Apocalypse 18

Máà lɛgaa àle zìpieta, ke Aatana-à kɩ́ɩ́la bhɛ́i ke ké góii lɔngwɛ́ɛ́ gi, ke e yɔɔii. À bháa ké nuu kpókpóá, le àbhà mɛ̂ɛnɛ̀ zán' mɔ̀ng maa' sɛ́ɛ́ tà lɛnói bolongle le.

E gbala' kpókpóá ye: Àaò, Babiloni-pɛ̀ɛ̀ kpáa láà ya wí tùlùkpɛ́tùlùkpɛ́lé tò! Tenglé-yààn é à gi, ya tó yínaabò yàlèèa, ya tó yínaa suu yóyoobò tó bànàkpɔ́-léá, ya tó tàsala-màà' à liá àa mɛngge gi láà à suu tó páipái kwêe dɔ-léá.

Pɔɔn- àle kɛɛ kwɛi, àle ye: e nuu ebhà yáindɔ-wɩ̀ɩ̀ kákáyè láà à kpɔ́à lúyáán tó páipái gɔ̀n, le gwilinɛbò' sɛ́ɛ́ tà, àng tó páipái' wo gɛɛn daayèa zùàkɛɛyè yí bhà à pé, le lóódɔ-mɛ̀ɛ̀bò' wó lúyáán tà, àng tó' zi gbaan' àbhà wélé-yààn woloyè láà à gi, le àng leng' zí to' wélé-mɛ̀ɛ̀a à pé le.

Máà zí n tóló dɔ ke wʋʋ bhɛ́i ke' gó lɔngwɛ́ɛ́ gi, le é daa' n tóló gi ye: Mɛ̂ɛ páipái' ká n pe lùuá, kà gó pɛ́ɛ láà à yáànbhà, ke àbhà wúnyóo yí òo nù bhɔ ka bhà, ke wún' è kpɔ́à à tà láà, káó nù ka pe ye à bhà.

Atoosiwo é wúnyóyoobò' kɛɛ' láà, à ting' tó kpáaá, le ya zin lɔngwɛ́ɛ́ bhà, le Aatana zʋʋ' zana à tó-wùn-a le.

Máà dɔ ke wʋʋ do láà à ke' zí daa n tóló gi ye: É wúnbò' kɛɛ' láà, kà à tó-kpàn gó à gɔ̀n, ke ká à sínma kpɔ́ à tà gɛnyààn piilɛá. É nuu wɩ̂ɩ daaà gbɔnɛ́' gi bhaamɛ̀ɛ̀bò nɛ̀ láà, kà à daa à leng nɛ̀ à gi gɛnyààn piilɛá.

É nuu tɔ́ kún-à, ni é nuu wélé-yààn kɛɛà naa' tà láà, kà à wɛ̀ikɛ̀ɛ̀wo, ke è giinná àle-nàà tà le. Atoosiwo e nuu à peà e zʋʋ pé ye: án yaa zé ye gwilinɛ-nɔ̀ng nɛ̀, máá gɛɛn-nɔ̀ngá. Ga àa bhɔii n bhà gbonggbongle.

É à pe' wo' kwɛi láà à-wùn gi, nànibò láà à tó ké yaaà à lé yáángɛɛn do-kini-dòa. Ga ké bhɔà à bhà, le è yaa ga-sùà tà, le vɔ́n- daa à pé, le pai- à bhɛlɛ le. Wò à-lèè yeà àle bhà wo: Aatana Gwilinɛ' è wún kpɔ́à à tà láà, e kpókpó lenglèngá le.

À kɛ̀ɛ̀ kwɛiyè láà à gi, lúyáán tà-gwìlìnɛbò' wó wo gɛɛn daa' zùàkɛɛyè yí bhà, ke wó zí wélé-yààn kɛɛ' zùà-nɔ̀ngnɛ́ pé láà, pai' è tóà zùà-pɛ̀ɛ̀ láà à lé, wo à gbɛ́ɛ́n yeà, le wò wosi, le wò giinna à-wùn gi le.

