Apocalypse 4
1
Gwilinɛ Kpáa' bo' wúnbò láà à tó tàpólóá n nɛ̀ kwɛi, le n yáin' daa dɛ́ɛ ke wo' zí le. Máà n káá' wo ke lɔngwɛ́ɛ́ lé ké pólóyèa ye kwíi lé- to pólóyèa kɔɔ' gi à nɛ̀. Ale' kɛɛii kwɛi láà, ke mɛ̂ɛ do' án à wʋʋ ma' fɔ́ɔ́lé ye túnúgɔ́ɔn wʋʋ nɛ̀ láà, ke e à peii n nɛ̀ ye: Bhè tɔɔn kún zé, ke wún yemò' à kɛɛ-wùn' tuàn bhe dɔ̀ya láà, án à tàpóló i nɛ̀.
2
É bo' à peá kwɛi, Waa Zaazaa' tó' wo' le é n si' ye gbʋ́ʋ' mɛ̂ɛ sí le. Máà lɛgaa ke gwilinɛnɛ̀ kɛ̀ɛ̀ à tà-gbòlò do ké yaa lɔngwɛ́ɛ́ gi, ke mɛngge ké à tà.
3
Mɛ̂ɛ láà à wɛí-lèè zán ké nuu bhɔà gɛ̀lɛ̀nggɛ̀lɛ̀ngle ye kánnggwɛɛ púú' wò à lee Zasipe ni à tɛ́ɛ́n' wò à lee Salidɔni láà à nɛ̀. É nuu yaayèa gbòlò' à tà láà, mɛ̂ɛɛsànnggbe ké nuu káányèa à zì. Mɛ̂ɛɛsànnggbe láà à zán ké nuu dɔ̀ɔ̀nnɔɔyèa ye kánnggwɛɛ' wò à lee Yemelodi láà à nɛ̀.
4
È gò' àle gi, gwilinɛnɛ̀ kɛ̀ɛ̀ à tà-gbòlò kuà-piilɛ-ni-wɛ́ɛ́-yisɛ bhɛ́ibò ké nuu kɔnɔyèa gbòlò kpáè láà à zì, le mɔaabò kuà-piilɛ-ni-wɛ́ɛ́-yisɛ' nuu yaayèa gbòlò bhɛ́ibò láà à tà le. Mɔaabò láà wó nùù fɛ́nggbɛ púú' daayèa wo bhà, le sánng fánngwɛ́ɛ́' nuu àng wun bhà le.
5
Gbòlò kpáè' nuu yaayèa lee' gi láà, la ké nuu pàipài góà, le é nuu gbáláà, le pɔnggoò' nuu wɩ́ɩ́à bhi wùùùle le. È gò' bhi, sɛ́i saapiilɛ' nuu dɔyèa gbòlò kpáè liélé láà, àngle wó níi saapiilɛ' è go Aatana pé láà à gá le.
6
Gbòlò kpáè láà à liélé-lèè ké nuu dáindáin góà lɛnói mɔɔɔle do, ye kánnggwɛɛ-yí-gulu kpáalàkpàà tà-lèè nɛ̀. Máà zí lɛgaa ke pɔɔn yáányè kpákpaabò yisɛ' àng yánwɛ́ɛ́' nuu kɔnɔyèa àng zì yɛ̀nkɛ́ɛ́nlé liélé ni zíà tó bhà, wo dɔyèa gbòlò kpáè láà à zué-lèè ni à zì-lèè tó páipái bhà.
7
Pɔɔn yáányèbò láà à fɔ́ɔ́lé ké nuu ye yaa nɛ̀, le à piilɛnàà' nuu ye dîli gɔ́ɔn nɛ̀ le. È gò' bhi, à yakanàà wɛí-lèè ké nuu ye bhaamɛ̀ɛ̀ pe nɛ̀, le à yisɛnàà' nuu ye gíí-màà' gieà tée' gi è to kɔɔ' gi láà à nɛ̀ le.
8
Pɔɔn yáányè yisɛ láà àng tó gban ké nuu saado saado ye maa gban nɛ̀. È gò' bhi, àng yánwɛ́ɛ́bò ké nuu àng bu bhà lɛnói do yɛ̀nkɛ́ɛ́nlé, le à kemò' nuu àng gwílé-lèèbò tó bhà le. Yáán gi ni gbɛi gi tó bhà, wo to à peà kelengle wo: Aatana Gwilinɛ Kpáa' à kwìì à bhà-wùn àa bhe, ke é nuu bhe, ke é tuàn bhe, ke à nu-wùn' zí bhe láà, wúnyóo àa zin àle bhà, le é záázààa, le é záákázààkàa le.
9
Mɛ̂ɛ' é yaayèa gbòlò kpáè tà, ke àa ga gbonggbongle láà, pɔɔn yáányèbò- tɔ́ bàn à bhà kwɛi' wo, le wò bhɛɛ yaa à bhà, le wò à wánglego le.
10
Sée wó à kɛɛà kwɛi kɔi dolodolo, mɔaabò kuà-piilɛ-ni-wɛ́ɛ́-yisɛ' wó kɔnɔyèa à zì láà, wo zinna wo kpóng gi à zué, le wò wɩɩ wo: Ile-mii' yáá ga gbonggbongle láà, kó i nɛ̀ sáalé. È gò' bhi, wo woà fánngwɛ́ɛ́bò si wo wun bhà, le wò à banna gbòlò kpáè láà à gɛnpé, ke wo wɩ́ɩ́ii wo:
11
Áá, n nɛ Aatana, à-lèè ké à bhà ke mɛnó páipái- i tɔ́ bhɔ, ke wò bhɛɛ yaa i bhà, ke wò à pe wo: ile í kpókpóá le. Atoosiwo ile í pɔnópɔ̀nó daa', le à tó' bhe ibhà bhe gi, le pɔnó ni pe daa-wùn' sɛɛ' i nɛ̀ kɔɔ' gi, í à daa' à-kɔ̀i le.