{
    "livre": "actes",
    "chapitre": 23,
    "versets": [
        {
            "numero": 1,
            "texte": "Pɔli' e yáán ta' Sanedɛnɛ gi-mɛ̀ɛ̀bò láà àng bhɛɛ tà, le é wɩɩ' ye: N nɛànɛ́bò, án táási' Aatana-à zaa tà kɔɔ' gi flúúlé ke tenglé' bhɔ é, n zowɛ́ɛ́ ké kpááyèa n gwílé à-wùn gi."
        },
        {
            "numero": 2,
            "texte": "Pɔli' à pe' kwɛi, le yíkpáá-mɛ̀ɛ̀ kpáè' nuu bhi, ke wó nuu à leeà Anania láà, é wɩɩ' mɛ̂ɛ' wó nuu dɔɔ Pɔli maabhà àng nɛ̀ ye: wò Pɔli maa à biin bhà le."
        },
        {
            "numero": 3,
            "texte": "Pɔli' wɩ̀ɩ̀ à nɛ̀ àle gi ye: Wɩ̀ɩ̀lʋʋ-bhààmɛ̀ɛ̀, mɛɛ kɛɛ le í yaa n gi-lìang zì mai-wùn' é Aatana-à tɔ́ng gi à-zàà tà, le i wɩɩ ye: wò n maa le? È tò' kwɛi, ke i leng yé tɔ́ng láà à sie' wo lɛ́ɛ. Aatana ké i lekini pe maa woà à-wùn gi."
        },
        {
            "numero": 4,
            "texte": "É à pe' kwɛi, le mɛ̂ɛ' wó nuu dɔɔ Pɔli maabhà láà wó wɩɩ' wo: I sɔ̂ɔn' woii loô Aatana-à yíkpáá-mɛ̀ɛ̀ kpáè gɔ̀n láà la o."
        },
        {
            "numero": 5,
            "texte": "Le Pɔli ye: N nɛànɛ́bò, máá nuu à gànnuà ma: yíkpáá-mɛ̀ɛ̀ kpáè' à gá le. Atoosiwo à bɛɛn ké zɛyèa Aatana-à sɛ́ikwɛ́ gi wo: Koo wʋʋ yóo peà ko wunlé-mɛ̀ɛ̀ nɛ̀."
        },
        {
            "numero": 6,
            "texte": "Ale' kɛɛii kwɛi láà, ke Pɔli ké à gànnu ye: mɛ̂ɛ' wó banyèa ké tà bhi láà, àng zɛngpé do ké Sadusiɛn-bòa, le àng pɛ́ɛ́n dini' Faliziɛn-bòa le. Ale kɛɛ le é e wʋʋ léwala', le é wɩɩ' ye: N nɛànɛ́bò, Faliziɛn gbe' n gá, le n lekini án Faliziɛn-a le. Yáán tò ga-mɛ̀ɛ̀bò zanayè gɔ̀n-wùn láà, wò n kúnyèa àle gi é le."
        },
        {
            "numero": 7,
            "texte": "É bo' àle peá kwɛi, línaa ké daa' Faliziɛn-bò ni Sadusiɛn-bò' nuu bhi àng finibhà, le bànkétà láà é pee' à gi le."
        },
        {
            "numero": 8,
            "texte": "Atoosiwo Sadusiɛn-bò ké wɩɩ wo: ga-mɛ̀ɛ̀bò zana-wùn àa bhe. Wo wɩɩ zí wo: Aatana-à kɩ́ɩ́labò, ni yínaabò lefie ke àa bhe. Kɛ́ le Faliziɛn-bò-le wò wɩɩ wo: à tó ké bhe le."
        },
        {
            "numero": 9,
            "texte": "Wó nùù ké gbègóà àle bhà gban`nggbanngle, le Aatana-à tɔ́ng dɔ-mɛ̀ɛ̀bò ye' wó Faliziɛn-bò pe gi láà àng kemò' wala', le wó sɔɔ' gbáláà kpókpóá wo: Ááoo! Kwáá wúnyóo kekekèke yeyèa mɛ̂ɛ é à bhà. Kɛ́ yínaa ke ɛ́ɛ́n Aatana-à kɩ́ɩ́la ke' ya nù liangzɛ à nɛ̀ yíiín lɛ́ɛ."
        },
        {
            "numero": 10,
            "texte": "Kɛ́ línaa láà é nùù lóà daa lesósó' woà à lé le. Kúmana' nuu súóà, ke wòo woo Pɔli zɛ do, le é à pe' ebhà sɔ́yabò nɛ̀ ye: Kà yɔɔ ke ká Pɔli sí mɛ̂ɛbò láà àng finibhà, ke ká ló nà à gá sɔ́ya-gbùnng gi."
