Colossiens 1

Nle Pɔli' Aatana' n yaayèa ke án tó Yesu Klisi-à táá-mɛ̀ɛ̀a, ko ni Timotee' é ko ni kanù ko laànɛ́á Yesu-à zaa tà láà, kole kó sɛ́ikwɛ́ é à bɛɛnzɛii le.

Kɔlɔsi-mɛ̀ɛ̀ yemò' ká ko laànɛ́á Klisi-wùn gi, ke ká yaayèa àbhà yaa gi, ke ká zí kóló kúnyèa àbhà zaa tà láà, ko à bɔ̀ kale ka nɛ̀ le. Kó wɩɩ ko: ko nɛ Aatana- dɔ gbáágbààa ke è gɛ̀ilɛ tó ka bhà, ke è zí ka zowɛ́ɛ́ niidaa. Pɔli ké Aatana wánglego' Kɔlɔsi-mɛ̀ɛ̀bò-wùn gi

Kó bhàiwoà ziàn ka-wùn gi laá, Aatana' é koà Gwilinɛ Yesu Klisi nɛá láà, kó à wánglego lɛ́ile.

Atoosiwo kó à mayèa wo: ka kpɔ́yè ké Yesu Klisi lé kelekelele, le ka bhámò' wó Yesu pe gi-mɛ̀ɛ̀a ye ka nɛ̀ láà, àng tó páipái lɔ̀ɔ̀- ka kɛɛ lekinilèkini wo zí le.

È gò' bhi, nâa sɛ̀' è go Aatana pé, ke è mai-wùn tàpolo mɛ̂ɛ nɛ̀, wó à kpɔ́ fɔ́ɔ́lé wo' ka nɛ̀ tée' gi, wo zí à pe' ka nɛ̀ wo: Aatana ké leekpɔ̀ɔ̀tili-sànma yaayèa ka gɔ̀n lɔngwɛ́ɛ́ gi. Ka ka yáán tóii àle gɔ̀n, le ká kpɔ́yèa Yesu-wùn lé kelekelele, le ka bhámò' à pe gi-mɛ̀ɛ̀bòa, àng lɔ̀ɔ̀- ka kɛɛ kwɛi le.

-7 Nâa sɛ̀ láà, wo lóii à kpɔ́á lúyáán tà lɛnólɛ̀nó gi, le à-wùn' maanáii, le é tɔnɔ sɛ̀ kɛɛii le. A-wùn gi, à bhɛɛ' bo' zin-á ka lekini ka bhà, ke wò à kpɔ́ ka nɛ̀, le é tɔnɔ kɛɛ zigo' ka finibhà yáángɛɛn do láà à gá, le é lóii nàa liélé kwɛi flúúlé, le tenglé' bhɔ' le. Pafalasi' à-wùn' ko gɔ̀n kpókpóá, ke ko nà à gá ko Aatana-à bháála kɛɛ kiá láà, àle ka dɔɔ' Klisi-wùn láà à gá le. Aatana' gɛ̀ilɛ' tóyèa bhaamɛ̀ɛ̀bò ko bhà láà, ka à-wùn mayèa àle tà, le é maiá kɔɔ' gi, ká à gimayèa à-kɔ̀ɔ̀ bhà kpákpálé le. Sée Pafalasi láà, Aatana-à bháála kɛɛ-mɛ̀ɛ̀ tiàànle' à gá le. Kwéè woo bháála do' kɛɛ ka kpe gi, è àle kɛɛii lɛ́ɛ.

Waa Zaazaa' Aatana ni bhaamɛ̀ɛ̀bò lɔ̀ɔ̀ daayèa ka gwílé gbanggbaale kɔɔ' gi, Pafalasi do láà àle zí à gɛingo' ko nɛ̀ le.

Ale kɛɛ le kó bo' àle maá kwɛi yáángɛɛn láà à gá lii, ko yáin àa ga ka lébhàiwò Aatana zì-wùn-a le. Kó bhàiwo kwɛi, ke Waa Zaazaa- nù mai daa ka bhà kɔɔ tó páipái gi, ke è ka gba wúndɔnnɛ̀a, ke ká nù Aatana zòàwùn gima' wo kpákpálé le.

È tò' kwɛi, ka táá-kɔ̀ɔ̀ ké bhɛɛ yaaà Gwilinɛ Kpáa bhà, le è sɛɛ à nɛ̀ kɔɔtókɔ̀ɔ̀tó gi le. È gò' bhi, ká wúnsɛ̀ suu tó páipái kɛɛà, le à tɔnɔ- to kpáaá, le kaà Aatana dɔnyè- lo liélé le.

È gò' bhi zí, kó bhàiwo Aatana zì kwɛi, ke mɛ̂ɛnɛ̀ kɛɛ-bhàà' é à gi láà, è à daa ka lekini ka gi gbanggbaale, ke ká nù mɔɔ wúnnó páipái kún-á ka bhà zowɛ́ɛ́ máimàinɛ̀ bhà.

