{
    "livre": "apocalypse",
    "chapitre": 10,
    "versets": [
        {
            "numero": 1,
            "texte": "É go' bhi, máà lɛgaa ke Aatana-à kɩ́ɩ́la kpáa bhɛ́i do ke ké góii lɔngwɛ́ɛ́ gi, ke e yɔɔii. Loo ké nuu kɔnɔyèa à zì, le mɛ̂ɛɛsànnggbe' nuu káányèa à wun zì le. È gò' bhi, à wɛí-lèè zán ké nuu ye yáán zán nɛ̀, le à gɛɛnbò' nuu ye painɛ̂ɛ' è goo ke è mànàngmànàng go ziàn kɔɔ' gi láà à nɛ̀ le."
        },
        {
            "numero": 2,
            "texte": "Sɛ́ikwɛ́ kélénɛ́ ke ké nuu lépólóyèa à kɔlé. É zinna', le é e gɛɛn sɛ̀ gbaan' kɔ̀ɔ̀yí tà, le é e gɛɛn kpáná gbaan' sɛ́ɛ́ tà,"
        },
        {
            "numero": 3,
            "texte": "le é gbala' kpókpóá, le à wʋʋ' bhɔ' yaa wʋʋ bhà le. É gbálá' wo' láà, le la' zí to', le é à lékun' à gɔ̀n, le é wɩɩ' à tà gɛnyààn saapiilɛá le."
        },
        {
            "numero": 4,
            "texte": "La' bo' wɩ́ɩ́á à tà kwɛi gɛnyààn saapiilɛá, é wʋʋ' pe' láà, máà woo à bɛɛnzɛ. Kɛ́ le wʋʋ ke' go' lɔngwɛ́ɛ́ gi, le é daa' n tóló gi ye: La' wɩɩ' à tà gɛnyààn saapiilɛá, é wúnbò' pe' láà, àle è tó i gwílé' wo le. Miá à bɛɛnzɛ."
        },
        {
            "numero": 5,
            "texte": "Án bo' wʋʋ láà à maá kwɛi, le Aatana-à kɩ́ɩ́la do' án à ye' ke e dɔɔ kɔ̀ɔ̀yí ni sɛ́ɛ́ tà láà, é e kɔɔ sɛ̀ dɔ' lɔngwɛ́ɛ́á,"
        },
        {
            "numero": 6,
            "texte": "le é e kaiwo' ye: Aatana' é bhe lɛ́ile, ke é lɔngwɛ́ɛ́ ni à gi-pɔ̀ɔ̀nbò daa', ke é sɛ́ɛ́ ni à tà-pɔ̀ɔ̀nbò daa', ke é zí kɔ̀ɔ̀yí ni à wɛ́ɛ́-pɔ̀ɔ̀nbò tó daa' láà, an à zɛ̀ àle nɛ̀ le."
        },
        {
            "numero": 7,
            "texte": "Án wɩɩ ma: wúnbò' é nuu Aatana zʋʋ pé, ke é à to' liélé, ke é à tàpolo' à wʋʋ léban-mɛ̀ɛ̀bò' nuu àbhà gùábòa lii àng nɛ̀ láà, à wun bàn péng bha' bhɔ tó wo. A-wùn gi, Aatana àa tuàn lóó dɛ́ɛ ke kpɔ́à lúyáán tà-mɛ̀ɛ̀bò nɛ̀ koo. Kɛ́ àbhà kɩ́ɩ́labò láà àng saapiilɛnàà wɩ́ɩ́-kwèèi- bhɔà tée' gi, ke yéè walá, ke è e pe túnú pie laá, wún' nuu Aatana zʋʋ pé láà, è à kɛɛ' wo do le."
        },
        {
            "numero": 8,
            "texte": "Kɩ́ɩ́la láà é bo' à peá kwɛi, le wʋʋ do' go' lɔngwɛ́ɛ́ gi, ke án à ma' fɔ́ɔ́lé láà, à ke' daa dɛ́ɛ wo' zí n tóló gi ye: Aatana-à kɩ́ɩ́la' é dɔɔ sɛ́ɛ́ ni kɔ̀ɔ̀yí tà, bhè ló sɛ́ikwɛ́' é lépólóyèa à kɔlé láà à síi."
        },
        {
            "numero": 9,
            "texte": "É à pe' kwɛi, le án yɔn' Aatana-à kɩ́ɩ́la láà à gi, le án wɩɩ' à nɛ̀ ma: Bhè dɔ gbáágbààa ke í n gba sɛ́ikwɛ́ pɩ́ɩ́nɛ́ láà à gá. Le é wɩɩ' ye: À sí ke í à bhɛlɛ. E tóà nɛ́ɛ́nɛ̀ɛ̀a ye zɔ́ɔ́ yɔ́ɔ́n nɛ̀ i líílé-le bhà, kɛ́ i à tò kpáinkpàin-a-lèè yeà i gwílé' wo le."
        },
        {
            "numero": 10,
            "texte": "Án sɛ́ikwɛ́nɛ́ láà à si' Aatana-à kɩ́ɩ́la kɔlé, le án à bhɛlɛ' le. E nuu nɛ́ɛ́nɛ̀ɛ̀a n líílé-le bhà ye zɔ́ɔ́ yɔ́ɔ́n nɛ̀. Kɛ́ án bo' à máiá, le án à tò kpáinkpàin-a-lèè ye' n gwílé-za le."
        },
        {
            "numero": 11,
            "texte": "Ale' bo' kɛɛá kwɛi, le wó à pe' n nɛ̀ wo: à-lèè ké à bhà ke án Aatana wʋʋ léban dɛ́ɛ ke wo lùu kpe kpáa, ni bhaamɛ̀ɛ̀ suubò' àng tó ni pe wʋʋ' pɛipɛi, ni gwilinɛbò tó bhà le."
        }
    ]
}