáán tɛ́ɛ́n-á, ke yuɛn ké àng bhà lɛnói banggbɩɩle le.

Zuifu-bò ni Gɛlɛki-bò' wó nuu Efɛzi bhi, àng tó páipái ké wún láà à ma', le súó' daa' àng tó gi le. Ale to' bhɛɛ yàà Gwilinɛ Yesu bhà-kɔ̀ɔ̀a péng bhi le.

A-wùn gi, mɛ̂ɛ' wó nuu kpɔ̀ Yesu lé-mɛ̀ɛ̀a fɔ́ɔ́lé, àng kpe ké nuu nuà wɩ́ɩ́i wo sɔng bhà, le wó nuu dɔà à bhɛɛ tà bhaamɛ̀ɛ̀ tó zué le.

A-kɔ̀ɔ̀ do láà à gi, mɛnggoò' wa woo mɔ́ zʋ́ʋ́nɛ̀ kɛɛà fɔ́ɔ́lé, àng kpe ke ké nu' nàa woà zʋ́ʋ́nɛ̀ kɛ̀ɛ̀ à bhà-sɛ̀ikwɛ́bòa, le wó à dɔ' pailé mɛnó yàànlé le. Wó sɛ́ikwɛ́bò láà à sɔ̀ɔ́n yàkisi', e zin' wɛ́ipúúwɛ́ɛ́ wáá kuà-solu bhà.

Aatana wʋʋ' nùù táásíà kwɛi' wo, le mɛnó' nuu à tò kpókpóá-lèè yeà le. Bhing kpáa dàà Efɛzi-kɔ̀ɔ̀

Ale pe zìpieta, Pɔli ké à yaa' e zʋʋ pé ye: é gieà Masedoni lùu gi, le e gie Akai lùu gi, le e lo Zelizalɛm le. E nuu à peà e zʋʋ pé ye: e bò' waaá bhi, à-lèè ké à bhà ke é ló, ke é yáánpá Wɔlɔm-pɛ̀ɛ̀ lekini bhà zí.

À kɛ̀ɛ̀ kwɛiyè láà à gi, Pɔli ké e tàkún-mɛ̀ɛ̀ piilɛ' wó nuu Timotee ni Elasite-nùa láà àng bɔ' Masedoni sɛ́ɛ́ gi, le à lekini-le' tónɛ́ ke wo' líe Azi lùu gi bhi le.

Sée dààkélé kpáa do' zí dàà Efɛzi bha do láà àle bhà táásì Gwilinɛ Kpáa-à zaa tà-wùn gi le.

Angbhà yo kpáa' wó nuu à leeà Diane láà, à lɔ̀ɔ̀kɛ̀ɛ̀i-kwìì ké nuu péng bhi. Sánng pie-mɛ̀ɛ̀ do ke' wó nuu à leeà Demetiliu, e nuu Diane-kwìì láà à nai pieà wɛ́ipúúá, le àbhà bháála kɛɛ-mɛ̀ɛ̀bò' nuu tɔnɔ sɔlɔà à gi miniminiyèa le.

Ale ni mɛ̂ɛ' àngbhà bháála suu' nuu do, e àng ban' ké tà nà e leng pe bháála kɛɛ-mɛ̀ɛ̀bòa, le é wɩɩ' àng nɛ̀ ye: Zuànbò, à gàn ké ka yàan ka: ko nà kanù ko pe yààsɛ̂ɛ- gò piɔ̀nng é àle gi le.

Kɛ́ ka yáán- àle bhà, le ka tóló' à-wʋ̀ʋ̀ gi wo: mɛ̂ɛàn' wò à lee Pɔli láà, à wʋʋ' bhaamɛ̀ɛ̀ tinglàtìng tó zʋʋ kún Azi lùu kpáè-lèè tó gi, le ya àng wɛ̂ɛ gó ko tà le. Yàa Efɛzi-pɛ̀ɛ̀-le lengdoà wún-á koo. Atoosiwo e wɩɩ ye: lɔ̀ɔ̀kɛɛ-pɔ̀ɔ̀n yemò' bhaamɛ̀ɛ̀bò- à kɛɛ wo kɔɔá láà, àngle wàa áatanabòa.

È à pe' wo kwɛi láà, è ko dɔ' wo tèngbhè yóo lé à gá lɛ́ɛ. Sée àa tóii piɔ̀nng é àle lengdo wálá gɛɛn-á. Kɛ́ ke Diane' é koà lɔ̀ɔ̀kɛɛ-pɔ̀ɔ̀n kpáaá láà, è àle tó pe-kwìì wí-ii do le. È tò' kwɛi, ke mɛnó- bhɛɛ yaa pɔɔn' bhà, ke wò à lɔ̀ɔ̀kɛɛ Azi lùu tó páipái gi, ke wò zí à lɔ̀ɔ̀kɛɛ lúyáán tà lɛnólɛ̀nó gi láà, è àle tó-wùn góii do lɛ́ɛ.

