1	Atoosiwo kpɔ̀ Aatana lé-yè láà, àle mɛ̂ɛ zʋʋ tò à gi kelekelele wo: mɛ̂ɛ yáán' wúnsɛ̀' gɔ̀n, mɛ̂ɛ àa kwii-ii à gi-yèa le. Kpɔ̀ Aatana lé-yè do láà, àle zí pɔɔn' mɛngge àa à ye láà à-wùn dɔ̀n mai lenglèngá-yèa mɛ̂ɛ zowɛ́ɛ́ pé le.
2	Mɛ̂ɛ' wó nuu fɔ́ɔ́lé lii Aatana-à zaa tà láà, é àng-wùn sɛ̀ pè- àngbhà kpɔ̀ e lé-wùn láà àle gi le.
3	Ko kpɔ́yè láà àle zí Aatana lé, le ko à gànnù ko: é lúyáán dàà e biinlé-wʋ̀ʋ̀' gá le. Ko zí à gànnù àle bhà ko: pɔɔn yemò' mɛ̂ɛ yánwɛ́ɛ́- à ye, à tó- gò à yemò' mɛngge àa à ye láà àle gi le.
4	Abɛli' kpɔ́' wo' Aatana lé, le é à lɔ̀ɔ̀kɛɛ-sàà' go' láà, à lé' wɩɩ' Kaɛn pe bhà le. Sée Aatana' lɩ́ɩ́ sɛ̀ɛ̀ Abɛli bhà àbhà kpɔ̀ à lé-wùn láà àle gi le. Atoosiwo Aatana lekini' à tàpolo' à nɛ̀ ye: é e lɔ̀ɔ̀kɛɛ' pɔɔnbò' gá láà, à-wùn ké e zʋʋ kun' le. A-wùn gi, Abɛli-à kpɔ̀ Aatana lé-yè do láà àle wʋʋi' tuàn káán-à tenglé-yààn é à gi, sée ke à lekini-le ga lɔ̀ɔ́' mɔ́ le.
5	È gò' àle gi, Enɔki' kpɔ́' wo' Aatana lé láà, àle kɛɛ le é wala', le é lo' Aatana pé ye gbʋ́ʋ' mɛ̂ɛ sí, le òo bɔ gɔɔ̀le-zàà tà le. Atoosiwo Aatana lekini' à si', le é lo' nà à gá e maabhà tɛ́nglà, le mɛngge òo nù à ye koo le. Sée Enɔki òo waláà ke è ló tɛ́nglà bhe, Aatana ké à tàpolo' à nɛ̀ ye: à táá-kɔ̀ɔ̀ sɛ̀ láà e e zʋʋ kúnyèa.
6	Kɛ́ sée mɛnggemɛ̀ngge kɛɛ-wùn àa Aatana zʋʋ kún, ke à-mɛ̀ɛ̀ kpɔ́yè-le àa à lé. A-wùn gi, mɛngge- nù pe é yɔ́n Aatana gi, ke à-mɛ̀ɛ̀ kpɔ́yè' à lé fɔ́ɔ́lé ye: Aatana ké bhe le. È gò' bhi, ke à-mɛ̀ɛ̀ kpɔ́yè' zí à lé ye: mɛ̂ɛ' è Aatana-lèè guo, Aatana leng ké à gi-wùn sɛ̀ kɛɛ à-mɛ̀ɛ̀ nɛ̀ le.
7	È gò' àle gi, wún' à kɛɛ-wùn' nuu bhe la kpáa ban-wùn-a, ke Aatana' à to' liélé ke é à pe' Noe nɛ̀ láà, Noe ké kpɔ' Aatana lé à-wùn gi, sée ke òo à-lèè ye bhe. Ale kɛɛ le é suo' Aatana gɔ̀n, le é yítà-gɔ̀ɔ̀ kɛɛ', ke è tó à leni à bhà-mɛ̀ɛ̀bò tó là yí gɔ̀n-pɔ̀ɔ̀n-a le. Noe' lúyáán tó páipái zɛ̀- lɩ́ɩ́á kwɛi' wo àbhà kpɔ̀ Aatana lé-yè láà à gá le. À kpɔ́yè' to' Aatana lé láà, àle do láà àle to' zí àbhà lɩ́ɩ́ sɛ̀ɛ̀ à zué-kɔ̀ɔ̀a le.