Wún kpókpó' è kpɔ́à pɛ́ɛ láà à tà, wò à-lèè yè', súó ké daaà àng gi, le wò dɔ à bhà dɔ́ɔ́n-á, le wò wɩɩ wo: Iiiá, íi mɛɛ̀ɛ̀! Babiloni-pɛ̀ɛ̀' í nuu pɛ́ɛ kpáalàkpààa, ke í nuu tiàànle láà, wún- kpɔ́yèa ile i tà yáán zán dini tà kwɛi la è!

Lóó dɔ-mɛ̀ɛ̀bò' wó lúyáán tà, àng tó ké zí wosíà, le wò ga-yàà wo à-wùn gi le. Atoosiwo mɛngge àa àngbhà lóó gbá ke lɔ́ii koo.

Lóó-pɔ̀ɔ̀nbò' nuu àng tà, àle ye: sánng-wɛ́ɛ́ ni wɛ́ipúúwɛ́ɛ́bò, gwɛɛ wùndɔ̀yóoá ni zɔ̀lɔ̀wɛ́ɛ́ sɛ̀sɛ̀bò, wéléwɛ́ɛ́ ni gbáán bháibò, gálasi ni bánnai tɛ́ɛ́n-wèlèbò, yílíbò' à fii' sɛ̀sɛ̀bòa à suu tó páipái, ni pɔɔn sɛ̀sɛ̀bò' wó à kɛɛyèa sóaa sóóá, ni à yemò' yílí wùndɔ́yóoábòa, ni à yemò' dìánwɛ́ɛ́bòa, ni à yemò' pɛɛ́ɛ́á ninà à yemò' kánnggwɛɛ kpókpóbòa.

È gò' àle gi, sɔ́ɔ́nwɛ́ɛ́bò ni zɛ́in-lé-pɔ̀ɔ̀nbò, làsikɔlɔ ni làsikɔlɔ yɔ́ɔ́n' wò à lee Miili, ni dɔ̀ pailé-làsikɔlɔbò. È gò' zí àle gi, dɔ̀lɔ̀ng ni yɔ́ɔ́nbò, búlù bii ni miniwɛ́ɛ́bò, dîli ni bháábò, sʋʋbò ni wòtolobò' wò à bhɛɛ léta sʋʋ bhà ke è à gbie, nuabò, ni bhaamɛ̀ɛ̀ yáányè bhɛ́ibò. Pɔɔnbò láà àng kekekèke lɔ́-mɛ̀ɛ̀ àa bhe koo.

Áá Babiloni-pɛ̀ɛ̀, bhè lɛgaa ke i zowɛ́ɛ́' nuu dɔà pɔɔnbò' bhà láà, à tó-lèè' tó i bhà dɔ́ɔ́n-á, ke pɔɔn nɛ́ɛ́nɛ̀ɛ̀ ni pɔɔn sɛ̀sɛ̀ páipái' é nuu i gɔ̀n yaiinle láà, à tó gi' sie i gɔ̀n, ke yáá à kekekèke yeii gbonggbongle koo lɛ́ɛ.

Mɛ̂ɛ' wó wélé ye' lóódɔyè gi pɛ́ɛ láà à yáànbhà, wún kpókpó' è kpɔ́à à tà láà, à súó ké àng tó kɛɛà, le wò dɔ à bhà dɔ́ɔ́n-á, le wò wosi, le wò ga-yàà wo à-wùn gi,

le wò wɩɩ wo: Iiiá, íi mɛɛ̀ɛ̀! Pɛ́ɛ kpáalàkpàà' wéléwɛ́ɛ́ ni gbàà tɛ́ɛ́n ni gbáán bhái' nuu à bhà, ke é nuu e bhàlúyèa sánng-wɛ́ɛ́bò ni gwɛɛ wùndɔ̀yóoábò ni zɔ̀lɔ̀wɛ́ɛ́ sɛ̀sɛ̀bòa láà,

kà à gaa tò, ke àbhà wélé miniminiyè láà à tó gi' sie yáán zán do-kini-dò tà é le. Yítà-gɔ̀ɔ̀ létáásí-mɛ̀ɛ̀bò oo, ni yí kààn góló gi-mɛ̀ɛ̀bò oo, ni yítà-gɔ̀ɔ̀ gi-bhààlá kɛɛ-mɛ̀ɛ̀bò oo, ni mɛ̂ɛ páipái' wò wo bhɛlɛ-pɔ̀ɔ̀n ye lò kɔ̀ɔ̀yí tà-yè gi,