È gò' àle gi, ko nɛ Aatana' leekpɔ̀ɔ̀tili-sànma' à yaayèa e pe gi-mɛ̀ɛ̀bò gɔ̀n láà, è zí ka leng ka tóyèa àle sɔlɔ-mɛ̀ɛ̀a le. À kɛ̀ɛ̀ kwɛiyè láà à gi, ká ka wɛí póló lekinilèkini wo, ke ká à wánglegó sóósíá. Atoosiwo koà leekpɔ̀ɔ̀tili-sànma' é kwɛi láà, Aatana- à yaayèa ko gɔ̀n lɛipúú lià e maabhà' wo le.

Ale do láà àle zí ko vólódɔ' lɛitíi-lèè bháa' é kpókpóá láà à gɔ̀n, le é ko yaa' à gbe' à lɔ̀ɔ̀- à kɛɛ miniminiyèa láà à loo gi le.

Aatana' ko tàbooyè' gá, ke é zí ko bhàwùn tóyèa kwɛi láà, gɛ̀ilɛ àa à gbe láà àle bhà le. Ka Aatana wánglegóà wún' gi, àle lɛ́ɛ. Klisi ké pɔnó páipái wunlé

Aatana lekini-le, mɛngge àa à ye, kɛ́ ko à dɔ̀n à gbe' é à bhɔ̀ɔ̀bhàa láà àle pé le. Ale Aatana-à mɔɔfɔ́ɔ́á, le é kpáaá Aatana daa-pɔ̀ɔ̀n tó páipái bhà le.

Atoosiwo Aatana' pɔɔn páipái' daayèa, é à tó dàà àle kɔ̀ɔ̀tà le. Pɔɔn yemò' sɛ́ɛ́ tà sáalé oo, ni à yemò' wó lɔngwɛ́ɛ́ gi tɛ́nglà oo, à yemò' mɛ̂ɛ yánwɛ́ɛ́- à ye oo, ni à yemò' mɛngge àa à ye oo, Aatana' à tó páipái dàà àle do láà àle kɔ̀ɔ̀tà fɔ́ɔ́lé lii le. È gò' àle gi, pɔɔnbò' wó yaayèa gwilinɛnɛ̀-gbòlò tà lɔngwɛ́ɛ́ gi, ni giè mɛ̂ɛ gɔ̀n-pɔ̀ɔ̀nbò ni mɛ̂ɛ wunlé-pɔ̀ɔ̀nbò ni bháa-pɔ̀ɔ̀nbò' wó bhi láà, é zí à tó páipái dàà kwɛi Klisi do láà àle kɔ̀ɔ̀tà lii, le é zí pɔnópɔ̀nó yaa' àbhà yaa gi le.

Kɛ́ sée Klisi láà, e bhe fɔ́ɔ́lé, ke Aatana òo pɔnggepɔ̀ngge daa bhe, le à kɔɔ' Aatana' pɔɔn páipái' daayèa à tó bhà le.

A-kɔ̀ɔ̀ do láà à gi, Klisi' legilizi wunbílíá, le legilizi-le' ye à dèbílí nɛ̀ le. Ale-mii' é wúnnó zigò à tà-mɛ̀ɛ̀a láà, àle fɔ́ɔ́lé' zana', le é tóyèa gò gɔɔ̀le-mɛ̀ɛ̀ tó páipáià mɔɔfɔ́ɔ́á le. Sée é àle kɛ̀ɛ̀ kwɛi ke è nù yaa' wo pɔnópɔ̀nó wunlé le.

Atoosiwo Aatana- ebhà Aatana-nɛ̀ tó páipái banyèa ké tà Klisi' gi le. Sée Aatana zòàwùn' nuu à gá, le é à kɛɛ' kwɛi le.

È gò' àle gi, e sɛɛ' wo' zí Aatana nɛ̀, le sièkénɛ̀' nuu àle ni lúyáán tó páipái finibhà láà, é à yɛn', le é sɛ̀ɛ̀kénɛ̀ daa' wo ni pɔɔn páipái' wó sɛ́ɛ́ tà zé ni à yemò' wó lɔngwɛ́ɛ́ gi tɛ́nglà wo finibhà le. Sée wó Klisi yuɛn' kpɔ' à zɛ̀ yílí bhà-yèa láà, àle to' Aatana ni pɔnópɔ̀nó finibhà-yì kpàà à tà-pɔ̀ɔ̀n-a le.

É nuu fɔ́ɔ́lé, ka lekini ká nuu káányèa Aatana bhà dɔ́ɔ́n-á, le à sàn' nuu ka kɛɛà ka zʋʋ pé-wùn ni ka kɛɛ-wùn tó tò yóoá-wùn gi le.