8	È gò' zí àle gi, Ablam kpɔ́yè' nuu Aatana lé, le Aatana' à pe' à nɛ̀ tée' gi ye: è ló lùu bhɛ́i ke gi láà, é wún ma' à tà, le é wala', le é lo' bhi le. Sée e lo' kwɛi, ke àa e ló-lèè dɔn, kɛ́ ke e Aatana zʋʋ pé ye: é lùu láà à nuà à nɛ̀ dɔ̀ya, ke è tó àbhà sɛ́ɛ́á.
9	Ablam kpɔ́yè' nuu' wo' Aatana lé láà, àle kɛɛ le é wala', le é lo' yàngpénɛ̀ kɛɛi lùu' Aatana' à nù à nɛ̀-wùn píníwo' láà à gi le. É nùù yiià gbáiwabò' wala, àlele oo, ni à gbe Izaaki oo, ni à gbeà nɛ́ Zakɔbu-nù tóá le. Atoosiwo Aatana' píní do' wo' Ablam nɛ̀ láà, é zí àle wo' à gbebò láà àng tó nɛ̀ le.
10	Sée Ablam zʋʋ' nuu yàlèè' bhà, ke é nuu yiià gbáiwa wala kwɛi, àle nuu Aatana-à pɛ́ɛ' à leng' à dan-mɛ̀ɛ̀ ni à dɔ-mɛ̀ɛ̀ tóá do, ke à-kpùlù àa viin-ii láà à gá le.
11	Abhà nɔ́ng Sala leng kpɔ́yè' nuu zí Aatana lé, le Aatana' à to' nɛ́ kpɔ́-mɛ̀ɛ̀a Ablam gɔ̀n, kɛ́ ke ya woo tó lóoán-á le. Sée Aatana' Sala gbà- nɛ́ kpɔ́-bhààa kwɛi à kpɔ́yè' nuu' wo' à wʋʋ lé láà àle-wùn gi le. Atoosiwo Sala kpɔ́yè ké nuu à lé ye: Aatana' píní' wo' e nɛ̀ láà, àa góii e wʋʋ tà.
12	Ale kɛɛ le miɔn do-kini-dò láà à ginɛ́bò' zí tóyèa kpeá yèèèle ye mɛɛ́ɛ́bò nɛ̀ lɔngwɛ́ɛ́ gi, ɛ́ɛ́n ye yí wɛ́ɛ́-kɛ̀ɛ̀n nɛ̀ kɔ̀ɔ̀yí kpúnglé, le mɛngge àa mɔɔ àng núnúá koo le. Kɛ́ sée àle-mii' nɛ́ kpɔ́-bhàà àa nuu à gi koo láà, àle ginɛ́bò' tóyèa kpeá kwɛi lɛ́ɛ.
13	Sée mɛ̂ɛ páipái' wó nuu kwɛi láà, àng tó ké ga', ke àng kpɔ́yè ké Aatana lé, ke é wúnsɛ̀sɛ̀bò' à kɛ̀ɛ̀ àng nɛ̀-wùn píníwo' láà, ke òo kɛɛ àng nɛ̀ bhe. Kɛ́ wo à lóó tó' wo' dɔ́ɔ́n-á, le wó à-lèè ye', le wó wo liágo' à-wùn lé le. È gò' àle gi, wo nuu wo leng dɔn-à tɔ́ɔ̀a, le à gàn' nuu zí àng yàànlé wo: zaa gie-mɛ̀ɛ̀' woá sɛ́ɛ́ tà zé le.
