{
    "livre": "actes",
    "chapitre": 28,
    "versets": [
        {
            "numero": 1,
            "texte": "Kó bo' woloá kélékèlèa kwɛi, le kó nuu à maà ko: yí zué-sɛ̀ɛ̀' kó waa' à tà láà, wo à lee Malite."
        },
        {
            "numero": 2,
            "texte": "Sɛ́ɛ́ láà à gi-mɛ̀ɛ̀bò wàa nuu Gɛlɛki-wʋ̀ʋ̀ pe-mɛ̀ɛ̀a. Kɛ́ wó wún liá suu' waa' ko gi é, à nààlé àa nuu bhe. La' nuu' wo' ban-à, ke níní ké waaii láà, wo pai lékun' kpáaá gɛ̀gɛ̀gɛ̀le, le wó konó páipái ko lee', ke kó yaa pai láà à bhà àng pé le."
        },
        {
            "numero": 3,
            "texte": "Pɔli' wóó kián gbɔ́ɔ́n ke si', ke è à ban pailé, le bhei do' wolo' wóó láà à gi pai-wàà nɛ̀, le é naa' à kɔɔ bhà le."
        },
        {
            "numero": 4,
            "texte": "Sɛ́ɛ́ láà à gi-mɛ̀ɛ̀bò' à gaa', ke mɛɛ ké dunyèa à kɔɔ bhà kwɛi, le wó à pe' wo ké nɛ̀ wo: Mɛ̂ɛàn é, e tóà yíiín mɛ̂ɛ zɛ-mɛ̀ɛ̀a mai lekinilèkiniá. Àle kɛɛ le é tuàn laà kɔ̀ɔ̀yí gɔ̀n dɛ́ɛ é à gá, le é tóii le Aatana-à lángga' zí à kún-ii, le yéè tó à ga-kɔ̀ɔ̀a é la wà!"
        },
        {
            "numero": 5,
            "texte": "Kɛ́ Pɔli' bo' kɔɔ vùù gieá, ke mɛɛ láà è dalá pailé, pɔnggepɔ̀ngge òo yúá à bhà àle zìpieta."
        },
        {
            "numero": 6,
            "texte": "Mɛ̂ɛbò láà wo nuu à gaaà wo: e fɔuà, ɛ́ɛ́n e káán-à à lé sáabhi, le è pɛlɛ, le è ga le. Kɛ́ à gi' mɔ' pingpingle, ke wò à gaa wo: pɔɔn yóo ke àa kɛɛii à gá, le àng wʋʋ' zí seela' wo: áatana gigáláyè ke' tóà à gá le."
        },
        {
            "numero": 7,
            "texte": "Wunmɛ̀ɛ̀' nuu sɛ́ɛ́ láà à gi, wo nuu à leeà Pubilu. Abhà gbúnng ké nuu pai yaa-lèè láà à maabhà kúlúá. Ale ko yago', le é ko-tɔ̀ɔ̀ kun' sɛ̀a yáángɛɛn yakaá le."
        },
        {
            "numero": 8,
            "texte": "É nuu kwɛi, ke Pubilu láà à nɛ ké sáalé, ke níní ké bɔii à bhà, ke tòòtôo ké à kɛɛii. Pɔli' lò- à lià àlei, le é e kɔɔ dɔ' à tà, le é à lébhàiwo' Aatana zì, le é à to' bhiá le."
        },
        {
            "numero": 9,
            "texte": "Kángwa-mɛ̀ɛ̀ paánbò' nuu sɛ́ɛ́ gi bhi, wó àle ma', àng tó' nu' wo' Pɔli lià, le wó to' bhiá le."
        },
        {
            "numero": 10,
            "texte": "A-wùn gi, wo bhɛɛ yaa' ko bhà miniminiyèa, le ko ló bha' bhɔ', wó zí ko gba' ko bhàwùn' nuu pɔɔn' bhà à tóá le. Pɔli wàà Wɔlɔm-yè"
        },
        {
            "numero": 11,
            "texte": "Kɛ́ mɛ̂ɛ yaka ké gie' ko bhà bhi, le kó nuu lóà le. Alesandili-mɛ̀ɛ̀bòà yítà-gɔ̀ɔ̀ ke' wó nuu à leeà Diɔkuli láà, ko lóyè' yàà àle gi le. Atoosiwo níní waa bha' giè- yítà-gɔ̀ɔ̀ láà àle bhà bhi le."
        },
        {
            "numero": 12,
            "texte": "Kó lo' kó waa' Silakuzi, le kó yáángɛɛn yaka kɛɛ' bhi le."
        },
        {
            "numero": 13,
            "texte": "Kó go' bhi, kó lo' yí kpúng pé dɔ́ɔ̀nle, le kó waa' Lezio le. Kó go' bhi zí à tàalà, ke wàà' è go yáìngiáán wia za láà, ya gie zì ke gó, kó yáángɛɛn piilɛ' kɛɛ', le kó to' le kó waa' Puzɔli le."
