1	Wó bo' à peá kwɛi, mɛ̂ɛ' wó nuu bhi láà àng tó páipái' walá' wo' kiá do, le wó lo' nàa Yesu-á Pilati zué le.
2	Wó waa' bhi, le wó à daa' à nɛ̀ wo: Mɛ̂ɛàn é, kó à ta', ke e koà lùu é à gi-mɛ̀ɛ̀bò tó wunbílí gisieii, ke e à peii àng nɛ̀ ye: mɛngge òo níisɔ̀ɔ́n bhɔà gwilinɛ Sezaa nɛ̀. E wɩɩ zí ye: ele é Klisi-a le. È à pè' kwɛi, ke e wɩɩ ye: gwilinɛ' e lekiniá le.
3	Wó à pe' kwɛi, le Pilati' Yesu bhàgilawo' ye: Í wɩɩ ye: Zuifu-bòà gwilinɛ' i gá maiá la è? Le Yesu' à yoobɔ' à gɔ̀n ye: I àle peii lɛ́ɛ.
4	É à pe' wo' kwɛi láà, Pilati' wɩ̀ɩ̀ yíkpáá-mɛ̀ɛ̀bòà wunmɛ̀ɛ̀bò ni mɛ̂ɛ páipái' wó nuu bhi láà àng tó nɛ̀ àle gi ye: Sɔng' è tóà mɛ̂ɛ é à bhà, ke è tó à zɛ gɛɛn-á, máá à yeyèa.
5	Kɛ́ le wó nuu gbaan lesósó woà à gi vɛɛɛnle wo: Kó wɩɩ ko: è lùu tó wunbílí gi' sieii, è lo liangbò' zɛá ziàn bhaamɛ̀ɛ̀bò nɛ̀ dɔ́ɔ̀nle láà àleá le. E à zigo' Galilee lùu gi, le ya gie nàa Zudee lùu tó páipái gi, le ya nu nà à bhɛɛá, le ya waa Zelizalɛm zé le. Lò nà Yesu-á Elɔdi zué-yè
6	Pilati' bo' Galilee lùu-le tɔ́ maá kwɛi, le é bhàgilawo daa' ye: Mɛ̂ɛàn é la ò, ká wɩɩ ka: è gò Galilee lùu gi è?
7	Wó àle iin pe', ke Pilati' bo à gànnuá ye: Yesu- gò Galilee lùu' gwilinɛ Elɔdi' à wunlé láà àle gi laá, le é à bɔ' Elɔdi nɛ̀ le. Atoosiwo Elɔdi leng ké nuu Zelizalɛm bhi kwɛpoo à gi.
8	Yáánpà Yesu bhà-wùn ké sɛɛ lekinilèkini wo' Elɔdi nɛ̀, atoosiwo e nuu kwɛi, ke ya woo mɔ́ à-wùn maà mɛ̂ɛbò tà, le à lekini' nuu à pé ye: wo ni à gá wó ké ta kwɛngdo ke gi le. E nuu zʋʋ yaaà à nɛ̀ ye: è à yeà kwee' gi, e sɔ́n-wùn do ke kɛɛà e yàànlé.
9	A-wùn gi, Yesu' waa' bhi, Elɔdi ké bhàgilawo daa' à gɔ̀n kpeá, kɛ́ Yesu òo à kekekèke yoobɔ à gɔ̀n.
10	Yíkpáá-mɛ̀ɛ̀bòà wunmɛ̀ɛ̀bò ni tɔ́ng dɔ-mɛ̀ɛ̀bò ké nuu dɔɔ bhi, le wó nuu Yesu daaà, ke wo gbaan-ii à gi vɛɛɛnle do le.
11	Elɔdi ni ebhà sɔ́yabò tó' sɔ̀ɔ̀ sóósíà Yesu bhà àle gi, le wó à gaa' yáàngóngpéá le. É go' bhi, le Elɔdi' gwilinɛbò bhà-wèlè do daa' à bhà, le é à lésɛi', le é à bɔ dɛ́ɛ wo' Pilati nɛ̀ le.
