Apocalypse 13

É go' bhi, máà lɛgaa ke wii làbhaiyè ke ké woloii kɔ̀ɔ̀yí bhà. Wii láà à sele ké nuu buu, le à wunbílí' nuu saapiilɛ le. Gbòlòfáan ké nuu à sele buu láà à tó bhà dolodolo, le Aatana bhàfángwo-tɔ̀bò' nuu bɛɛnzɛyèa à wunbílíbò láà à tó bhà dɔ́ɔ̀nle le.

Án wii' ye' láà, e nuu bhɔà lòngyokpáa bhà, à gɛɛnbò ké nuu ye nímai gɛɛn nɛ̀, le à biin' nuu ye yaa biin nɛ̀ le. Gbànggulula-yìbha' nuu láà e bháa daa' wii láà à gi, le é à gba' dɔ̀lèè kpáaá, le é ebhà mɛ̂ɛnɛ̀ tó kɔ́nɔ́wo' à nɛ̀ le.

Máà n káá' wo, ke wii láà à wunbílí do ke ké ye pɔɔn' bhɛ' kpɔ́ à bhà, ke a bhɔ ga lià à nɛ̀. Kɛ́ máà zí n káá' wo ke bhɛ láà ya ga. Ale' bo' kɛɛá kwɛi, wii láà à liá' waa' wo' lúyáán tà-mɛ̀ɛ̀bò tó páipái gi, le wó dɔ' à wɛì le.

Mɛnó páipái' zí zinná' wo' wo kpóng gi yìbha láà à nɛ̀, é dɔ̀lèè' nu' làbhai-wìì nɛ̀ láà à-wùn gi le. É go' bhi, le wó zí zinna' wo kpóng gi wii láà à lekini nɛ̀, le wó nuu wɩ́ɩ́à wo: Wáa ye kábháko é à nɛ̀, ke è mɔɔà dɔá à gɔ̀n gwili-yàn gi le?

Wii láà à biin ké nuu Aatana bhàfángwo-wʋ̀ʋ̀bò ni e leng butolo-wʋ̀ʋ̀bò peà. Kɛ́ Aatana lekini' à to' bhi, ke è nù wʋʋbò láà à pe kwɛi mɛ̂ɛ kuà-yisɛ-ni-wɛ́ɛ́-piilɛá le.

À kɛ̀ɛ̀ kwɛiyè láà à gi, e e biin lépolo', le é gbaan' Aatana bhàfángwoà, ke e à tɔ́ sieii, ke e à yàlèè bhàsaaii, ke e zí mɛ̂ɛ' wó à pé lɔngwɛ́ɛ́ gi láà àng tó maaii biin gi do le.

È gò' àle gi, Aatana ké e kɔɔ go' à zì, ke è nù gwili daa Yesu pe gi-mɛ̀ɛ̀bò tà, ke è gie àng gɔ̀n. E zí e kɔɔ go' à zì, ke è yaa sííya tó páipái ni lùu tó páipái ni bhaamɛ̀ɛ̀ suu páipái' àng tó ni pe wʋʋ' pɛipɛi láà àng tó wunlé.

Sée lúyáán tà-mɛ̀ɛ̀ tó páipái ké kpóng gi yɛ́ɛ́à à nɛ̀, le wò à lɔ̀ɔ̀kɛɛ le. Wó Bháánɛ́' à yuɛn kpɔ' láà, mɛ̂ɛ yemò' wò la à sáà gi, àngle lengdo wàa zinnáii à nɛ̀ wo kpóng gi le. Sée é si' lúyáán daayè bhà liilììlii, mɛ̂ɛ' wò la kwɛi láà, àng tɔ́ ké yaayèa Bháánɛ́-à sɛ́ikwɛ́ gi.

Wún gima-tòlòkwɛ́- tóà mɛ̂ɛ' à wun bhà, è à ma.

Lò kààso gi' mɛ̂ɛ' à bhà, e lóà kààso gi. Zɛ̀ pielé' mɛ̂ɛ' à bhà, wo à zɛà pielé. Yesu pe gi-mɛ̀ɛ̀bò- à-wùn kún-à kpókpóá tée leng' gi, ke àng kpɔ́yè- tóà Aatana lé kelekelele, àle lɛ́ɛ.