        },
        {
            "numero": 14,
            "texte": "Kó ko laànɛ́bò kemò ta' bhi, le wó bhàiwo' ko zì wo: kó dɔ gbáágbààa ke kó yáángɛɛn saapiilɛ kɛ̂ɛ wo lià bhi le. Kó bò- àle kɛɛá bhi, le kó nuu lóà Wɔlɔm le."
        },
        {
            "numero": 15,
            "texte": "Ale' kɛɛii kwɛi láà, ke ko laànɛ́bò yemò' Wɔlɔm bhi, wa woo ko tà-wùn ma. Wó nù- dɔi ko gɔ̀n zaá àle gi le. Ang kemò ké ko ta' lee' wò à lee Apiu-à Lóó Ténglé láà à gi, le àng kemò' nu' ko tai zí lee ye' wò à lee Wotɛli-Kwìì Yaka Dɔlé láà à gi le. Pɔli' àng ye', e Aatana wánglego', le à nii' daa' le."
        },
        {
            "numero": 16,
            "texte": "Kó waa' Wɔlɔm, sɔ́yabò wunlé-mɛ̀ɛ̀bò ké wɩɩ' à bhà, ke Pɔli- ló yaai e leng tà, kɛ́ ke à maabhà kɛɛ-sɔ̀ya' è tó à pé bhi, ke è ziàn e yáán tó à bhà le. Pɔli liangzɛ̀ Wɔlɔm-kɔ̀ɔ̀"
        },
        {
            "numero": 17,
            "texte": "Yáángɛɛn yaka' bo' gieá Pɔli wàà bhi-yè láà à zìpieta, le é Zuifu-bò' nuu Wɔlɔm bhi láà àngbhà mɛ̂ɛ tiàntiànlebò lee' le. Wó waa' à lià, le é wɩɩ' àng nɛ̀ ye: N nɛànɛ́bò, mɔ́ɔ́ wúngge kɛɛ koà lùu gi-mɛ̀ɛ̀bòa, sée koà lùu gbanbò', ko bhɛ́mabò' à yaa' láà, mɔ́ɔ́ à ke zɛ. Kɛ́ àle tó gi, wo n kun' Zelizalɛm, le wó n lénu' Wɔlɔm-mɛ̀ɛ̀bò nɛ̀ le."
        },
        {
            "numero": 18,
            "texte": "Wɔlɔm-mɛ̀ɛ̀bò láà wó bo' n bhàgila-le woá, kɔɔ gò n zì lɔ̀ɔ̀ ké nuu woo àng bhà, atoosiwo wún' è tóà mɛ̂ɛ zɛ̀ à bhà gɛɛn-á, wòo à do lefienɛ́ ye n bhà."
        },
        {
            "numero": 19,
            "texte": "Kɛ́ Zuifu-bò' wòo wɩ́ɩ́ à bhà ke wò wo kɔɔ gó n zì le. Ale kún-kɔ̀ɔ̀ bhɛ́i ke òo tó n yàan koo, le án wɩɩ' ma: wò n gba zaa gi, ke án nu gwilinɛ Sezaa zué zé le."
        },
        {
            "numero": 20,
            "texte": "Ale-wùn gi, le án ka lee', ke kó ké ye, ke án n nu gɛɛn pe ka nɛ̀ kwɛi le. Yàa àleá, mɔ́ɔ́ nu koà lùu gi-mɛ̀ɛ̀bò daai. Atoosiwo Izalae-bò tó páipái ko yáán' mɛ̂ɛ' à gɔ̀n láà, nle an yɔ̀ɔ́bhɛɛ lé àle-wùn gi é le."
        },
        {
            "numero": 21,
            "texte": "Pɔli' bo' à peá kwɛi, le Zuifu-bò láà wó wɩɩ' wo: Sɛ́ikwɛ́ kekekèke òo gó ko nɛ̀ Zudee lùu gi i-wùn gi, sée koó lùu gi-mii ke òo nu, ke è nâa kpɔ́, ɛ́ɛ́n ke è wúngge pe i bu bhà wúnyóoá."
        },
        {
            "numero": 22,
            "texte": "Kɛ́ i pe' i zʋʋ pé, kó à pé ke kó àle ma le. Atoosiwo kó à gànnu ko: ka pe zaawɛ́ɛ́ láà, wò à-wùn pe lee óó lee' gi, mɛnó- wo wunbílí mììmíí' wo le."
        },
        {
            "numero": 23,
            "texte": "Zuifu-bò' bo' à peá kwɛi, le wó yáángɛɛn bhɛ́i ke kpɔ' Pɔli nɛ̀ le. Mɛ̂ɛ' wó lo' à yalé kwɛpoo à gi, wo to' kpe kpáa lekinilèkiniá. E gie' àng nɛ̀ wún pé, le Aatana-à gwilinɛnɛ̀-wùn' kɔɔ' gi, é nuu lóà à tàpólóá àng nɛ̀ le. E nuu wún síà Moizi-à tɔ́ng-sɛ̀ikwɛ́ ni Aatana wʋʋ léban-mɛ̀ɛ̀bòà sɛ́ikwɛ́bò gi, le è Yesu-wùn pe àng nɛ̀, ke è nù àng zʋʋ kún le. É liangzɛ zi do' go' yué láà, e to' nàa kwɛi flúúlé, le yáánpa' bhɔ' le."