12	Yáángɛɛn do láà àle to' Pilati ni Elɔdi dàà dɔ́manɛ̀ gi-kwèèiá le. Sée wó nùù wo ké yáò' à gá fɔ́ɔ́lé-le bhà le. Pilati-à Yesu lénù à zɛ-mɛ̀ɛ̀bò nɛ̀-kɔ̀ɔ̀ (Matie 27:15-26; Maki 15:6-15; Záàn 18:39-19:16)
13	Wó waa' Pilati zué, le é yíkpáá-mɛ̀ɛ̀bòà wunmɛ̀ɛ̀bò ni mɛ̂ɛ tiàànlebò ni bhaamɛ̀ɛ̀ tìngtíng' nuu bhi láà àng tó ban' ké tà, le é wɩɩ' àng nɛ̀ ye:
14	Ká nu' nàa mɛ̂ɛ é à gá n nɛ̀ ka: àle bhaamɛ̀ɛ̀bò wunbílí gisieii le. Kɛ́ má woo à bhàgilawo kanó ka yàànlé, le sɔngbò' ká à naaii à bhà láà, mɔ́ɔ́ à do lefienɛ́ ke ye à gbólóá le.
15	È gò' àle gi, Elɔdi lekini òo zí wúngge ye à bhà. Pɔɔn- à kɛɛ ke é à lésɛíyèa n nɛ̀ é, àle lɛ́ɛ. È tò' kwɛi, ke wúnyóo yemò' é mɛ̂ɛ zɛ̀ à gi-wùn-a láà, àa àle ke kɛɛyèa.
16	À kɛ̀ɛ̀ kwɛiyè láà à gi, máà à pe' wo ke wò à maa sàbhiliwɛ́ɛ́á, ke án n kɔɔ gó à zì le. [
17	Pɔɔn' à kɛɛ' ke Pilati' à pe' kwɛi, àle ye: Paki fɛ́ɛti' nuu bhɔà ziàn kɔi dolodolo, kààso gi-mɛ̀ɛ̀ do yɔ̀ɔ̀ Zuifu-bò nɛ̀-kpàn ké nuu Pilati bhà.]
18	Kɛ́ mɛ̂ɛ' wó nu' láà, wó kɔɔ gò kààso gi-mɛ̀ɛ̀ ke zì-wùn-le ma' kwɛi, àng tó páipái' sɔɔ' wo' gbáláà ké bhà kpókpóá wɔ̀ɔ̀ɔ̀le wo: Mɛ̂ɛàn é àle lénu, ke wò à zɛ, ke í i kɔɔ gó Balabasi' à zì ko nɛ̀ le.
19	Sée Balabasi láà e dààkélé kpáa daa' pɛ́ɛ yáànbhà bhi, le é bhaamɛ̀ɛ̀ zɛ' le. Wó à dàà kààso gi àle-wùn gi le.
20	Kɛ́ é nuu' wo' ke kɔɔ gò Yesu zì lɔ̀ɔ̀ ké Pilati-le bhà láà, le é zí liangzɛ dɛ́ɛ wo' mɛ̂ɛ' wó nuu banyèa ké tà bhi láà àng nɛ̀ le.
21	Kɛ́ le wó gbaan' gbáláà wo: Kó wɩɩ ko: à gbaan' è wo yílí bhà le. À gbaan' è wo mɛ̂ɛ zɛ̀ à bhà-yìlì bhà le.
22	Pilati' à yoobɔ̀- àle gi gɛnyààn yakanààa, le é wɩɩ' mɛ̂ɛbò láà àng nɛ̀ ye: Kɛ́ án wɩɩ ma: é mɛɛ-wùn yóo-le kɛɛ' le? Atoosiwo wúnyóo yemò' wò mɛ̂ɛ zɛà à-wùn gi, máá àle dokedòke yeyèa à bhà. Le àle' kwɛi, máà à pe' wo ke wò à maa sàbhiliwɛ́ɛ́á, ke án n kɔɔ gó à zì le.
23	Kɛ́ àngle wó nùù gbálá lesósó' woà kpókpóá do wo: wò Yesu gbaan' wo yílí bhà le. Sée wó nuu gbálá' woà kwɛi láà, àng wʋʋ ké nu' mɔɔi Pilati bhà,
24	le wó nuu wún' peà à nɛ̀ láà, é wɩɩ' à bhà àng gɔ̀n le.
