{
    "livre": "apocalypse",
    "chapitre": 9,
    "versets": [
        {
            "numero": 1,
            "texte": "Kɩ́ɩ́la solunàà' e pe túnú pie', le án mɛɛ́ɛ́ bhɛ́i ke ye', ke ya gó lɔngwɛ́ɛ́ gi, ke ya dalá sáalé le. Án nuu lɛgaaà, le guluwɛ́ɛ́ dɔ́ɔ́nlàdɔ̀ɔ̀n' à songgélé àa bhe láà, wó à létàa-làkele nu' mɛɛ́ɛ́ láà à nɛ̀ le."
        },
        {
            "numero": 2,
            "texte": "Mɛɛ́ɛ́ láà é guluwɛ́ɛ́' à songgélé àa bhe láà à lépolo', le pai gbɛ́ɛ́n' nuu góà à gi búbúlé ye kpòò tinglé-pài gbɛ́ɛ́n nɛ̀, le é yáán ni tɛ́nglà-lèè tó tala' tíiá do minimaale le."
        },
        {
            "numero": 3,
            "texte": "É bo' tóá kwɛi, máà n káá' wo ke pélébò ké góii pai gbɛ́ɛ́n láà à gi, ke wo bannáii sɛ́ɛ́ tà. Bhaamɛ̀ɛ̀ wɛ̀ikɛ̀ɛ̀wo sé' è to zenggbèlèbò nɛ̀ sɛ́ɛ́ tà láà, wó nùù àle suu nuyèa àng nɛ̀,"
        },
        {
            "numero": 4,
            "texte": "le wó wɩɩ' àng nɛ̀ wo: bɩ̂ɩ ni yílí ni ta-pɔ̀ɔ̀nbò' sɛ́ɛ́ tà láà, wòo wún kpɔ́à àle ke tà. Kɛ́ bhaamɛ̀ɛ̀ yemò' wàa Aatana-à kɛ́ɛ kpɔ́yèa àng kpòng lé láà, wò àngle lengdo wɛ̀ikɛ̀ɛ̀wo le."
        },
        {
            "numero": 5,
            "texte": "É go' àle gi, le wó zí wʋʋ kpɔ' àng bhà wo: wòo mɛ̂ɛbò láà àng zɛ-le woà, kɛ́ wò àng wɛ̀ikɛ̀ɛ̀ lengdo' wo mɛ̂ɛ soluá le. Sée pélébò' nuu bhaamɛ̀ɛ̀ wɛ̀ikɛ̀ɛ̀' woà láà, à lé ké nuu yúáà ye zenggbèlè- mɛ̂ɛ pà' ziàn, è yua kɔɔ' gi láà à nɛ̀."
        },
        {
            "numero": 6,
            "texte": "À bha láà à bhà, bhaamɛ̀ɛ̀bò ké ga-lèè guoà sɛ́i tà, kɛ́ wàa à yeii. Ga lɔ̀ɔ̀ ké àng kɛɛà fʋʋʋle, kɛ́ ga ké gieà àng gɔ̀n bàlàa, le è dɔ àng bhà dɔ́ɔ́n-á le."
        },
        {
            "numero": 7,
            "texte": "Sée pélébò láà wo nuu ye sʋʋbò' wó àng baayèa ke wóò ló nàa àng gá gwili bhà àng nɛ̀. Ang wun bhà-pɔ̀ɔ̀nbò ké nuu ye fánngwɛ́ɛ́bò' wó sánng maayèa à bhà à nɛ̀, le àng wɛí-lèè' nuu ye bhaamɛ̀ɛ̀bò pe nɛ̀ le."
        },
        {
            "numero": 8,
            "texte": "Ang wunkwɛ́ ké nuu ye nɔ́ngbò pe nɛ̀, le àng sóó' nuu ye yaa sóó nɛ̀ le."
        },
        {
            "numero": 9,
            "texte": "Ang túlú lé-kwìì ké nuu ye pɛɛ́ɛ́ bháibò nɛ̀, le àng gban gimaa-vììn' nuu ye sʋʋbò' wòtolo tinglàtìng gbieà ziàn, ke wo lóii nà à gá gwili bhà bàlàa, à viin nɛ̀ le."
        },
        {
            "numero": 10,
            "texte": "Ang zi ké nuu zɔ́ɔ́yèa ye zenggbèlè wɩ̂ɩ nɛ̀, le àng píní' nuu bhi le. Bhaamɛ̀ɛ̀ wɛ̀ikɛ̀ɛ̀wò mɛ̂ɛ soluá sé' é nuu àng nɛ̀ láà, wó nùù à woà àng píní láà àleá le."
        },
        {
            "numero": 11,
            "texte": "Yínaa' é guluwɛ́ɛ́ dɔ́ɔ́n láà à wunlé, àle pélébò láà àngbhà gwilinɛá le. Wo àle lee Ebɛlɛ-wʋ̀ʋ̀ gi wo Abadon, le wò zí à lee Gɛlɛki-wʋ̀ʋ̀ gi wo Apɔlion le. (Wò à pè' kwɛi, ke wo wɩɩ wo: bhaamɛ̀ɛ̀ gisie-mɛ̀ɛ̀.)"
