Apocalypse 16
1
É go' àle gi, máà n tóló dɔ ke wʋʋ kpókpó ke ké zí góii Aatana-kwìì láà à gi, ke e wɩ́ɩ́ii àbhà kɩ́ɩ́la saapiilɛ láà àng nɛ̀ ye: Kà ló Aatana-à bhɔlɔ-gbɔ̀nɛ́ saapiilɛ láà à gi-pɔ̀ɔ̀nbò wɛin-i sɛ́ɛ́ tà tò!
2
É à pe' kwɛi, le Aatana-à kɩ́ɩ́la fɔ́ɔ́yè' e pe gbɔnɛ́ gi-pɔ̀ɔ̀n wɛin' sɛ́ɛ́ tà le. É bo', le wii làbhaiyè' nuu láà àbhà kɛ́ɛ' nuu kpɔ́yèa mɛ̂ɛ páipái' àng bhà, ke wó nuu zinnáà wo kpóng gi à nai nɛ̀ láà, le lùùlɛɛ yúáyúáyè' dɔ' àng tó bhà le.
3
Kɩ́ɩ́la piilɛnàà' e pe gbɔnɛ́ gi-pɔ̀ɔ̀n wɛin' kɔ̀ɔ̀yí tà, le kɔ̀ɔ̀yí' to' ye wa mɛ̂ɛ' zɛ à yuɛn nɛ̀, le yáán-pɔ̀ɔ̀n ye óó ye' nuu à wɛ́ɛ́, à tó' ga' kìlìsáálé do le.
4
Kɩ́ɩ́la yakanàà' e pe gbɔnɛ́ gi-pɔ̀ɔ̀n ke wɛin' guanbò bhà, le é à ke wɛin' yíwun bhɔlé-lèèbò bhà, le yíbò láà à tó' zí gala' yuɛn-á le.
5
Máà n tóló dɔ ke Aatana-à kɩ́ɩ́la ye' é yaayèa yíbò wunlé láà, e wɩ́ɩ́ii ye: Aatana, ile-mii' í nuu bhe lii, ke í zí tuàn bhe tenglé, ke wúnyóo àa zin i bhà, ke í záázààa láà, í wúnbò' kpɔ' bhaamɛ̀ɛ̀bò tà láà, í àle tó kɛ̀ɛ̀ à kɛɛ-lèè' bhà le.
6
Atoosiwo mɛ̂ɛbò' wó ibhà zaa tà-mɛ̀ɛ̀bò ni i wʋʋ léban-mɛ̀ɛ̀bò yuɛn kpɔ' láà, i leng i zí yuɛn kpɔ́yèa àngle gɔ̀n, ke wò à mi é le. Sée wó àle-lèè guo lekinilèkini' wo' le.
7
É bo' à peá kwɛi, máà n káá' wo ke sáà gò à tà-gwɛ̀góló ké wɩ́ɩ́ii ye: E kwɛi maiá, Aatana Gwilinɛ, ile-mii' i kwìì à bhà-wùn àa bhe, í wún' kpɔ́ii bhaamɛ̀ɛ̀bò tà láà, à kpɔ̀ àng tà-lèè' à gá, le mai' zí i pé à tó-wùn gi le.
8
Kɩ́ɩ́la yisɛnàà' e pe gbɔnɛ́ gi-pɔ̀ɔ̀n wɛin' yáán bhà, le yáán' gbaan' yúáà bhaamɛ̀ɛ̀bò bhà wʋʋʋle ye pai nɛ̀ le.
9
À yúáyè láà e bhaamɛ̀ɛ̀bò dolo gi-dòlò wo. Kɛ́ àle tó gi, wòo wɩ́ɩ́ à bhà ke wò wo kɔɔ gó wo sɔng lé, ke wò Aatana tɔ́ bhɔ. Wánglafila, Aatana do' nàni gò mɛ̂ɛ bhà sé' à nɛ̀, ɛ́ɛ́n ke nàni yàà mɛ̂ɛ lé sé' zí à nɛ̀ láà, wo sɔ̂ɔn lefienɛ́' wo' à gɔ̀n le.
10
-11 Kɩ́ɩ́la solunàà' e pe gbɔnɛ́ gi-pɔ̀ɔ̀n wɛin' wii làbhaiyè láà àbhà mɛ̂ɛnɛ̀-gbòlò tà, le lɛi' tala' tíiá bìlìbìlìle é nuu e pe lùu' wunlé à tó tà le. À kɛ̀ɛ̀ kwɛiyè láà à gi, pɔɔn' nuu yúá' woà bhaamɛ̀ɛ̀bò bhà miniminiyèa, ke lùùlɛɛbò ké dɔyèa àng bhà láà, è nù yɔ́n bhi ke àng sóó ké nuu àng nɛɛ́ɛ́ zɛà, le wó nuu sɔ̂ɔnwoà Aatana' é lɔngwɛ́ɛ́ gi láà à gɔ̀n à tó-wùn gi le. Kɛ́ àle tó gi, wòo wɩ́ɩ́ à bhà gbonggbongle, ke wò wo kɔɔ gó wo kɛɛ-wùn yóyoobò zì.