14	Sée mɛ̂ɛ' wò wɩɩ kwɛi láà, mɛ̂ɛ ké à-lèè ye àng wʋʋ bhà kpanggaale wo: wò tuàn wo nɛ yaalé-lèè leng' guoà le.
15	Atoosiwo àng zowɛ́ɛ́' woo nù tóà naayèa wó go' lùu ye' àle lé, ke wo woo mɔɔà sɛsíá, ke wò ló dɛ́ɛ wo bhi.
16	Kɛ́ à mai-lèè' bhi, àle ye: àng nɛ yaalé-lèè sɛ̀yè' é lɔngwɛ́ɛ́ gi-lèèa, ke à lɔ̀ɔ̀' nuu kpɔ́yèa àng lé láà, wó nùù àle guoà le. À kɛ̀ɛ̀ kwɛiyè láà à gi, wò à pè' wo: wo nɛ' Aatana-á laá, à-yɛ̀ɛ̀ àa zí Aatana lekini kɛɛ. Ale kɛɛ le é àng yàlèè mɔ̀ng-baayèa e pé péele le.
17	È gò' àle gi, Ablam kpɔ́yè do' nuu Aatana lé láà, é wɩ̀ɩ̀ sáà gò e gbe Izaaki-a-wùn bhà àle gi, ke Aatana' à gidan le. Ablam ké sáà go' ebhà nɛ́wɛ́ɛ́ do láà à gá Aatana nɛ̀ bhi kwɛi, sée ke Aatana leng' woo píníwo à nɛ̀ nɛ́ do láà à-wùn gi,
18	ye: I ginɛ́ yemò' i tɔ́- tóà àng bhà láà, àngle wò tóà i gbe Izaaki' à yuɛn-á le.
19	E nuu kwɛi, ke Ablam ké zʋʋgɔɔn-ii ye: Aatana ké kpókpóá, le è mɔɔ lefienɛ́ wo mɛ̂ɛ' wa ga àng góá gɔɔ̀le ke wò zana le. Pɔɔn' à kɛɛ' ke Aatana' Ablam gba dɛ́ɛ wo' Izaaki-a ye mɛ̂ɛ' a gó gɔɔ̀le ke a zana à nɛ̀, àle lɛ́ɛ.
20	Izaaki leng kpɔ́yè' nuu' wo' zí Aatana lé láà, é lúbhawò- e gbe Zakɔbu ni Ezau bhà àle gi, ke à gi-wùn- nù kɛɛ àng nɛ̀ dɔ̀ya le.
21	Zakɔbu leng kpɔ́yè' nuu zí Aatana lé, le é lúbhawo' e gbe Zozɛfu pe gbebò piilɛ láà àng tó bhà dolodolo le. E nuu kwɛi, ke à lekini pe ga bha' bhɔ tó wo, le é e tààlà-yìlì gbaan' e gɔ̀n, le é tɔ́ ban' Aatana bhà le.
22	È gò' zí àle gi, Zozɛfu leng kpɔ́yè' nuu' wo' Aatana lé láà, à gàn' daa' à yàan téei ye: ebhà sii àa dɔ́ɔ́n-á koo, le é Izalae-bò gò nuanɛ̀ gi Ezite lùu gi-wùn to' liélé, le é à pe' le. É wʋʋ kpɔ̀- àng bhà àle gi ye: wó lóà, wò ló nà e dɔwɛ́ɛ́bòa le.
23	Ale zìpieta dɔ̀ya, Moizi nɛ ni à laa-nù lekini kpɔ́yè' zí nuu Aatana lé, le wó à-nɔ̀ɔnɛ́yè bànàkpɔ' mɛ̂ɛ yakaá le. Wó à gaa' wo: à-nɔ̀ɔnɛ́yè ké sɛ̀a laá, wòo súó, le wó tólógikɛ̀ɛ̀ go' gwilinɛ Falaon' tɔ́ng' dɔ' láà à bhà le.