        },
        {
            "numero": 24,
            "texte": "É wún' pe' láà, e mɛnggoò zʋʋ kun', kɛ́ àng kemò-le kɔɔ ké to' wún gbègóyè bhà."
        },
        {
            "numero": 25,
            "texte": "É to' ye wóò káán ké bhà wún gbègóá kwɛi, le Pɔli' liang zɔ́ɔ́ dɔ' wʋʋnɛ́ é à tà, ye: Aatana Waa Zaazaa' liang' zɛ' ka nɛnù nɛ̀ à wʋʋ léban-mɛ̀ɛ̀ Ezai biinlé fɔ́ɔ́lé láà, à zɛ̀ kwɛi-lèè' nuu à gá à gɔ̀n le."
        },
        {
            "numero": 26,
            "texte": "E wɩɩ' ye: Aatana ké wɩɩ' e nɛ̀ ye: Bhè ló kaá lùu gi-mɛ̀ɛ̀bò láà àng lià, ke í à pe àng nɛ̀ ye: Ká n wʋʋ maà kpákpálé, kɛ́ káá à gimaii. Ká lɛgaaà kpákpálé, kɛ́ káá lɛngge yeii."
        },
        {
            "numero": 27,
            "texte": "Atoosiwo àng zowɛ́ɛ́' tó bhɔ́ɔ́bhɔ̀ɔ̀a ye nunu-gwɛ̀ɛ̀ nɛ̀. Wa wo tóló lé-tɩ̀ɩ̀ gbaan, ke wòo nù wún ma, le wa wo yán léta filingle, ke wòo nù lee ye le. Wo à kɛɛ kwɛi, ke wòo nù wún gima, ke àng zowɛ́ɛ́ òo nù seelá, ke mɔɔ nù àng tó kélékèlèa."
        },
        {
            "numero": 28,
            "texte": "Pɔli' bo' gieá Ezai' Aatana wʋʋ' pe' láà à gbóló gi kwɛi, le é wɩɩ' ye: N nɛànɛ́bò, à gàn- tó ka yàan tò ka: Aatana' n bɔ̀- ebhà nâa sɛ̀' mɛ̂ɛ- la à bhà láà à kpɔ́ lià mɛ̂ɛ' wàa Zuifu-a àngle tó nɛ̀ le. Sée àngle ké tóló dɔà n wʋʋ bhà. ["
        },
        {
            "numero": 29,
            "texte": "Pɔli' bo' wʋʋ láà àle peá kwɛi, Zuifu-bò tó' wo pe ló' wo' nà wo ké gbègóá gbanŋ̀gbanngle le.]"
        },
        {
            "numero": 30,
            "texte": "É go' àle gi, Pɔli ké kwee záázàà piilɛ kɛɛ', é kwíi' à saa go' láà à gi. Mɛ̂ɛ páipái' wó nuu nuà wɩ́ɩ́i à bhà, àng tó' nùù à taà bhi' wo le."
        },
        {
            "numero": 31,
            "texte": "E nuu Aatana-à gwilinɛnɛ̀-wùn gɛingóà mɛnómɛ̀nó nɛ̀, le é nuu bhaamɛ̀ɛ̀ dɔɔà Gwilinɛ Yesu Klisi-wùn-a le. E nuu à kɛɛà kwɛi e fɛ́ɛ gi, ke mɛnggeà wúngge àa à bhà. F1 + Wo wʋʋ do láà à seeláyèa Aatana-à sɛ́ikwɛ́ kemò gi wo: Wo bhàiwo' kiá do, wo: ... Kɛ́ é yaayèa kɔɔ ye' à gi tɛ́nglà zé, àle wʋʋ do láà à pe zíàa zaa bhɛ́ì kemòa sɛ́ikwɛ́ é à gi le. FE f1 É bo' zinnáá e kpóng gi, le é gbala' kpókpóá ye: Gwilinɛ Kpáa, bhè àng bhàwùn tó. Nâakpɔ́ 7:60 f2 Sɛ́ikwɛ́-wʋ̀ʋ̀' í à peii láà, í à gima è? Nâakpɔ́ 8:31 f3 Wo Sɔli yaa' káin gi, le wó à bɔ' tong tà tɛ́nglà le. Nâakpɔ́ 9:25 f4 Yítà-gɔ̀ɔ̀. Nâakpɔ́ 13:4 f5 Pɔli ni Sila ké nuu tɔ́ ban-à Aatana bhà kààso gi Filipe. Nâakpɔ́ 16:25 f6 Aatana ye' ka à lɔ̀ɔ̀ kɛɛ, ke káá à dɔn láà, an àle-wùn-nàà kpɔ́ii ka nɛ̀ le. Nâakpɔ́ 17:23 f7 Mɛ̂ɛ páipái' wó i pé yítà-gɔ̀ɔ̀ gi zé é, Aatana ké gɛ̀ilɛ tóà, le àng tó- la i-wùn gi le. Nâakpɔ́ 27:24"
        }
    ]
}