        },
        {
            "numero": 12,
            "texte": "Nàni kpáalàkpàà láà à fɔ́ɔ́lé' ya gie lɛ́ɛ. Kɛ́ kà ka yáán tó bhi, à piilɛ' à-wùn' tó àle zìpieta le."
        },
        {
            "numero": 13,
            "texte": "Kɩ́ɩ́labò láà àng saadonàà' e pe túnú pie', máà n tóló dɔ ke sáà gò à tà-gwɛ̀góló' é sánngá, ke é Aatana zué láà, wʋʋ ke ké woloii à zɔ́ɔ́ bhà-lèè yisɛ tó gi,"
        },
        {
            "numero": 14,
            "texte": "ke e à peii Aatana-à kɩ́ɩ́la saadonàà' túnú' nuu à kɔlé láà à nɛ̀ ye: Yínaa yisɛ' wó àng yeleyèa guan kpáa' wò à lee Efalati à kpúnglé láà, bhè àng póló."
        },
        {
            "numero": 15,
            "texte": "É à pe' kwɛi, le wó yínaabò yisɛ láà àng polo', ke wò ló bhaamɛ̀ɛ̀bò' wó lúyáán tà àng tó pèè à gi-yè pɛ́ɛ́n yakanàà búnú ban-i le. Atoosiwo yínaabò yisɛ láà, wo nuu wo tàkúnyèa fɔ́ɔ́lé, le wó nuu dɔyèa bhɛɛlé, ke wò wo yáán tó kwee ni mɛ̂ɛ ni yáángɛɛn ni lɛ́ɛ́lɛ́ɛ́' Aatana' nuu à kpɔ́yèa àng nɛ̀ fɔ́ɔ́lé láà à gɔ̀n le."
        },
        {
            "numero": 16,
            "texte": "-17 É go' àle gi, le n yáin' daa' sɔ́yabò' lo' gwili láà à bhà ke wó nuu sʋʋ tà àng gá, le án àng-nàà ma' le. Wo nuu bhaamɛ̀ɛ̀ wáá wúlú kàin piilɛá. Sɔ́yabò' nuu sʋʋbò tà láà, àngbhà pɛɛ́ɛ́ bhái kemò ké nuu mànàngmànàng góà ye painɛ̂ɛ nɛ̀, le à kemò' nuu talaà ye gbàà dàà gaa bhà-yè nɛ̀, le à kemò pe yáán' nuu zí zàiinle ye máá bii nɛ̀ le. Sʋʋbò láà àng wunbílí ké nuu bhɔà yaa wunbílí bhà, le pai ni pai gbɛ́ɛ́n ni gwɛɛ' è dolo à bii' nuu woloà àng líílé le."
        },
        {
            "numero": 18,
            "texte": "À kɛ̀ɛ̀ kwɛiyè láà à gi, bhaamɛ̀ɛ̀ gisie-pɔ̀ɔ̀n yóyoobò yaka' é nuu woloà àng líílé pai ni pai gbɛ́ɛ́n ni gwɛɛ doloyè biiá láà, àle lúyáán pèè à gi-yè pɛ́ɛ́n yakanàà tó búnú ban' le."
        },
        {
            "numero": 19,
            "texte": "Sé' é sʋʋbò nɛ̀ láà, è àng biin ni àng wɩ̂ɩɛ́ɛ́bò' gi le. Atoosiwo àng wɩ̂ɩɛ́ɛ́bò láà wo bhɔ mɛɛbò bhà, le àng wunbílí' àng lé le. Wò wúnyóo kɛ̀ɛ̀ bhaamɛ̀ɛ̀bòa àng wɩ̂ɩɛ́ɛ́bò pe wunbílí láà àleá le."
        },
        {
            "numero": 20,
            "texte": "Kɛ́ àle tó gi, mɛ̂ɛ paán yemò' àng wunbílí òo tó nànibò láà à bhà, wòo wɩ́ɩ́ à bhà ke wò wo kɔɔ gó wo sɔng lé. Wo to' yínaabò lɔ̀ɔ̀kɛɛà, le wó nuu zí sánng-wɛ́ɛ́ ni wɛ́ipúúwɛ́ɛ́ ni dìánwɛ́ɛ́ ni gwɛɛbò ni yílíbò tóà àngbhà yoá, le wò à tó lɔ̀ɔ̀kɛɛ le. Sée ke yobò' kwɛi láà wàa lee ye, wàa wún ma, wàa táásí."
        },
        {
            "numero": 21,
            "texte": "È gò' zí àle gi, wòo wɩ́ɩ́ à bhà ke wò wo kɔɔ gó woà bhaamɛ̀ɛ̀ zɛyèbò, ni woà zʋ́ʋ́nɛ̀ kɛɛyèbò, ni woà zùàkɛɛyèbò, ni woà kuanwoyèbò zì."
        }
    ]
}