24	Moizi leng' bo' tóá kpáaá, à kpɔ́yè ké nuu Aatana lé, le òo wɩ́ɩ́ à bhà ke wò e lee Falaon lúà nɛ́ le.
25	E e wɛ̀ilèè gò Aatana-à náò pé-yè fìlayányè wo' e yàà bian-pɔ̀ɔ̀n yɔ́ɔ́n wɛ́ɛ́-yè-le bhà golo dini bhà.
26	Atoosiwo e nuu wɩ́ɩ́à ye: yɛ́ɛ' è dɔà e bhà Izalae la-mɛ̀ɛ̀ Klisi' à nu-wùn' bhe à-kɔ̀i láà, àle ké fìláá Ezite lùu gi-wèlè tó sɔlɔyè-le bhà. À zʋʋ' nùù Aatana' nuu leekpɔ̀ɔ̀tili-sànma sɛ̀' yaayèa à gɔ̀n láà àle gi, le é nuu wɩ́ɩ́à kwɛi le.
27	Moizi kpɔ́yè' nuu' wo' Aatana lé láà, àle kɛɛ le é zí go' Ezite lùu gi, ke súó do lefienɛ́ àa à gi gwilinɛ Falaon' nuu wɛí sieyè' gá à bhà láà à-wùn gi le. Moizi ké to' e wʋʋ tà kelekelele ye mɛ̂ɛ' à yáán' Aatana' mɛngge àa à ye à bhà láà à nɛ̀.
28	É go' àle gi, à kpɔ́yè do' nuu Aatana lé láà, é Paki-sàà góyè yàà Izalae-bòà wúluá àle gi, le é zí wɩɩ' àng nɛ̀ ye: wò bháábò' zɛà láà, wò à yuɛn gie kwíi kóngpalabò bhà le. E wɩɩ' ye: wò à kɛ̂ɛ kwɛi, ke Aatana-à kɩ́ɩ́la' è nuà Ezite-mɛ̀ɛ̀bòà nɛ́ miɔnnɛ́ fɔ́ɔ́lébò zɛi láà, à kɔɔ òo nù zin Izalae-bò-le pe nɛ́ ke bhà.
29	Izalae-bò tó kpɔ́yè' nuu zí Aatana lé, le wó kɔ̀ɔ̀yí Tɛ́ɛ́n kaan' wo gɛɛn tà ye mɛ̂ɛ' gie lee kpɛ́ɛ́-lèè bhà le. Kɛ́ Ezite-mɛ̀ɛ̀bò-le wó wɩɩ' wo: wo leng wóò gie bhi ye Izalae-bò nɛ̀ laá, yí' àng sí' wo', le àng tó páipái wunbílí' to' yí gɔ̀n le.
30	Izalae-bòà kpɔ̀ Aatana lé-yè do láà, àle zí à kɛɛ', le tong' nuu káányèa Zeliko-pɛ̀ɛ̀ zì láà, à tó' gbulu', ke wa bo gieá à zì yáángɛɛn saapiilɛá le.
31	Kɛ́ zùà-nɔ̀ng ke' wó nuu à leeà Laabu láà, àle' zí kpɔ́' wo' Aatana lé, le é Izalae-bòà gwili lɛgaa-mɛ̀ɛ̀bò' lo' láà àng-tɔ̀ɔ̀ kun' sɛ̀a le. Ale kɛɛ le Izalae-bò wòo à zɛ gbánngnɛ̀ gò Aatana-wùn bhà-mɛ̀ɛ̀bò' nuu Zeliko láà àng pé le.
32	È gò' àle gi, án à-mɛ̀ɛ̀ ke' pe zí le? Bha' woo nù tóà n gɔ̀n dɔ́ɔ́n-á, ke Zedeon ni Balaki oo, Samson ni Zɛfute oo, Davi ni Samiɛ oo, ninà Aatana wʋʋ léban-mɛ̀ɛ̀ paánbò' nuu lii láà, ke án woo àng tó páipái-wùn gɛingóà dolodolo.