        },
        {
            "numero": 11,
            "texte": "Wó bo' lóá à síi bhi, à pe gbɛi' yaa' láà, Gwilinɛ Kpáa ké yɔn' Pɔli maabhà, le é liangzɛ' à nɛ̀ ye: Bhè i zʋʋ gbaan, í n-wùn gɛingo' kɔɔ do' gi Zelizalɛm zé láà, à-lèè ké à bhà ke í zí à gɛingó à-kɔ̀ɔ̀ do láà àle gi Wɔlɔm leng bhà le. Pɔli zɛ-yàngbha"
        },
        {
            "numero": 12,
            "texte": "À tàalà yué' bhɔ', le Zuifu-bò' Pɔli zɛ-wùn yààkébhà kɛɛ', le wó wo kaiwo' wo: wo pɔɔn bhɛ̀lɛ̀' ɛ́ɛ́n wo yí mì', ke wóó Pɔli zɛ bhe, wúnsɛ̀ òo kɛɛà wo nɛ̀."
        },
        {
            "numero": 13,
            "texte": "Mɛ̂ɛ' wó wo ké gba' zʋʋá kwɛi láà, àng tó bànkétàyè ké nuu gieà bhaamɛ̀ɛ̀ kuà-yisɛ tà."
        },
        {
            "numero": 14,
            "texte": "Wó lo' yíkpáá-mɛ̀ɛ̀bòà wun-mɛ̀ɛ̀bò ni mɔaagbebò lià, le wó à pe' àng nɛ̀ wo: Kwéé ko kaiwo ko: bhɛlɛ-pɔ̀ɔ̀n-le do ke àa líe zin-ii ko biin bhà, ke kóó Pɔli-le zɛ bhe."
        },
        {
            "numero": 15,
            "texte": "Le àle' kwɛi, ka lekini kà mɔɔ à gi tò, ka ni Sanedɛnɛ tóá, ke ká à pe kúmana nɛ̀, ke è nu nà à gá ka zué. Ka lò', ká à pe ka: káà àbhà wún láà àle gisɔi ke wo le. È tò' kwɛi, ko leng kó mɔɔà à zɛá, ke òo waa ka zué bhe."
        },
        {
            "numero": 16,
            "texte": "Wó yàngbha' yaa' Pɔli bhà kwɛi láà, à lɔ́ɔ̀-loò ke' nuu bhi, à gbe ké à-wùn ma', le é lo' sɔ́ya-gbùnng gi, le é à pe' Pɔli nɛ̀ le."
        },
        {
            "numero": 17,
            "texte": "Pɔli ké to' le é kapitɛni do ke lee', le é wɩɩ' à nɛ̀ ye: Bhè dɔ gbáágbààa ke í ló minɛ́ é à dɔi kaà kúmana lià. E à pé ke é nâa ke kpɔ́ à nɛ̀."
        },
        {
            "numero": 18,
            "texte": "Kapitɛni láà é dàà à nɛ̀ liélé àle gi, le é lo' à dɔi àngbhà kúmana lià, le é à pe' à nɛ̀ ye: Pɔli' é kààso gi láà, àle n lee', le é bhàiwo' n zì ye: án nu minɛ́ é à dɔi i lià le. Ibhà nâawʋʋ ke ké à pé."
        },
        {
            "numero": 19,
            "texte": "Le kúmana' minɛ́ láà à kun' à kɔɔ bhà, le wó lo' wun dɔi piilɛ gi, le é à bhàgilawo' ye: Mɔ̀ng' à-wùn' i gɔ̀n, ke í à pe n nɛ̀ le?"
        },
        {
            "numero": 20,
            "texte": "Le minɛ́ ye: Zuifu-bò wʋʋ ké mɔɔyèa wo: wó à peà i nɛ̀, ke í nu nàa Pɔli-a Sanedɛnɛ zué tili. Wo à kɛɛà ye mɛ̂ɛ' à-wùn gimà sɛ̀a-lèè guoii à nɛ̀."
        },
        {
            "numero": 21,
            "texte": "Kɛ́ miá à zìdɔ, atoosiwo bhaamɛ̀ɛ̀ kpe' wò gie kuà-yisɛ tà, àng tó ké kpɔ̀ à gɔ̀n gbá gi-lèè guoii, le wa woo wo kaiwo, wo: wáá pɔɔn bhɛlɛii, sée wáá yí mi-ii, ke wóó Pɔli zɛ bhe le. Ale òo kɛ̀ɛ̀', lángga- wo kún. Kó dɔɔ' wo yáán é à gi é, wa woo wo tà tó kún. Wò wo yáán tóii ile i pe wɩ̀ɩ̀ à bhà-yè lengdo' gɔ̀n le."