25	À kɛ̀ɛ̀ kwɛiyè láà à gi, àng pe zòà-mɛ̀ɛ̀' wó à pe' láà, Pilati' e kɔɔ gò- àle zì le. Sée mɛ̂ɛ láà, dààkélé daa-mɛ̀ɛ̀ ni bhaamɛ̀ɛ̀ zɛ-mɛ̀ɛ̀' nuu à gá, le wó nuu à daayèa kààso gi à-wùn gi le. Kɛ́ le é Yesu-le lénu' àng nɛ̀, ke àng pe' è sɛɛà àng nɛ̀, wò à kpɔ́ à tà le. Yesu gbààn yílí bhà-yè (Matie 27:32-44; Maki 15:21-32; Záàn 19:17-27)
26	Sɔ́yabò' nuu lóà nà Yesu-á à zɛ lià láà, wo Silɛni-mii ke' wó nuu leeà Simon à ta' zaá, ke e góii boi. Wo à kun', le wó à tàdɔ' Yesu zɛ̀ à bhà-yìlìa, ke è à sí à nɛ̀, ke è ló nàa à wɛì le.
27	Mɛ̂ɛ' wó nuu lóà Yesu wɛì à zɛ lià, wo nuu kpeá yèèèle. Nɔ́ngbò tó ké nuu àng kpe gi, le wó nuu wosíà, ke wo kóò kpɔ́ii à bhà le.
28	Kɛ́ le é e wɛ̂ɛ seela' àng tà, le é wɩɩ' àng nɛ̀ ye: Zelizalɛm-nɔ̀ngbò, kao wosíà nle n bhà. Wánglafila, kà wosí ka lekini ni kaà náò' àng bhà le.
29	Atoosiwo bha ke' bhi, e bhɔà, le wò à pe wo: kɔifɩɩ-nɔ̀ngbò oo, ni nɔ́ng yemò' wòo nɛ́ kpɔ́ do bhe oo, ninà mɛ̂ɛbò' wòo yɔ́n nu nɛ́ nɛ̀ do bhe láà oo, àngle pe ké sɛ̀a.
30	À bha láà è bhɔ̀', bhaamɛ̀ɛ̀bò ké à peà wo: tɔɔnbò' ká dɔɔ é, ni tíníkpulubò' ká é, ká bhuolá ko tà, ke kó bànàkpɔ́ ka wala.
31	Atoosiwo wó wún suu' é à kɛɛii nle yílí múnu nleá lee' gi é la ò, le wò mɛɛ kɛɛà yílí kpɛ́ɛ́bò kale kaá le?
32	Wó nuu lóà nà Yesu-á tée' gi láà, wúnyóo kɛɛ-mɛ̀ɛ̀ bhɛ́ibò piilɛ ké nuu bhi, le wó nuu lóà àng tó zɛi kià nà Yesu-á le.
33	Tɔɔn' wò à lee bhaamɛ̀ɛ̀ wunwɛ́ɛ́-tɔ̀ɔ̀n láà, wó waa' à gwenglé, le wó Yesu naa' yílí bhà bhi, le wó pɔ́ngti gbaan' à kɔɔ ni à gɛɛnbò tà le. Wo zí wúnyóo kɛɛ-mɛ̀ɛ̀bò piilɛ láà àng tó nàà yílí bhà à-kɔ̀ɔ̀ do láà àle gi le. Mɛngdo pe yílí ké nuu gbaanyèa à kɔɔ sɛ̀ tà, le mɛ̂ɛ dini pe' nuu à kɔɔ kpáná tà le.
34	Kɛ́ wó nuu Yesu-le naaà yílí bhà, e e zɛ-mɛ̀ɛ̀bò lébhàiwo' Aatana zì ye: N nɛ, bhè àng bhàwùn tó. Atoosiwo wó wún' kɛɛii é, wàa à gànnu. Wó bo' à gbaan-á yílí bhà kwɛi, le wó kpékpé maa' à bubhà-gbààbò tà, ke à ye' è tóà mɛ̂ɛ ye' à gɔ̀n, ke wò à dɔn le. Ale to' à bubhà-gbààbò gúlú-kɔ̀ɔ̀a le.
