1	Leekpɔ̀ɔ̀tili-wùnbò' à kɛɛ bha' bhɔ tó wo kúlúá láà, Aatana' àle wʋʋ kpɔ' Yesu Klisi bhà ye: è à tàpóló ebhà gùábò nɛ̀ le. A-wùn gi, Gwilinɛ Yesu' Aatana-à kɩ́ɩ́la do bɔ̀-, ke àle- à tó tàpóló nle Záàn' án àbhà gùá-miiá láà n nɛ̀ le.
2	Aatana' wúnbò' à tàpolo' n nɛ̀ kwɛi láà, n yáin' dàà àle tóá, le án à bɛɛnzɛ' sɛ́ikwɛ́ é à gi le. È tò' kwɛi, ke Aatana lekini' wún' pe', ke Yesu' à tàpolo' n nɛ̀, ke án à séeá láà, an àle bɛɛn yaaii ka nɛ̀ sɛ́ikwɛ́ gi é le.
3	À kɛ̀ɛ̀ kwɛiyè láà à gi, mɛ̂ɛ óó mɛ̂ɛ' è sɛ́ikwɛ́ é à-wʋ̀ʋ̀ peà, ni mɛ̂ɛ' wò wo tóló dɔà à-wʋ̀ʋ̀ bhà, ke wò wo táá-gɛ̀ɛ̀n síà à bhà, ke à-mɛ̀ɛ̀bò pe ké sɛ̀a. Atoosiwo wúnbò láà à kɛɛ bha' bhɔ kúlúá. Wɩ̀ɩ̀bhà-nàà' Záàn' à kpɔ' Azi-lègilizi saapiilɛ nɛ̀
4	Nle Záàn nle án sɛ́ikwɛ́ é à bɔii legilizi saapiilɛ' ká Azi lùu gi láà ka nɛ̀ le. Má wɩ́ɩ́ ka bhà. Aatana do' é nuu bhe lii, ke é tuàn bhe tenglé, ke à nù kpunglà-wùn' tuàn zí bhe tili láà oo, à leni àbhà níi saapiilɛ' wó àbhà gwilinɛnɛ̀-gbòlò zì láà oo,
5	ni Yesu Klisi' é Aatana séeá ke è àbhà mai-wùn pe tàpúúá láà oo, àng tó páipái wò dɔ gbáágbààa ke wò gɛ̀ilɛ tó ka bhà, ke wò zí ka zowɛ́ɛ́ niidaa. Yesu láà àle fɔ́ɔ́lé' go' gɔɔ̀le, le é zana' le. Ale zí lúyáán é à tà-gwìlìnɛbò tóà gwilinɛá le. Ko lɔ̀ɔ̀' à kɛɛ', le é wɩɩ' à bhà, ke wò e zɛ ke e yuɛn- tó ko kààn wúnyóo kɛɛyè gɔ̀n bhɛɛlé-pɔ̀ɔ̀n-a le.
6	É go' àle gi, le é ko dɔ̀lèè kpɔ́yèa ebhà gwilinɛnɛ̀ bhà, le é zí ko tóyèa e nɛ Aatana-à yíkpáá-mɛ̀ɛ̀a le. A-wùn gi, à-lèè ké à bhà ke mɛnó- à tɔ́ bhɔ, ke àbhà yáán- tó lɔng bhà lɛ́nólɛ̀nó bhà. À sɛ̀' kwɛi láà, Áa è à kɛ̂ɛ, àmiina!
7	Ká ka yáán tó bhi, Yesu do láà ya bhɔ nu lià loo tà tɛ́nglà. È nu láà à wò', bhaamɛ̀ɛ̀ tó páipái ké yáánpáà à bhà. Yàani mɛ̂ɛbò lefienɛ́' wó pɔ́ngti gbaan' à kɔɔ ni à gɛɛnbò tà yílí bhà láà, àng tó ké à yeà. Lùu óó lùu' é sɛ́ɛ́ tà, à tó gi-mɛ̀ɛ̀bò ké wosíà wo leng bhà. Mai lekinilèkini' à gá le. Ale à gá le.
8	Aatana Gwilinɛ Kpáalàkpàà' é kpókpóá, ke é bhe tenglé, ke é nuu bhe lii, ke à nu-wùn' tuàn zí bhe tili láà, e wɩɩ ye: ele é Alifa-a, le é zí Omega-a le. (Wò à pè' kwɛi, ke wo wɩɩ wo: àle wúnnó zigó-mɛ̀ɛ̀a, le é zí wúnnó léyaa-mɛ̀ɛ̀a le.) Záàn yáin dàà Klisi-a-kɔ̀ɔ̀
9	Nle Záàn' án ka laànɛ́á Yesu-à zaa tà, ke n leng án wɛ̀ilèè yeii ye ka nɛ̀, ke n dɔ̀lèè' zí Aatana-à gwilinɛnɛ̀ bhà ka pé, ke án zízí n zowɛ́ɛ́ saaii ye ka nɛ̀ yáán tò Yesu nuyè gɔ̀n-kɩ̀ɩ̀ bhà láà, nle án sɛ́ikwɛ́ é à bɛɛnzɛii le. Wo n kún' wo', le wó nuyèa nà n gá kɔ̀ɔ̀yí zué-sɛ̀ɛ̀ kpulunɛ́' wò a lee Patimɔsi é à tà le. Án nuu' wo' Aatana-à liangzɛà, ke án Yesu-wùn gɛingóii ziàn láà, wó n kùn- àle-wùn gi le.
