Actes 3

Piɛli ni Záàn ké nuu tɔnng-à kiá kwɛnggei Aatana-kwìle, ke wo lóii yáán seelá gi-bhài wo lià.

Aatana-kwìì kpóló-zààlé-lèè ye' wó nuu à leeà wo Kpóló Sɛ̀yè láà, wó waa' bhi, ke mɛngge' é bhɔ' gɛɛn banyèa, e yaa bhi. Wo nuu nuà nà mɛ̂ɛ láà à gá bhi lɛ́ile, le wò à yala, ke è nù gba lee ziàn mɛ̂ɛ' wò daaà Aatana-kwìle àng gɔ̀n.

É Piɛli ni Záàn ye', ke wóò daa kwíle, le é gbaan' kɔɔ kpɔ́à àng nɛ̀ le.

-5 Piɛli ni Záàn' wó dɔlɔ̀- àle gi, le wó à gaa' sɛ́inlé, le Piɛli' wɩɩ' à nɛ̀ ye: Bhè ko gaa bhee. É à pe' kwɛi, le mɛ̂ɛ láà é àng gaa' sɛ́inlé, ke e e zʋʋgɔɔn-ii ye: keèbhi è pɔngge sɔlɔà àng lé le.

Kɛ́ le Piɛli' à pe' à nɛ̀ ye: Wɛ́i àa n gɔ̀n, sánng àa n gɔ̀n. Kɛ́ pɔɔn' n gɔ̀n, máà àle nu i nɛ̀ le. Án à pe Yesu Klisi Nazalɛti-miià pe gi, án wɩɩ ma: í walá ke í táásí.

É à pe' kwɛi, le é à san' à kɔɔ sɛ̀ bhà, le é à léwala'. E to' sáabhi, le à gɛɛn ni à wɛ́ɛnnɛ́bò tó gi' polo', le é dɔ' gɛɛn bhà váàle, le é gbaan' táásíà le.

E sɔɔ' àng wɛì Aatana-kwìle, ke e táásí-ii, ke e bili-ii, ke e tɔ́ ban-ii Aatana bhà.

É nuu táásí' woà, ke e Aatana tɔ́ bhɔii láà, mɛnómɛ̀nó yáán ké nuu à bhà.

À gàn ké nuu zí àng yàan wo: mɛngdo láà àle nuu yaaà Aatana-kwìì Kpóló Sɛ̀yè lé, le é nuu gba leeà ziàn le. Ale kɛɛ le wún' kɛɛ' à nɛ̀ láà, à kɔ̀kún' àng tó kun' bháalé, le wó gbaan' màiwoà à bhà le. Piɛli ké liangzɛ' Aatana-kwìle Zelizalɛm

Mɛ̂ɛ láà àa nuu káán-à Piɛli ni Záàn bhà. Ale kɛɛ le mɛ̂ɛ' wó nuu bhi, ke wún láà à-mài' àng ni', àng tó páipái' gbulu', le wó nu' yèèèle àng lià Aatana-kwìì sáá dɔ̀ɔ̀lé ye' wò à lee Salomon-à Sáá láà à wala le.

Piɛli' àle-lèè ye' kwɛi, le é à pe' mɛ̂ɛbò láà àng nɛ̀ ye: Izalae-bò, mɛɛ kɛɛ le mɛ̂ɛ é à tò bhiá-wùn é à-mài- ka ni, le ka ko gaa kwɛi le? E ka gi ye: kole kó táásí-wàà daa' à gi ko lekini pe bháa bhà la è? Ɛ́ɛ́n e ka gi ye: è layèa koà táásì tɩnggbɩɩle Aatana-à zaa tà-wùn' gi la è?

Yàa kwɛi. Kɛ́ Aatana do' é ko bâa Ablam ni Izaaki ni Zakɔbu ni ko bhɛ́ma paánbò tóà Aatana-á, ke wó nuu à lɔ̀ɔ̀kɛɛà láà, àle e kɔlénu-mɛ̀ɛ̀ Yesu tɔ́ bhɔyèa é le. Yesu do' ká à lénu' pɔɔn nɛ̀, ke ká bo' à gá Pilati zué, kɛ́ ke Pilati-le ké woo à peii ye: wò à káán bhɛɛlé láà, an àle peii le.

Kɛ́ Aatana zòà-mɛ̀ɛ̀' é nuu wúnsɛ̀ kɛɛ-mɛ̀ɛ̀a kwɛi láà, ká ka bò- àleá, le ká bhaamɛ̀ɛ̀ zɛ-mɛ̀ɛ̀-le fìlayányè wo' à bhà, le ká wɩɩ' ka: wò wúnyóo kɛɛ-mɛ̀ɛ̀ láà àle yɔɔ ka nɛ̀ le.

