1	Mɛkisedɛki láà, e nuu gwilinɛá pɛ́ɛ' wò à lee Salɛm láà à wunlé, le é zí nuu Aatana Kpáalàkpàà' é lɔngwɛ́ɛ́ gi tɛ́nglà láà àbhà yíkpáá-mɛ̀ɛ̀a le. Ablam' nuu góà gwili bhà tée' gi, ke à kɔɔ' bo gieá gwilinɛbò' é lo' àng kɛɛi láà àng tó gɔ̀n, Mɛkisedɛki do láà àle lo' dɔi à gɔ̀n zaá, le é lúbhawo' à bhà le.
2	É bo', le Ablam' pɔɔn' ye' gwili pé láà, é à tó páipái líya yaa' buu buu, le é à líya buunààbò to' à wun-á, le é à nu' à nɛ̀ le. Mɛkisedɛki-tɔ̀ láà à zíà fɔ́ɔ́lé' é bhe, àle mai-wùn pe-gwìlìnɛá le. È gò' àle gi, àle do láà àle nuu gwilinɛá Salɛm-pɛ̀ɛ̀ wunlé le. Sée wò à pè' Salɛm-gwìlìnɛ, ke wo wɩɩ wo: bhaamɛ̀ɛ̀ niidaa-gwìlìnɛ.
3	Mɛngge àa sée Mɛkisedɛki láà à nɛ ni à laa ni à bhɛ́ma do lefienɛ́ ke dɔn. À lengdo láà, wàa zí à kpɔ́-kɔ̀ɔ̀ ni à ga-kɔ̀ɔ̀ ke peyèa sɛ́ikwɛ́ gi lɛnggelɛ̀ngge gi. À lébhà- ye Aatana-à nɛ́' nɛ̀ le. A-wùn gi, é daa' yíkpáá-mɛ̀ɛ̀a kɔɔ' gi liilììlii, è àle gi kwɛi do le.
4	Ka leng kà à gaa. Zuifu-bò ko bâa Ablam lekinilèkini-le' pɔɔn' ye' gwili pé, é à tó wun nu' mɛ̂ɛ' à nɛ̀ láà la ò, ke àle-mɛ̀ɛ̀ dɔ̀lèè àa kpáa lenglèng-leá è?
5	Atoosiwo Aatana' tɔ́ng' dɔ' láà, e à pe' à gi ye: A-lèè ké à bhà ke Izalae gbe Levi ginɛ́ yemò' wò tóà yíkpáá-mɛ̀ɛ̀bòa láà, wò pɔnópɔ̀nó wun kún Izalae paánbò gɔ̀n. Sée wò à kɛ̀ɛ̀' kwɛi, ke wò pɔɔn wun láà à kún-ii wo lekini nɛànɛ́bò' àng gɔ̀n lɛ́ɛ. Kɛ́ ke wò pɔɔn wun kun mɛ̂ɛbò' àng gɔ̀n kwɛi láà, àng lekini ké zí Ablam ginɛ́bòa ye àng nɛ̀.
6	Kɛ́ Mɛkisedɛki-le àa nuu Levi ginɛ́á, le àle' pɔɔn wun kun' Aatana' nuu píníwoyèa Ablam ye' à nɛ̀ láà àle gɔ̀n, le é zí lúbhawo' à bhà le.
7	Sée ka leng ká à gànnu ka: mɛ̂ɛ' è lúbhawo mɛ̂ɛ bhà, ke àle dɔ̀lèè' kpáaá, le è gie é lúbhawoii mɛ̂ɛ ye' bhà láà àle tà le.
8	Kɛ́ sée wò pɔɔn wun nu yíkpáá-mɛ̀ɛ̀bò' àng nɛ̀ láà, ga ké àngle tó bhà. Kɛ́ Ablam-le' e pe pɔɔn wun nu' Mɛkisedɛki' à nɛ̀ láà, Aatana-à sɛ́ikwɛ́ ké wɩɩ ye: àle ké yáán lɛ́ile.