35	Ale' kɛɛii kwɛi láà, ke bhaamɛ̀ɛ̀bò ké dɔɔ bhi yèèèle, ke wo lɛgaaii. Kɛ́ Zuifu-bòà wunmɛ̀ɛ̀bò ké nuu sóósíà à bhà wo: E mɛ̂ɛ bhɛ́ibò-le layèa tò màà, kɛ́ è tò' ke àle Izalae-bò ko la-mɛ̀ɛ̀ Klisi' é Aatana zòà-mɛ̀ɛ̀a láà à gá maiá laá, ke è e lekini la bhee.
36	Sɔ́yabò' nuu bhi láà, àng leng ké zí nuu sóósíà à bhà, le wó nuu yɔ́n-à à gi ziàn, le wò wɩ̂ɩ waanwaanyè dɔ à biin bhà,
37	le wò wɩɩ wo: I tò' Zuifu-bòà gwilinɛá, bhè i lekini la bhee.
38	Pɔɔn- à kɛɛ ke wó nuu à peà kwɛi, àle ye: à bɛɛn ké nuu zɛyèa à zɛ̀ à bhà-yìlì láà à bhà à tà tɛ́nglà wo: Mɛ̂ɛ é, Zuifu-bòà gwilinɛ' à gá le.
39	Wúnyóo kɛɛ-mɛ̀ɛ̀ piilɛ' wó àng gbaan' yílí bhà à pé láà, mɛngdo ké nuu wʋʋɛ́ɛ́ dɔà à gɔ̀n ye: Yóó à pe tò ye: ile í Izalae-bò la-mɛ̀ɛ̀ Klisi-a la è? È tò' maiá, bhè i lekini la, ke í zí ko lekini ko la a.
40	Kɛ́ é à pe' kwɛi, le mɛ̂ɛ dini láà é à sie' e bhá bhà, le é wɩɩ' à nɛ̀ ye: Wó wúnngdo' kpɔ́ii à tà láà, na wò zí àle kpɔ́ii ko ni i gá ko tà, le ile yáá súó Aatana gɔ̀n láà?
41	Kɛ́ wún' wó à kpɔ́ii ko tà é, à kpɔ̀ kole ko tà-lèè' à gá le. Atoosiwo kó àle-lèè' guo' kó nuu wúnyóyoobò' kɛɛà ziàn láà à gá le. Kɛ́ mɛ̂ɛ é àle òo wúnyóo ke kɛɛ.
42	Mɛ̂ɛ dini láà é bo' à peá kwɛi, le é wɩɩ' Yesu nɛ̀ ye: Yesu, i nuà ibhà gwilinɛnɛ̀ kɛɛi kwee' gi, í dɔ gbáágbààa ke i zʋʋ- zana n-wùn-a.
43	Le Yesu' wɩɩ' à nɛ̀ ye: Án à zɛ i nɛ̀ sii tà ma: tenglé do é à bhà, ko nà i gá kó waaà kiá yàlèè sɛ̀' é Aatana pé láà à gi. Yesu ga-kɔ̀ɔ̀ (Matie 27:45-56; Maki 15:33-41; Záàn 19:28-30)
44	-45 Yáán yàà mɛ̂ɛ gwenglé zué téei' bhɔ', le lɛi' tala', le yáán tó' lèèni', le gbɛi' yaa' sɛ́ɛ́ tà tíiá mɔɔɔle do, le é to' kwɛi flúúlé le yáán seelá gi lɛ́ɛ́lɛ́ɛ́ yakanàà' bhɔ' le. Aatana-kwìì kpáa' é Zelizalɛm bhi láà, à gélé-lèè gikààn-i-gbàà' pèè zué vɛ́ɛ̀ɛ̀le bha do láà àle bhà le.
46	Ale' bo' kɛɛá kwɛi, le Yesu' gbala' kpókpóá ye: N nɛ, bhè i kɔɔ kpɔ́ n níi gɔ̀n. É bo' àle peá kwɛi, e tó' wo' le é ga' le.