àng tó ké nuu pɛ́ɛ láà à lé-pài gbɛ́ɛ́n yeà, ke wo dɔyèa à bhà dɔ́ɔ́n-á, le wò gbóoó daa wo: Pɛ́ɛ-mɛ̀ɛ̀' nuu mɔɔà nà gɔ̀ɔ̀-pɛ̀ɛ̀ láà à gá le?

À kɛ̀ɛ̀ kwɛiyè láà à gi, wo nuu ga-yàà woà, le wò sɛ́ɛ́ bii ban wo gwenglé, ke wo wosí-ii, ke wo gbáláii wo: Iiiá, íi mɛɛ̀ɛ̀! Yítà-gɔ̀ɔ̀-mɛ̀ɛ̀bò tó' wélé ye' pɛ́ɛ kpáalàkpàà' bhà láà, àle ya wí yáán zán do-kini-dò tà, le ya tó bhìng-bhà-lèèa é la wà!

A-wùn gi, lɔngwɛ́ɛ́ gi-mɛ̀ɛ̀bò, kà ka liágó tò! Aatana-à zaa tà-mɛ̀ɛ̀bò, ni à wʋʋ léban-mɛ̀ɛ̀bò, ni Yesu-à táá-mɛ̀ɛ̀bò, ka lekini! Atoosiwo Aatana' bhɔlɔ gó ka gi wún kpɔ̀ pɛ́ɛ láà à tà-yèa tò!

Máà n káá' wo ke Aatana-à kɩ́ɩ́la kpáa ke' wolo à lé, ke gwɛbílí kpáa ke' à tà-lèè' nuu bálóbàlòa ye wɛn-ɛ́ɛ́ zɛ̀ à tà-gwɛ̀ɛ̀ nɛ̀ láà, ke ya à sí, ke ya à bili kɔ̀ɔ̀yí wɛ́ɛ́. É nuu à bilià téei, ke e wɩ́ɩ́ii ye: Babiloni-pɛ̀ɛ̀ kpáa láà, wò à vɔ̀nng kpɔ́à gwɛɛ gɛìn kwɛpɛ́lɛ' wo, le mɛngge àa yáánpá à bhà gbonggbongle koo le.

À kɛ̀ɛ̀ kwɛiyè láà à gi, Babiloni-mɛ̀ɛ̀bò, kà ka yáán tó bhi, káá tuàn kwèèla ni bhʋ̀ʋ̀nɛ́ ni túnú ni wʋʋ lésɛ̀-mɛ̀ɛ̀bò ke wʋʋ maà kaà pɛ́ɛ láà à yáànbhà koo. Mɛngge àa zí kɔlé-bhààlá kɛɛ-mɛ̀ɛ̀ suu kekekèke yeii bhi koo. Mɛngge àa tuàn pɔɔn zɔn-vììn maà bhi koo.

Làngbha zán àa dɔii bhi koo. Lê sí-wùn ni gɔnɔ kpɔ́-wùn àa daaii mɛngge tóló gi bhi koo. Pɔɔn- àle kɛɛ kwɛi, àle ye: mɛ̂ɛ' wó nuu lóódɔà ka finibhà láà, tɔ́-mɛ̀ɛ̀ kpákpaabò' nuu àng gá lúyáán tà le. Ale kɛɛ le ká lúyáán tó páipái wunbílí gisie' kaà zʋ́ʋ́nɛ̀ kɛɛyè bhà le.

È gò' zí àle gi, Aatana-à zaa tà-mɛ̀ɛ̀bò ni à wʋʋ léban-mɛ̀ɛ̀bò ni mɛ̂ɛ páipái' wó àng zɛ' àng sàn bhà lúyáán tà láà, àng tóà lángga' nù- Babiloni-pɛ̀ɛ̀' à kún-i le.