12
Kɩ́ɩ́la saadonàà' e pe gbɔnɛ́ gi-pɔ̀ɔ̀n wɛin' guan kpáa' wò à lee Efalati láà à bhà, le é to' sáabhi, le é bhei', le zaa' lépolo' gwilinɛbò' àng gò yáánwoloá-wùn' nuu bhe láà àng gɔ̀n le.
13
Máà lɛgaa ke yínaa yóyoobò yaka' wó nuu ye dɔ́ɔ́bò nɛ̀, wo woloii gbànggulula-yìbha láà oo, ni wii làbhaiyè láà oo, ni à pe wʋʋ léban-mɛ̀ɛ̀' é nuu Aatana wʋʋ kuan-à láà àng líílé dolodolo.
14
Yínaa yóyoobò' wó kwɛi láà, àngle sɔ́n-wùnbò kɛɛ, le wò lo gwilinɛbò' wó lúyáán tà àng tó pé, le wò àng ban ké tà, ke wò ló gwili bhà le. Sée wò lóà gwili láà à gɔn-i kwee do' gi láà, àle tóà Aatana' à kwìì à bhà-wùn àa bhe láà àbhà lee kpáa kpɔɔ-kwèèiá, le è ebhà kpókpónɛ̀-yààn wolo le.
15
Atoosiwo Gwilinɛ Kpáa- wɩ̀ɩ̀ yáángɛɛn láà àle-wùn gi ye: ká ka yáán tó bhi, án nuà ye kuan-mɛ̀ɛ̀' nu le. A-wùn gi, mɛ̂ɛ óó mɛ̂ɛ' i yaaà i zʋʋá, ke i i bubhà-gbààbò kún-à sɛ̀a, ke yóó táásí i kpáán-á, ke yɛ́ɛ òo nù dɔ i bhà laá, ke i-mɛ̀ɛ̀ pe ké sɛ̀a.
16
Wó gwilinɛbò ban' ké tà lee' gi láà, wo à lee Ebɛlɛ-wʋ̀ʋ̀ gi wo: Aamagɛdon.
17
Kɩ́ɩ́la saapiilɛnàà ké e pe gbɔnɛ́ gi-pɔ̀ɔ̀n wɛin' váàle sɛ́ɛ́ ni lɔngwɛ́ɛ́ finibhà. Máà n tóló dɔ ke wʋʋ kpókpó ke ké góii Aatana-kwìì láà à gi gbòlò kpáè lià, ke e wɩ́ɩ́ii ye: À pe' bo tò!
18
Ale' kɛɛii kwɛi láà, ke la ké pàipài góii, ke e gbáláii, ke wɔɔɔle ké wɩ́ɩ́ii, ke sɛ́ɛ́ ké viin-ii. Sée sɛ́ɛ́ viinyè láà é nuu miniminiyè suu' gá láà, é si' bhaamɛ̀ɛ̀ dàà sɛ́ɛ́ tà-yè bhà ke è zin tenglé bhà, à sínma òo woo kɛɛ fɔ́ɔ́lé lii do bhe.
19
À kɛ̀ɛ̀ kwɛiyè láà à gi, pɛ́ɛ kpáalàkpàà' wò lee Babiloni láà e pee' à gi yaka, le lùu tó páipái pe pɛ́ɛ kpákpaabò tó' wi' kpulungkpulungle le. Aatana zʋʋ' zànà- kwɛi' wo Babiloni' wò à lee gɔ̀ɔ̀-pɛ̀ɛ̀ láà à sɔngbòa, le é dolo' à bhà, le wún' à kɔɔn lí àa sɛ̀a, é à kpɔ' à tà le.
20
É go' àle gi, sɛ́ɛ́bò' yí zué láà àng tó páipái' gó' wo' wo dɔ̀lèè bhà, le wó lo' bàlàa, le tɔɔnbò tó' lèèni' le.
21
É go' bhi, máiwɛ́ɛ́ kpùlù miniminiyèbò ké nuu góà lɔngwɛ́ɛ́ gi, le è dala bhaamɛ̀ɛ̀bò tà le. Sée máiwɛ́ɛ́ kpùlùbò láà wo nuu ye gwɛbílíbò nɛ̀, le à kemò' nuu kílo kuà-yisɛ yɔ̀ɔ̀nsínmaá le. À kɛ̀ɛ̀ kwɛiyè láà à gi, nàni' yaa' bhaamɛ̀ɛ̀bò lé máiwɛ́ɛ́ kpùlù kpákpaabò bannà àng tà-yèa, ke é nuu yúáà àng bhà miniminiyèa láà, wo nuu sɔ̂ɔnwoà Aatana gɔ̀n à-wùn gi.