9	-10 À kɛ̀ɛ̀ kwɛiyè láà à gi, Ablam' pɔɔn' ye' gwili pé, é à tó wun nu' Mɛkisedɛki nɛ̀ tée' gi láà, ke à ginɛ́ Levi' à pe ginɛ́bò- pɔɔn wun kun bhaamɛ̀ɛ̀bò gɔ̀n láà, òo bhɔ bhe. Kɛ́ yàani òo bhɔ bhe, àle ni à ginɛ́bò láà wo nuu wo bâa Ablam gwílé Mɛkisedɛki lò dɔi à gɔ̀n zaá téei. È tò' àlei kwɛi, ke a tó ye: àngle tó' zí pɔɔn wun go' Mɛkisedɛki nɛ̀ do lɛ́ɛ.
11	È gò' àle gi, Aatana' tɔ́ng' dɔ' Izalae-bò nɛ̀ láà, à zi' nùù gbaanyèa Levi ginɛ́bò tò yíkpáá-mɛ̀ɛ̀a-yè láà àle gi le. Kɛ́ é woo nù tóà ke Levi ginɛ́bò' wó yíkpáá-mɛ̀ɛ̀a láà, wó nùù bɔ́n gò mɛ̂ɛ bhà fɩ́fɩ́lé-yì' kpááà maiá laá, ke yíkpáá-mɛ̀ɛ̀ bhɛ́i' è tóà ye Mɛkisedɛki nɛ̀, ke àle àa ye Levi ginɛ́ Aalon-le nɛ̀ láà, à nu gɛɛn àa woo tóii bhe.
12	Sée wó yíkpáá-mɛ̀ɛ̀ fɔ́ɔ́yèbò góà fàànlé tée' gi, ke wò mɛ̂ɛ dɛ́dɛɛbò yaa bhi láà, à-lèè ké à bhà ke wò zí yíkpáá-tɔ̀ng fɔ́ɔ́yè láà à lekini gó, ke wò à dɛ́ɛ dɔ.
13	E sée kwɛi maiá, wò koà Gwilinɛ Kpáa' é Yesu-á láà àle-wùn daa gaa gi, le wò à kpɔ̀ɔ̀bhàkpɔ Mɛkisedɛki-wùn-a kwɛi le. Atoosiwo Yesu leng ké nuu góà Izalae-kwììlé-yɛ̀ɛ̀ bhɛ́i ke gi, ke àle-kwìì láà à ginɛ́ ke òo woo tó yíkpáá-mɛ̀ɛ̀a Aatana-à gwɛgóló lé fɔ́ɔ́lé lii do bhe.
14	Pɔɔn- àle kɛɛ kwɛi, àle ye: koà Gwilinɛ Kpáa láà à gò Zuda-kwìle-wùn ké mɛnómɛ̀nó yàànlé. Ale àa bànàkpɔ́-wùn-le keá. Sée Moizi òo yíkpáá-mɛ̀ɛ̀ ke gò kwíle bhi-le-wùn pe lii Aatana-à tɔ́ng-sɛ̀ikwɛ́ gi. Yíkpáá-mɛ̀ɛ̀ dɛ́ɛ' é ye Mɛkisedɛki nɛ̀
15	Kɛ́ wún' è à tó tàpóló ke woà zí ko nɛ̀ kpangkpangle, àle yíkpáá-mɛ̀ɛ̀ bhɛ́i ke yàà Mɛkisedɛki-kɔ̀i-wùn-a le.
16	Bhaamɛ̀ɛ̀ bhɛ́ibò-le ke wòo àle yaa yíkpáá-mɛ̀ɛ̀a wo leng pe wúlubòa. Kɛ́ sii' àa yɛn é nuu' wo' à gi láà, é dɔ̀- àle gi, le é to' yíkpáá-mɛ̀ɛ̀a le.
17	E sée kwɛi maiá, Aatana-à sɛ́ikwɛ́ ké à peyèa tàpúúá à-wùn gi ye: Í tóà yíkpáá-mɛ̀ɛ̀a kwɛi kwɛi kwɛi Mɛkisedɛki-kɔ̀i, à nààlé àa tóii.
18	À bɛɛn' zɛyè' gá kwɛi láà, àle tóyèa wúlu fɔ́ɔ́yè gó-kɔ̀ɔ̀a le. Atoosiwo sé àa nuu àle nɛ̀, le à tɔnɔ àa nuu bhe koo le.