Kɛ́ tenglé-yààn é à gi, à gbe Klisi' é nuu bhaamɛ̀ɛ̀a, ke à bu' nuu à bhà ye ko pe nɛ̀, é ga' wo' láà, àle nu' tói bhaamɛ̀ɛ̀bò ka ni Aatana-nù ka kɔɔ wì kéi-kɔ̀ɔ̀a le. Sée Klisi' àle kɛ̀ɛ̀ kwɛi ke è nù ka kɔ́nɔ́' wo e nɛ Aatana nɛ̀, ke bɔ́n tó' gó ka bhà fɩ́fɩ́lé, ke ka bhà' tó púú záázààa à zué, ke pe àa tuàn ka bhà kɔɔkekɔ̀ɔ̀ke gi koo le.

Kɛ́ à-lèè ké à bhà ke ká dɔ gbaiinle kpɔ̀ Yesu lé-yè gi, ke ka gɛɛn- tó zí gbaanyèa ka wala dinngle. È gò' bhi, leekpɔ̀ɔ̀tili-sànma' ká à-wùn ma' nâa sɛ̀ kpɔ̀ ka nɛ̀ téei, ke ká zí ka yáán tóii à gɔ̀n láà, ká à kɛ̂ɛ sɛ̀a ke ka zʋʋ òo nù gó àle-wùn-a le. Sée nâa sɛ̀ do' wó à kpɔ' ka nɛ̀, ke wó zí à kpɔ' daa-pɔ̀ɔ̀n páipái' wó lúyáán tà àng tó nɛ̀ láà, Aatana- nle Pɔli nle n yaayèa à kɩ́ɩ́la dɔ-mɛ̀ɛ̀a le. Pɔli legilizi légièwo-kɔ̀ɔ̀

Án nâa sɛ̀ láà à kpɔ́-mɛ̀ɛ̀a kwɛi, le n wɛ̀ilèè' góii ka-wùn gi dɔkɔ̀ɔ̀ é à gi le. Kɛ́ án n liágo à-wùn gi. Atoosiwo n wɛ̀ilèè- gò', ke è yúá n kwîi bhà laá, è kɛ̀ɛ̀ n gá kwɛi legilizi' é Klisi dèbílíá láà àle-wùn gi le. È tò' kwɛi, ke Klisi' wɛ̀ilèè' à ye' sɛ́ɛ́ tà zé fɔ́ɔ́lé láà, an àle lépaii legilizi-wùn gi le.

Aatana lekini' n yaayèa, le án tóyèa legilizi légièwo-mɛ̀ɛ̀a kwɛi, ke án nù Aatana wʋʋ tó páipái tàpóló' wo bhaamɛ̀ɛ̀bò nɛ̀, ke à-lɛ̀nggelɛ̀ngge òo nù tó bànàkpɔ́ gi le. É bháála' dɔyèa n kɔ̀ɔ̀lé, ke án à kɛ̂ɛ ka nɛ̀, àle lɛ́ɛ.

Atoosiwo é si' à zigó gi liilììlii ke è zin nàa tenglé bhà, wún' nuu Aatana zʋʋ pé ke òo woo à tàpóló fɔ́ɔ́lé-mɛ̀ɛ̀ kekekèke nɛ̀ bhe láà, è àle tàpólóyèa dɔ̀yáa gá e pe gi-mɛ̀ɛ̀bò ko nɛ̀ le.

E nuu lefienɛ́ wo Aatana zòàwùn-a ye: wún' é nuu e zʋʋ pé kwɛi, é wúnsɛ̀ ni wún tiàànleá kɔɔ' gi, ke à nààlé àa bhe láà, é à tó tàpólóà mɛ̂ɛ' káá Zuifu-a ke káá nuu e dɔn-à fɔ́ɔ́lé kanó ka nɛ̀. Wúnsɛ̀' ka zʋʋ àa nuu à kɛ̀ɛ̀ ka nɛ̀-wùn-a, ke Aatana' à tàpólóyèa ka nɛ̀ dɔ̀yáa gá kwɛi láà, àle Klisi yàà ka gi-wùn-a le. Ka à gànnù àle bhà ka: ká mɛ̂ɛnɛ̀ kɛɛà Aatana pé leekpɔ̀ɔ̀tili gi maiá le.

Pɔɔn- à kɛɛ ke ko Klisi-wùn-nàà sɛ̀ kpɔ mɛnómɛ̀nó nɛ̀, ke ko liè dɔ ziàn àng tà dolodolo, ke ko zí àng dɔɔ Aatana-wùn-a wúndɔnnɛ̀ bhà kɔɔtókɔ̀ɔ̀tó gi láà, àle lɛ́ɛ. Ko zaa gò mɛnómɛ̀nóá kwɛi' wo, ke wó kɔi dolodolo láà, kó nù waa nà àng tóá Aatana zué, ke wa sɔ́n Klisi gwílé Aatana zòàwùn kɛɛyèa le.

Ale kɛɛ le án gii gi-gìì sí-ii, le án zí Aatana-à gwili gɔn-ii n níiá le. Sée Klisi lekini' à pe bháa' è gie pɔnópɔ̀nó gɔ̀n láà à daayèa n gi, le è bháála kɛɛ n kɔ̀ɔ̀tà kpókpóá kwɛi le.