47	Wɔlɔm-mɛ̀ɛ̀bòà kapitɛni' nuu sɔ́yabò wunlé bhi láà, é Yesu ga-lèè ye' kwɛi, e bhɛɛ yaa' Aatana bhà, le é wɩɩ' ye: À gbègó-lèè àa bhe, wúnsɛ̀ kɛɛ-mɛ̀ɛ̀' nuu mɛ̂ɛ é à gá mai lekinilèkiniá le.
48	Mɛ̂ɛ páipái' wó nu' yèèèle Yesu zɛ-lèè gaai láà, àng tó ké wúnbò' kɛɛ' bhi à-lèè ye', le wó sɛi', le wó lo' péele, ke àng kɔɔ ké àng túlú lé le.
49	È gò' àle gi, Yesu dɔn-mɛ̀ɛ̀bò, ni nɔ́ngbò' wó go' à wɛì Galilee lùu gi ke wó nu' Zelizalɛm láà, àng tó ké nuu bhi, kɛ́ wo nuu dɔɔ dɔ́ɔ́nnɛ́ keá, le wúnbò' kɛɛ' láà, wó nuu à tó súnmagóà le. Yesu kpɔ̀lèè gó-kɔ̀ɔ̀ (Matie 27:57-61; Maki 15:42-47; Záàn 19:38-42)
50	-51 Kɛ́ mɛngge' nuu bhi, wo nuu à leeà Zozɛfu. E nuu góà Zuifu-bòà pɛ́ɛ ke' wò à lee Alimatee láà à gi. Kólósɛ̀-mɛ̀ɛ̀' nuu à gá, le é nuu Aatana zòàwùn kɛɛà, le é nuu zí e yáán tóà Aatana-à gwilinɛnɛ̀ yàà à bhà lóó gɔ̀n le. Wó nuu mɔaagbebò' àng yaayèa liangzɛ-mɛ̀ɛ̀bòa Zuifu-bòà bànkétà kpáa gi láà, àngle do ke' nuu Zozɛfu-a le. Kɛ́ wó ló' wo' Yesu zɛ-wùn sɔ́nɔ́ gi oo, ni wó wún' kɛɛ' à gá láà oo, à zi àa nuu àng pé àle ke gi.
52	À kɛ̀ɛ̀ kwɛiyè láà à gi, wó bo' Yesu zɛá, e lo' Pilati pé, le é bhàiwo' à zì ye: è Yesu-gèè nu e nɛ̀ le.
53	Pilati' wɩɩ' à bhà, le Zozɛfu' lo' à-gèè síi yílí bhà, le é à kpaa' fɛ́nggbɛ púú gi, le é lo' à kpɔ̀lèè gói le. É à kpɔ̀lèè go' yɛɛ' gi láà, wo nuu à pɔ́nyèa fɔ́ɔ́lé gwɛɛ-tɔ̀ɔ̀n gi, kɛ́ ke wòo woo mɛngge kpɔ̀lèè gó à gi do bhe.
54	Wún láà e kɛɛ' kwɛi Zuifu-bòà gòlòbhàlóó yáannáá, ke lóó leng láà à zigò à bhà lɛ́ɛ́lɛ́ɛ́' bhɔ bhɔ lià.
55	Nɔ́ngbò' go' Galilee lùu gi ke wó nuu Yesu wɛì láà, àng leng ké lo' Zozɛfu wɛì. Wó Yesu kpɔ̀lèè go' yɛɛ' gi láà, àng yáán ké nuu à bhà, le wó à kpáá-kɔ̀ɔ̀ súnmago' le.
56	Wó go' bhi, le wó sɛi', le wó lo' wo yalé, le wó yɔ́ɔ́n ni làsikɔlɔ yíbò yaa' wo kɔɔ maabhà, ke wò nù ló Yesu-gèè soloi à gá le. Zuifu-bòà golo-kwèèi láà é bhɔ', le wó yala' ye Moizi-à tɔ́ng- à pe kɔɔ' gi láà à nɛ̀ le.