19	Pɔɔn- àle kɛɛ kwɛi, àle ye: Moizi-à tɔ́ng-le òo nù Aatana zòàwùn kɛɛyè ke wun ban péng. Kɛ́ wúlu dɛ́ɛ' é fìláá Moizi-à tɔ́ng-le bhà, àle a daa mɔ̀nglé tò le. Ko zʋʋ- àle gi dɔ̀yáa gá, le gɛ̀ilɛ àa àle bhà, le kó yɔ́n-ii Aatana gi za le.
20	È gò' àle gi, Aatana òo e kaiwo yíkpáá-mɛ̀ɛ̀ yemò' nuu fɔ́ɔ́lé láà àngle-wùn gi.
21	Kɛ́ é Yesu' yaa' yíkpáá-mɛ̀ɛ̀a dɔ̀ya láà, é e kaiwò- àle nɛ̀ le. Atoosiwo e à pe' ebhà sɛ́ikwɛ́ gi ye: Nle Gwilinɛ Kpáa án kaiwoyèa. Sée máá góii n wʋʋ tà. Án wɩɩ ma: í tóà yíkpáá-mɛ̀ɛ̀a kwɛi kwɛi kwɛi, le à nààlé àa tó le.
22	À kɛ̀ɛ̀ kwɛiyè láà à gi, sɛ̀lúnɛ̀ dɛ́ɛ' é daayèa Aatana ni bhaamɛ̀ɛ̀bò ko finibhà, ke é sɛ̀a ke à lé- gie à zììyè tà láà, Yesu' nù- tói àle zigbààngiá le.
23	È gò' zí àle gi, yíkpáá-mɛ̀ɛ̀ fɔ́ɔ́yèbò láà àngle ké nuu kpeá, atoosiwo wo nuu gaà ziàn, le wàa nuu mɔɔà lóá nà woà yí kpááyè láà à gá liélé le.
24	Kɛ́ Yesu-le ké bhe lɛ́ile, àa ga gbonggbongle. À kɛ̀ɛ̀ kwɛiyè láà à gi, à bhàwùn àa à bhà ke è e pe yí kpááyè láà à tu tó mɛngge bhɛ́i ke gɔ̀n.
25	A-wùn gi, sé ké à nɛ̀, ke mɛ̂ɛ' wò daa à zíà ke wò yɔn Aatana gi láà, è àng la kɔɔtókɔ̀ɔ̀tó gi, ke è à wun ban péele. Atoosiwo àle àa ga gbonggbongle, le é yaayèa àng lébhàiwo-yàà gi lɛ́ile le.
26	È tò' àlei kwɛi, ke ko bhàwùn' nuu yíkpáá-mɛ̀ɛ̀ kpáa leng' bhà láà, àle Yesu-á le. Atoosiwo àle yaayèa Aatana-à yaa gi kɔɔtókɔ̀ɔ̀tó gi, le pe àa à bhà, sée le bɔ́n kekekèke àa à bhà le. E góyèa wúnyóo kɛɛ-mɛ̀ɛ̀bò pé, le é lóyèa yaai lɔngwɛ́ɛ́ gi-lèèbò tó páipái wunlé le.
27	Kɛ́ àle pe àa ye yíkpáá-mɛ̀ɛ̀ fɔ́ɔ́yèbò' àng bhàwùn' nuu sáà dɛ́ɛ gò yáángɛɛn-le tóá-wùn bhà láà àngle pe nɛ̀. Atoosiwo àngle' nùù bɔ́n gò wole fɔ́ɔ́lé wo bhà-sàà' góà, le wò nuu Izalae paánbò pe góà le. Kɛ́ Yesu-le' e pe sáà do' go' e lekini wunbílí nuyèa láà, àle to' à pe bhaamɛ̀ɛ̀bò bhà-sààa do le.
28	Moizi-à tɔ́ng-le- mɛ̂ɛ yemò' àng yaa yíkpáá-mɛ̀ɛ̀ kpáèa ziàn láà, àngle tó pe sɔng ké to àng bhà. Kɛ́ Aatana- e gbe' pe kekekèke àa à bhà àle yaayèa yíkpáá-mɛ̀ɛ̀ kpáèa, é e kaiwo' wʋʋ' gi láà à gá tɔ́ng yaayè zìpieta dɔ̀ya-leá le. Sée àle tóà bhi kwɛi kwɛi kwɛi, le àbhà yíkpáámɛ̀ɛ̀nɛ̀ àa yɛn le.