Mɛ̂ɛ' wó ban' ké tà láà, wó bo' wʋʋ láà àle maá kwɛi, bhɔlɔ ké waa' àng tó gi, le wó sɔɔ' gbáláà wo: Efɛzi-mɛ̀ɛ̀bòà Diane ké kpókpóá, ké kpókpóá, ké kpókpóá!

À bhing' é daa' láà, e pɛ́ɛ tó yáán dɔ' gɛɛn bhà, le bhaamɛ̀ɛ̀ tó' gbulu', le wó lo' kiá zábàà à gi-gùlù' nuu bhi láà à gélé le. Pɔli táá yóóbò piilɛ Gayu ni Alisitaki' wó nuu Masedoni-mɛ̀ɛ̀bòa láà, wo àng kun' zaá, le wó lo' nà àng gá bhi le.

Pɔli lekini ké nuu woo à pé ye: é ló àng wɛì, ke é dɔ pɛ́ɛ-mɛ̀ɛ̀bò zué bhi, kɛ́ le Yesu pe gi-mɛ̀ɛ̀bò wòo wɩ́ɩ́ à lò bhi-wùn bhà le.

À dɔ́mabò lefie' wó nuu Azi lùu wunlé-mɛ̀ɛ̀bòa láà, àng kemò ké nâa kpɔ', ke wò à pe à nɛ̀ gilikígilikílé wo: òo lóà gulu láà à gi.

Tìngtíng' yɔɔ' zábàài-gùlù gélé láà, àng kemò ké nuu gbáláà kɔɔ ke gi, le àng kemò' nuu zí gbáláà kɔɔ bhɛ́i ke gi le. Atoosiwo àng tó ké nuu kaanyèa kiá bhi do bhulukuule, le àng bɛ́ɛ́-lèè wàa nuu wo bàn ké tà bhi gɛɛn lefienɛ́ dɔn-à le.

Ale kɛɛ le mɛngge' wó nuu à leeà Alesandele láà, wó à si' bhaamɛ̀ɛ̀ kpe gi, le wó à dɔ' àng zué bhi le. Zuifu-bò' nùù àle dɔà wo liélé le. À kɛ̀ɛ̀ kwɛiyè láà à gi, à leng ké woo wee láà à tàkààn e kɔɔá gidan', ke é nù liangzɛ tìngtíng' nuu bhi láà àng nɛ̀.

Kɛ́ wó bo' à dɔn-le woá Zuifu-miiá, àng tó páipái' gbaan' wo' gbáláà kiá, le é bhɔ' mɔɔ lià lɛ́ɛ́lɛ́ɛ́ piilɛ sínma bhà le. Wo nuu à peà wo: Efɛzi-mɛ̀ɛ̀bòà Diane ké kpókpóá, ké kpókpóá, ké kpókpóá.

À léyaalé' bhɔ', kúmana kɔlé-mɛ̀ɛ̀' nuu péng bhi láà, àle àng tàga', le é wɩɩ' ye: Efɛzi-mɛ̀ɛ̀bò' ká zé é la ò, wáa àa à gànnu ye: Diane kpáa' ko à lɔ̀ɔ̀kɛɛ láà, Efɛzi-pɛ̀ɛ̀ é àle yáán tóii à-kwìì bhà le? Wáa àa zí à gànnu ye: à nai' go' tɛ́nglà, ke è dalá láà, è péng zé' wo le?

À gbègó-lèè-le ke àa bhe kɔɔ' gi láà, à-lèè ké à bhà ke ká dɔlɔ́ sɛ́inlé, ke kao wúngge kɛɛ zʋʋ dun tà.

Atoosiwo ká nu' nàa mɛ̂ɛ' àng gá é, wòo kianwo, sée wòo ni koà gba-pɔ̀ɔ̀n láà à maa biin gi.

Kɛ́ è tò' ye Demetiliu ni àbhà piewo-mɛ̀ɛ̀bò ké à pé ke wó mɛngge daa-le wo laá, ke bhaamɛ̀ɛ̀ daa-kwèèi ni nù kúmana zué-kwèèi ké bhe àlei. À pe lóó láà è bhɔ̀', ke wò nuu nuà àng daai.

È zí tò' ye wún bhɛ́i kemò ké ka gɔ̀n laá, à tó liang ké zɛà pɛ́ɛ-mɛ̀ɛ̀bòà bànkétà leng gi.

Pɔɔn- à kɛɛ ke an àle pe kwɛi, àle ye: kóó à kùn' sɛ̀a, ko wunlé-mɛ̀ɛ̀bò ké wɩ́ɩ́à wo: kó nùù yàà wo gɔ̀n gwili-yàn gi-lèè' guoà le. Atoosiwo dɔ̀ kpulu kpáaá-kɔ̀ɔ̀ suu é, é wo' kwɛi wún' gi, à gɛɛn do' ko mɔɔà à peá àng nɛ̀, ke è tóà koà mai-wùn-a, àa bhe.

É bo' à peá kwɛi, le tìngtíng' nuu bhi láà, é àng tó lésɛsi' le.