É go' àle gi, máà zí lɛgaa ke wii bhɛ́i ke ké woloii sɛ́ɛ́ gi. À sele ké nuu piilɛ, le à tó' nuu ye bháánɛ́ sele nɛ̀ le. Kɛ́ e nuu wɩ́ɩ́à ye gɔɔ̀-mìɔn ke nɛ̀.

Wii fɔ́ɔ́yè' nuu mɔɔà wún óó wún' bhà, wii piilɛnàà leng' zí nùù mɔɔà àle bhà, le é nuu à kɛɛà à fɔ́ɔ́yè yànmai gi le. Ale nuu zí à kɛɛà, le lúyáán tó páipái' nuu zinnáà wo kpóng gi wii fɔ́ɔ́yè láà à nɛ̀ le. Atoosiwo bhɛ kpáa' nuu à bhà, ke yéè woo à zɛ láà, ya woo tó bhiá.

Wii piilɛnàà láà é nuu zí sɔ́n kpákpaabò kɛɛ suu' woà é, è nù yɔ́n bhi, ke e pai go lɔngwɛ́ɛ́ gi, le è à banna sáalé bhaamɛ̀ɛ̀bò yàànlé le.

Sée sɔ́n-wùnbò láà à kɛɛ sé' nuu à nɛ̀, le é nuu à kɛɛà wii fɔ́ɔ́yè yànmai gi, le é nuu lúyáán tà-mɛ̀ɛ̀bò wunbílí gisieà à gá kwɛi, le é nuu à peà àng nɛ̀ ye: Wó wii fɔ́ɔ́yè' à lááma yaa' siàng-wɛ́ɛ́á, kɛ́ ke é nu' tói bhiá láà, wò à nai dɔ le. Sée Aatana' à to' bhi kwɛi, le é nuu sɔ́n-wùnbò láà à kɛɛà le.

Wó à nai' dɔ' láà, tɛ́i-wàà dàà à gi sé ké nuu zí wii piilɛnàà láà à nɛ̀, é kɛ̂ɛ kwɛi ke wii nai láà è nù wɩ́ɩ́, ke mɛ̂ɛ óó mɛ̂ɛ' òo wɩ́ɩ́ yàà e kpóng gi-wùn bhà à nɛ̀, è à kɛ̂ɛ ke wò à-mɛ̀ɛ̀ zɛ.

È gò' àle gi zí, lúyáán tà-mɛ̀ɛ̀ tó páipái' è si náò bhà ke è zin nàa mɛ̂ɛkpáò bhà, è si wɛ̀i-mɛ̀ɛ̀bò bhà ke è zin nàa wélé-mɛ̀ɛ̀bò bhà, è zí si nuabò bhà, ke è zin nàa mɛ̂ɛ' wó wo leng tà láà àng bhà, wii do láà àle nuu à kɛɛà, le wó nuu kɛ́ɛ kpɔ́à àng tó páipái bhà le. Ang kemò pe ké nuu àng kɔɔ sɛ̀ tà, le àng kemò pe' nuu àng kpòng bhà le.

À kɛ̀ɛ̀ kwɛiyè láà à gi, kɛ́ɛ láà àle àa nuu kpɔ́yèa mɛ̂ɛ óó mɛ̂ɛ ye' à bhà, àle-mɛ̀ɛ̀ àa nuu mɔɔà pɔngge lɔ́á, sée àa nuu zí mɔɔà pɔngge lóódɔá. Sée kɛ́ɛ' wó nuu à kpɔ́à bhaamɛ̀ɛ̀bò bhà láà, àle nuu wii láà à tɔ́ lengá ɛ́ɛ́n à tɔ́ bɛɛn nímolo-bòa le.

Mɛ̂ɛ bhàwùn' dɔ̀n wún gòkéigóá-yè bhà tée leng' gi, àle lɛ́ɛ. A-wùn gi, mɛ̂ɛ' è tóà gwílé dɔlɔ́-mɛ̀ɛ̀a, à-mɛ̀ɛ̀- wii láà à tɔ́ nímolo yàki yaa, atoosiwo bhaamɛ̀ɛ̀ do ke tɔ́ nímolo' à gá le. E kàin saado-ni-kɔɔ-saado-ni-wɛ́ɛ́-saado.