33	Angbhà kpɔ̀ Aatana lé-yè láà, gɛ̀ilɛ àa àle bhà, le wó lùubò go', le wó wúnbò' é dɔɔyèa Aatana gi à kɛɛ', le Aatana' píníwo' àng nɛ̀ pɔɔn' à-wùn gi, wó à sɔlɔ' le. Wo zí yaabò biin léta',
34	le wó pai kpákpaabò' à nɛ̂ɛ' nuu mànàngmànàng góà à tó lii', le wó la' wo zɛyè gɔ̀n bòo kilíkilílé le. È gò' àle gi, sé àa nuu àng yemò' nɛ̀ fɔ́ɔ́lé, kpɔ̀ Aatana lé-yè ké bháa dɛ́ɛ daa' àng gi, le àng kemò' to' kwɛ́lɛ́á gwili gɔnyè bhà, le wó gwiligbá nuyèbò kɛɛ' wo doá le.
35	Nɔ́ngbò' kpɔ' Aatana lé láà, àng kemòà kwíle-mɛ̀ɛ̀' ga', e zana', le wó à kɔ́nɔ́wo' àng nɛ̀ le. Kɛ́ sée kpɔ̀ Aatana lé-wùn do láà à gi, mɛnggoò' zí nuu bhi, wó àngle wɛ̀ikɛ̀ɛ̀' wo', le wó àng zɛ' le. Wòo wɩ́ɩ́ wo biin maa-wùn bhà, ke wó la. Sée wó à kɛ̀ɛ̀ kwɛi ke Aatana- ga-mɛ̀ɛ̀bò zana' woà, ke é sɛ̀a tòsɛ́ɛ́là-yè' kó à gi é àle bhà láà, ke wó nù daa àle bhɛɛ gi le.
36	Ang kemò ké to' biin sóósì à bhà-pɔ̀ɔ̀n-a, le àng kemò' to' sàbhiliwɛ́ɛ́ légbaá, le wó zí àng kemò yele' yɔ̀ɔ́bhɛɛá, le wó àng daa' kààso gi le.
37	Wo mɛnggoò zɛ' gwɛɛ bìlì àng bhà-yèa, le wó mɛnggoò tu kaan' à gi sííá, le wó zí mɛnggoò-le zɛ' siàng-wɛ́ɛ́á le. Ang kemò' nùù bháá kwîi ni bhʋʋ kwîibò' daaà wo bhà wéléá, le wó nuu lóà gieá zía ni zía, ke àng ló-lèè tɩnggbɩɩle àa bhe le. Pɔnggepɔ̀ngge àa nuu àng gɔ̀n, bhaamɛ̀ɛ̀bò ké nuu àng wɛ̀ikɛ̀ɛ̀woà, le wó nuu gii kpɔ́à àng tà le.
38	Wo nuu gieà fúà tà-lèèbò ni tɔɔn bhà-lèèbò gi, le wó nuu yiià gwɛɛ-yɛ̀ɛ̀ ni tólòbò gi le. Kɛ́ lúyáán tà-mɛ̀ɛ̀bò wàa bhɔyè' gá mɛ̂ɛbò láà àngle suu sɔlɔ-mɛ̀ɛ̀ gi, le wò àng kun kwɛi le.
39	Sée mɛ̂ɛ páipái' wó nuu kwɛi láà, àngle tó kɛɛ-wùn' Aatana zʋʋ' kun' àngbhà kpɔ̀ à lé-wùn gi le. Kɛ́ Aatana' leekpɔ̀ɔ̀tili-sànma' à nu-wùn píníwo' àng nɛ̀ láà, àng ke òo àle sɔlɔ líe bhe.
40	Atoosiwo wúnsɛ̀ ye' à lé- gie fɔ́ɔ́-mɛ̀ɛ̀bò-le pe láà à tà dɔ́ɔ́n-á, Aatana ké nuu à pé ke è àle kɛ̂ɛ tenglé-yààn é à gi-mɛ̀ɛ̀bò ko nɛ̀ le. Ale kɛɛ le òo zí wɩ́ɩ́ à bhà ke àng pe layè wun- ban péng, ke ko pe òo zin kélé bhe le.