        },
        {
            "numero": 22,
            "texte": "Minɛ́ láà é bo' à peá kwɛi, le kúmana' wʋʋ kpɔ' à bhà ye: Í wʋʋ' pe' n nɛ̀ láà, miá i biin gó à tà mɛngge nɛ̀. Pɔli bɔ̀ kúmana kpáè Felisi zué-kɔ̀ɔ̀"
        },
        {
            "numero": 23,
            "texte": "Minɛ́ láà é bo' góá bhi, le sɔ́yabòà kúmana' kapitɛni piilɛ lee', le é wɩɩ' àng nɛ̀ ye: Kà sɔ́yabò kàin piilɛ yaa ka-kɔ̀ɔ̀a, ninà sʋʋ tà-mɛ̀ɛ̀ kuà-saapiilɛ, ni dí bili-mɛ̀ɛ̀ kàin piilɛá, ke ká walá lɛlàdɔ gi, ke ká ló Sezalee."
        },
        {
            "numero": 24,
            "texte": "Kà sʋʋbò tó tàkún, ke ká ló ke ká waa nà Pɔli kélékèlèyèa kúmana kpáè Felisi zué bhi."
        },
        {
            "numero": 25,
            "texte": "Sɔ́yabòà kúmana ké sɛ́ikwɛ́ bɔ' àng tà kúmana kpáè láà à nɛ̀, le é wɩɩ' à gi ye:"
        },
        {
            "numero": 26,
            "texte": "Nle Kolodi Lizia nle án bhi le. Kúmana kpáè kólósɛ̀-mɛ̀ɛ̀ Felisi, má wɩ́ɩ́ i bhà, má wɩ́ɩ́ i bhà sɛ̀a."
        },
        {
            "numero": 27,
            "texte": "Mɛ̂ɛ é, Zuifu-bò' woo à kún, le wa woo bhɔ à zɛ lià le. Án wàà bhi àle téei nà sɔ́ya kpuluá, le án à la' àng gɔ̀n, ke má à ma wo: Wɔlɔm-mii' à gá le."
        },
        {
            "numero": 28,
            "texte": "Án lò- nàa à gá àngbhà Sanedɛnɛ zué àle gi, ma ke wó nuu à kún-à wún' gi, án à gɛin ma le."
        },
        {
            "numero": 29,
            "texte": "Án waa' bhi, nle án n pe' ye' à gi, àle ye: wò à wɛì àngbhà tɔ́ng kemò' wò à gbègo wo kiá láà àle-wùn gi le. Kɛ́ wúngge bhɛ́i ke àa à bhà, ke è tó à zɛ gɛɛn-á, ɛ́ɛ́n ke è tó lefienɛ́ wo à kùn-i-wùn-a."
        },
        {
            "numero": 30,
            "texte": "Án à mayè' gá wo: wa kpɔ́ à gɔ̀n gbá gi láàá, àle kɛɛ le án à ba4ɔii i lià gɛngdo le. An à peyèa àle gi à lɩ́ɩ́ kpɔ́ yóóbò nɛ̀ ma: wò zin ile i bhà à-wùn gi le."
        },
        {
            "numero": 31,
            "texte": "Sɔ́yabòà kúmana' à pe' àng nɛ̀ kɔɔ' gi, wó à kɛ̀ɛ̀ àle-kɔ̀i, le wó Pɔli si', le wó wala' nà à gá gbɛi gi, le wó lo', le wó waa' Antipati le."
        },
        {
            "numero": 32,
            "texte": "À tàalà' bhɔ', le wó sɛi' le wó nu' sɔ́ya-gbùnng gi Zelizalɛm le. Sʋʋ tà-mɛ̀ɛ̀bò lengdo' lo' Pɔli dɔi Sezalee le."
        },
        {
            "numero": 33,
            "texte": "Wó waa' bhi, le wó sɛ́ikwɛ́ láà à nu' kúmana kpáè nɛ̀, le wó Pɔli kɔ́nɔ́wo' à nɛ̀ le."
        },
        {
            "numero": 34,
            "texte": "Kúmana kpáè' bo' sɛ́ikwɛ́ gaaá, le é Pɔli gòi-lùu bhàgilawo' le."
        },
        {
            "numero": 35,
            "texte": "É à ma' ye: è gò Silisi sɛ́ɛ́ gi, le é wɩɩ' ye: Ka nà mɛ̂ɛ' àng gá ká ké bhà láà, wò wàà' zé, ke án nuu i bhàgilawoà. É bo' à peá kwɛi, le é wɩɩ' ye: wò ló Pɔli maakɛɛi Elɔdi' gwilinɛnɛ̀-gbùnng' dɔ' láà à gi le."
        }
    ]
}