Sée Gwilinɛ' é mɛ̂ɛ la-mɛ̀ɛ̀ kpáaá láà, ká àle zɛ' lɛ́ɛ. Kɛ́ à wunbílí òo nù tó à gi, Aatana ké à go' gɔɔ̀le, le é à zana' le. Kole kó à séeá le.

Sée wɛ̀i-mɛ̀ɛ̀' ka lekini ka à dɔn, ke ka yánwɛ́ɛ́' à bhà ziàn zé lɛ́ile é, bháa' é Yesu láà à gi, ni kpɔ̀ à lé-yè' à léwaláyèa le. Kpɔ̀ Yesu lé-yè láà àle mɛ̂ɛ é à tóyèa kélékèlè lekinilèkiniá, le kanó páipái ka yáán' à bhà é le.

À kɛ̀ɛ̀ kwɛiyè láà à gi, n laànɛ́bò, má à gànnu tò ma: ka ni kaà wunmɛ̀ɛ̀bò ká wún láà à kɛ̀ɛ̀ yáintíinɛ̀' bhà le.

Kɛ́ Aatana leng' wʋʋ' kpɔ' e wʋʋ léban-mɛ̀ɛ̀ tó páipái bhà lii ye: ebhà yaa-mɛ̀ɛ̀ Klisi ké wɛ̀ilèè yeà láà, è àle gi-wùn kɛɛyèa kwɛi lɛ́ɛ.

Le àle' kwɛi, kà ka kɔɔ gó ka sɔng lé, ke ká daa Aatana solong gi, ke è nù bɔ́n gó ka bhà.

Ka à kɛ̀ɛ̀' kwɛi, le wàà máimài' è góà Gwilinɛ Kpáa pé láà, è wi ka bhà, le è loo daa ka tà, le é mɛ̂ɛ' à yaayèa Izalae-bò ka la-mɛ̀ɛ̀a, ke é Yesu-á láà, è à bɔ ka nɛ̀ le.

Kɛ́ sée Yesu ké tuàn dɔlɔ́à líe lɔngwɛ́ɛ́ gi flúúlé, sánni pɔnó páipái dɛ́ɛ bhɔyè finibhà. Sée bha láà Aatana' woo à kpɔ́ liilììlii, le à wʋʋ léban-mɛ̀ɛ̀bò', é àng yaa' e tùbhà láà, àng biin' woo zin à bhà le.

Ale kɛɛ le Moizi' wɩɩ' ye: Ka nɛ Aatana Gwilinɛ ké e wʋʋ léban-mɛ̀ɛ̀ do ke gooà ka nɛ̀ ye n nɛ̀. A-mɛ̀ɛ̀ ké tóà ka nɛànɛ́ do keá. Aatana wʋʋ léban-mɛ̀ɛ̀' kwɛi láà, è wún óó wún' peà ka nɛ̀, ká ka tóló dɔ à tó bhà.

Kɛ́ mɛ̂ɛ óó mɛ̂ɛ' òo tóló dɔ àle wʋʋ bhà, wò à-mɛ̀ɛ̀ pe káán' woà Izalae-bò bhà, le à dɔ̀lèè àa tó àng bhɛɛ gi koo le.

É go' Moizi gi, mɛ̂ɛ páipái' wó nuu Aatana wʋʋ léban-à dɔ̀ya, é zigo' Samiɛ tà, ke wò bhɛɛ dɔ dɔ́ɔ̀nle, àng tó ké zí pɔnó páipái dɛ́ɛ kɛɛ bha do láà à-wùn pe'.

Sée Aatana' píní' wo' e wʋʋ léban-mɛ̀ɛ̀bò nɛ̀ kwɛi lii láà, kale ká à gi-wùn kɛ̀ɛ̀ à nɛ̀-mɛ̀ɛ̀a le. È gò' bhi, Aatana ké zí wɩɩ' Ablam nɛ̀ ye: An bɔà i ginɛ́' à tà, le an lúbhawo kwíilé-yɛ̀ɛ̀bò' lúyáán tà à tó páipái bhà le. Aatana' mɛ̀ɛ̀nɛ̀' daa' àle ni ka bhɛ́mabò finibhà kwɛi láà, à gi-lùbha- zí ka lekini' ka peá le.

A-wùn gi, Aatana' bo' e kɔlé-mɛ̀ɛ̀ Yesu láà à gooá, é à bɔ̀- kale fɔ́ɔ́lé' ka nɛ̀, ke è kanó ka wɛ̂ɛ sí wúnyóo kɛɛ-zàà pé dolodolo, ke lúbha láà è nù ka kún le.