10	À kɛ̀ɛ̀ kwɛiyè láà à gi, tɛɛnyáaná do keá, ke án Patimɔsi zé, Waa Zaazaa ké n si' ye gbʋ́ʋ' mɛ̂ɛ sí, le wʋʋ ke' go' n zíà ye túnúgɔ́ɔn wʋʋ nɛ̀, le é daa' n tóló gi le.
11	Wʋʋ láà e nuu wɩ́ɩ́à ye: Pɔɔn páipái' i yáin yéè daa à gá láà, í à tó bɛɛnzɛ sɛ́ikwɛ́ gi, ke legilizi saapiilɛ' wó Efɛzi ni Simini ni Pɛligamu ni Tiatili ni Saadi ni Filadɛli ni Laodisee-lèèbò gi láà, ke í àng tó ni pe bɔ.
12	Án wʋʋ láà à ma' kwɛi, le án seela' n gi, ke mɛ̂ɛ' é nuu liangzɛà n nɛ̀ kwɛi láà, án nù à ye le. Máà n káá' wo ke pai zán dɔ̀ à lé-pɔ̀ɔ̀n saapiilɛ' é nuu sánngá láà e dɔɔ bhi,
13	ke mɛngge' nuu ye bhaamɛ̀ɛ̀ gbe nɛ̀, e zí dɔɔ pai zán dɔ̀ à lé-pɔ̀ɔ̀n saapiilɛ láà à finibhà. Gbàbhuu do' nuu à bhà é, e nuu gbieláà à pé sáaá, le é nuu sánng kiásili yaayèa e dí le.
14	À wunbílí ni à wunkwɛ́ tó ké nuu féléà púúá do ye bhôlo nɛ̀, ɛ́ɛ́n zí ye máiwɛ́ɛ́ nɛ̀, le à yánwɛ́ɛ́' nuu mànàngmànàng góà ye painɛ̂ɛ nɛ̀ le.
15	À gɛɛn ké nuu gɛ̀lɛ̀nggɛ̀lɛ̀ng góà ye dìán' wa à sini pailé, ke à zán- bhɔ ziàn láà à nɛ̀, le à wʋʋ' nuu ye yí kpáa dɔ̀ gwɛɛ bhà-yè viin nɛ̀ zùzùzùle le.
16	Mɛɛ́ɛ́ saapiilɛ ké nuu à kɔɔ sɛ̀ gi, le pɔɔn' nuu woloà à líílé láà, é nuu ye siàng-wɛ́ɛ́' à lé- to zanó piilɛyèa láà à nɛ̀ le. À wɛí-lèè zán ké nuu ye yáán zán- to kɔɔ' gi yáán yàà mɛ̂ɛ gwenglé zué téei láà à nɛ̀.
17	Án à ye-le wo', án káán' wo' à lé, le án maana' à gɛnpé ye gewàà nɛ̀ le. Kɛ́ le é to', le é e kɔɔ sɛ̀ dɔ' n tà, le é wɩɩ' n nɛ̀ ye: Miá súó. Atoosiwo nle-mii' án wúnnó zigó-mɛ̀ɛ̀a, ke án zí à tó léyaa-mɛ̀ɛ̀a láà, nle do láà nle án bhe le.
18	Má woo ga maiá, kɛ́ le má zana, le án yáányèa tò é le. Máá tuàn gaà gbonggbongle koo. Gayè oo, ni gɔɔ̀le-lèè oo, à tó làkele- nle do láà nle n tà le.
19	É bo' à peá kwɛi, le é wɩɩ' n nɛ̀ ye: Le àle' kwɛi, i yáin' daa' wúnbò' gá láà, í à bɛɛnzɛ.
20	È gò' bhi, wún yemò' è zin dɔkɔ̀ɔ̀ é à gi-wùn bhà, ni à yemò' è zí kɛɛà dɔ̀ya, ke i yáin- daaà à gá láà, í zí à tó bɛɛnzɛ. È gò' àle gi, í mɛɛ́ɛ́ saapiilɛ' ye' n kɔɔ sɛ̀ gi, ni pai zán dɔ̀ à lé-pɔ̀ɔ̀n saapiilɛ' é sánngá, ke í à ye' láà, à tó pe zíà leng' bhe, máà àle tàpóló i nɛ̀ é le. I yáin' daa' mɛɛ́ɛ́ saapiilɛ' à gá láà, àngle wó Aatana-à gielá-mɛ̀ɛ̀bò' wó Azi lùu gi-lègilizi saapiilɛ wunlé láà àng dìgóá le. I yáin' zí daa' pai zán dɔ̀ à lé-pɔ̀ɔ̀n saapiilɛ' à gá láà, àngle wó zí legilizi saapiilɛ láà àng leng dìgóá le.