Hebreux 1
1
É nuu fɔ́ɔ́lé lii, Aatana ké liangzɛ' ko bhɛ́mabò nɛ̀ gɛnyààn kpeá, le à liangzɛ̀ àng nɛ̀-kɔ̀ɔ̀' nuu zí bɛ́ɛ́á le. Sée é nùù liangbò láà à tó gieà e wʋʋ léban-mɛ̀ɛ̀bò' àng líílé, le wó nuu à zɛà ko bhɛ́mabò láà àng nɛ̀ kwɛi le.
2
Kɛ́ kó dɔɔ ye' wo dɔ̀yáa gá ke lúyáán léyaa bha' bhɔ tó wo é, Aatana' wʋʋ kpɔ̀- e gbe' bhà, le àle' à léban' kole ko bhà le. Sée Aatana' zí lúyáán tó páipái daayè dɔ̀- e gbe do láà àle kɔ̀ɔ̀lé, le é pɔnó páipái yaayèa à gɔ̀n leekpɔ̀ɔ̀tili-sànmáá le.
3
Yáán zán- wolo kɔɔ do' gi láà, Yesu lekini- zí Aatana-à mɛ̂ɛnɛ̀ zán-á àle-kɔ̀ɔ̀ bhà le. Atoosiwo Aatana' e lekinilèkini bhɔ̀ɔ̀bhà' lébhɔyèa kpunglà, àle Yesu-á le. Yesu do láà àle kɔɔ' zí lúyáán tó páipái bhà, le é kèènii daayèa à bhà e biinlé-wʋ̀ʋ̀a gegetelele le. Yesu do láà àle zí to' bɔ́n gò bhaamɛ̀ɛ̀bò bhà-sààa le. É bo' bɔ́n gò bhaamɛ̀ɛ̀bò bhà-sàà góá kwɛi, le é nuu lóà yalái e nɛ Aatana Kpáalàkpàà' é lɔngwɛ́ɛ́ gi láà à kɔɔ sɛ̀ gi le. Aatana gbe dɔ̀lèè tò kpáaá-kɔ̀ɔ̀
4
Aatana gbe láà à dɔ̀lèè ké kpáaá, à lé ké gie à nɛà kɩ́ɩ́labò tó pe tà dɔ́ɔ́n-á. Ale kɛɛ le Aatana' à gbayèa tɔ́' gá láà, è gie àng pe tà le.
5
E sée kwɛi maiá, Aatana òo à pe ebhà kɩ́ɩ́labò láà àngle ke nɛ̀ do bhe ye: Nbhà nɛ́' i gá le. Nle án i kpɔ́yèa tenglé le. È gò' zí àle gi, Aatana òo woo à pe ebhà kɩ́ɩ́labò láà àng ke-wùn gi fɔ́ɔ́lé do bhe ye: Nle án tóà à nɛá, le àle- to nbhà nɛ́á le.
6
Kɛ́ Aatana' àle peii kwɛi dɔ̀ya tée' gi láà, ke à gbe' é àbhà mɔɔfɔ́ɔ́á láà, yéè à bɔ' wo, ke è nu lúyáán tà zé le. É wɩ̀ɩ̀ àle gi ye: A-lèè ké à bhà ke nbhà kɩ́ɩ́labò tó páipái- zinná wo kpóng gi n gbe láà à nɛ̀.
7
È gò' àle gi, Aatana ké zí à pe' ebhà kɩ́ɩ́labò' wó àbhà gùábòa láà àng bhà ye: É àng to ye wàà nɛ̀, le e zí àng to ye painɛ̂ɛ nɛ̀ le.
8
Kɛ́ à ye' è zin à gbe-le-wùn bhà láà, Aatana ké à pe' tàpúúá ye: Aatana, ibhà gwilinɛnɛ̀ gɛɛn ké gbaanyèa kelekelele, le à gò gbóló gi-mɛ̀ɛ̀ àa tóii gbonggbongle le. È gò' àle gi, ibhà mɛ̂ɛnɛ̀ kɛɛ-kɔ̀ɔ̀ ké dɔɔyèa.
9
Atoosiwo wún' é sɛ̀a, àle lɔ̀ɔ̀- i kɛɛ, le wúnyóo-le sàn- i kɛɛ le. A-wùn gi, Aatana, i nɛ Aatana ké i soloyèa, le é i dɔyèa dɔ̀lèè kpáa' è gie i mɔ̀ɔ̀kiá tó pe tà à gi, le à yɔ́ɔ́n' i zúlúyèa le.
10
È gò' bhi, à bɛɛn ké zí zɛyèa Aatana-à sɛ́ikwɛ́ gi Yesu-wùn gi wo: Gwilinɛ Kpáa, ile í sɛ́ɛ́ tó kɛángini' lúyáán zigó téei lii, le í zí lɔngwɛ́ɛ́ kɛɛ' i kɔɔá le.
11
Pɔɔnbò láà àle tó ké gieà, le ile i to le. À tó ké tóà zìzììbòa ye mɛ̂ɛ bu bhà-wèlè nɛ̀.
12
Í à tó kɔɔn kɛɛà ye mɛ̂ɛ' gbàbhuu kɔɔn kɛɛ, le i à bhɛ́i daa ye wélé- bɛ̀lɛ̀', wò à dɛ́ɛ' daa láà à nɛ̀ le. Kɛ́ ile í nuu kɔɔ do' gi lii láà, i tuàn àle-kɔ̀ɔ̀ bhà le. Ibhà sii àa yɛn-ii gbonggbongle.
13
È gò' àle gi, Aatana òo sée à pe ebhà kɩ́ɩ́labò láà àngle ke nɛ̀ do bhe ye: Bhè yalá n kɔɔ sɛ̀ gi zé, ke í tó bhi kwɛi flúúlé, ke án i yáòbò tó tó i gɛin-sàbháá.
14
È tò' kwɛi, ke Aatana-à kɩ́ɩ́labò láà wáa àng gá le? Yínaa kólósɛ̀sɛ̀bò' àng gá, le wò ziàn Aatana-à táá si, le è àng giela é layè yaayèa mɛ̂ɛbò' ko gɔ̀n leekpɔ̀ɔ̀tili-sànmáá ko tàkún lià le.