1	Lee' kpɔɔ', yíkpáá-mɛ̀ɛ̀bòà wunmɛ̀ɛ̀bò ni mɔaagbebò ni Aatana-à tɔ́ng dɔ-mɛ̀ɛ̀bò ni Sanedɛnɛ gi-mɛ̀ɛ̀ paánbò láà wo solo' yué pálé, le wó ban dɛ́ɛ wo' ké tà, ke wò Yesu-wùn yààkébhà kɛɛ le. Wó bo' à yeleá, le wó lo' nà à gá kúmana kpáè' Wɔlɔm-mɛ̀ɛ̀bò' à yaa' Zuifu-bò wunlé, ke wó nuu à leeà Pilati láà à zué le.
2	Wó waa' bhi, le Pilati' Yesu bhàgilawo' ye: Ile í Zuifu-bòà gwilinɛá la è? Le Yesu' à yoobɔ' à gɔ̀n ye: I àle peii lɛ́ɛ.
3	É à pe' kwɛi, le yíkpáá-mɛ̀ɛ̀bòà wunmɛ̀ɛ̀bò' sɔɔ' belebelebò naaà à bhà zanózànóá gbakilile le.
4	Pilati' à bhàgila dɛ́ɛ ke wò- àle gi ye: Wún páipái' wó à peii i bhà é, bhè à-tùlé gaa lɛ́ɛ. Yáá à yoo do lefienɛ́ ke bɔii è?
5	Kɛ́ é à pe' kwɛi, Yesu òo àle zì ke dɔ koo, le à-mài' Pilati ni' le. Pilati-à Yesu lénù à zɛ-mɛ̀ɛ̀bò nɛ̀-kɔ̀ɔ̀ (Matie 27:15-26; Luki 23:13-25; Záàn 18:39-19:16)
6	Sée Paki kɛɛ-kwèèi' nuu bhɔà kɔi dolodolo, Zuifu-bò' nuu kààso gi-mɛ̀ɛ̀ do ye' à-wùn peà Pilati nɛ̀, é nùù àle yɔɔà àng nɛ̀ ziàn le.
7	E nuu kwɛi, ke mɛngge' wó nuu à leeà Balabasi, ke àle ni e bhámò' wó bhing daa', ke wó bhaamɛ̀ɛ̀ zɛ' kiá láà, wo kààso gi.
8	A-wùn gi, pɛ́ɛ-mɛ̀ɛ̀bò ké lo' tɔɔnlé kpeá yèèèle kwɛpoo à gi, le wó bhàiwo' Pilati zì wo: Bhè dɔ gbáágbààa ke kààso gi-mɛ̀ɛ̀bò' zé é, í mɛngdo yɔɔ ko nɛ̀ zììa-kɔ̀i.
9	Kɛ́ le Pilati' à yoobɔ' àng gɔ̀n ye: Zuifu-bò, ká à pé ke kaà gwilinɛ é, án àle yɔɔ ka nɛ̀ la è, tààn lɔ?
10	Pɔɔn- à kɛɛ ke Pilati' àle pe' kwɛi, àle ye: à gàn ké nuu à yàan ye: yíkpáá-mɛ̀ɛ̀bòà wunmɛ̀ɛ̀bò láà wó nùù bhɛ̂ɛ' góà Yesu-á, le wó à lénu' e nɛ̀ le.
11	Kɛ́ le yíkpáá-mɛ̀ɛ̀bòà wunmɛ̀ɛ̀bò' wʋʋ waa' gwiligbá' nuu bhi láà àng gi wo: Kà gbaan à gi kelekelele, ke ká à pe ka: è Balabasi' à yɔɔ ko nɛ̀ le.
12	Wó gbaan' Balabasi yɔɔ-wùn gi kwɛi, le Pilati' àng bhàgila dɛ́ɛ ke wo' ye: Ka à pè' kwɛi la ò, le mɛ̂ɛ ye' ka à lee Zuifu-bòà gwilinɛ é, án àle kún lɔ àlei le?
13	É à pe' kwɛi, le àng tó' wɩɩ' à gɔ̀n kiá wɔ̀ɔ̀ɔ̀le wo: Ale gbaan' è wo mɛ̂ɛ zɛ̀ à bhà-yìlì bhà le.
14	Le Pilati ye: È mɛɛ-wùn yóo-le kɛɛyèa le? Kɛ́ le wó gbálá ke wo' zí kpókpó lengá wo: À gbaan' è wo yílí bhà le.
15	Sée e nuu Pilati pé ye: ebhà yìyaa- mɔɔ mɛ̂ɛ' wó nuu bhi láà àng tó tà. A-wùn gi, e nu' Balabasi yɔɔi àng nɛ̀, le é sɔ́yabò yaa' Yesu-le bhà, le wó à maa' sàbhiliwɛ́ɛ́á le. Wó bo', le é zí à lénu' àng nɛ̀, ke wò ló à gbaan-i yílí bhà le. Sɔ́yabò sóósì Yesu bhà-kɔ̀ɔ̀ (Matie 27:27-31; Záàn 19:2-3)
16	Sɔ́yabò láà wó Yesu si' kúmana kpáèà liangzɛ-lià bhi, le wó sɔn' nàa à gá àbhà gbúnng zué líe, le wó sɔ́ya kpulu kpáa' nuu bhi láà àng tó ban' ké tà le.
17	Ang tó' waa' bhi, le wó gbáán bhái daa' Yesu bhà, le wó zí lùùlɛɛ-gbɔ̀ɔ̀ kálá kɛɛ', le wó à yaa' à wun bhà ke è tó àbhà fánngwɛ́ɛ́á le.
18	Wó bo', le wó gbaan' wɩ̀ɩ̀bhà kɛɛà à bhà wo: Zuifu-bòà gwilinɛ, sii- kɛɛ i nɛ̀ oo.
19	Wo nuu à peà kwɛi, ke wo à maaii ziàn nà gaawɛ́ɛ́á à gwenglé, ke wo biín suoii à bhà, ke wo zinnáii à nɛ̀ kpóng gi, ke wo sóósì à bhà-gbɛ̀óógbɛ̀ kɛɛii à nɛ̀.
20	Wó bo' sóósíá à bhà kwɛi, le wó gbàbhuu tɛ́ɛ́n láà à si' à bhà, le wó à lekini pe bháibò daa dɛ́ɛ wo' à bhà le. Wó à kɛɛ' kwɛi, le wó nuu lóà nà à gá à gbààn yílí bhà-zàa le. Yesu gbààn yílí bhà-yè (Matie 27:32-44; Luki 23:26-43; Záàn 19:17-27)
21	Wó nuu ló láà à woà kwɛi, wo zaa gie-mɛ̀ɛ̀ do ta' zaá, ke e góii boi. Wo nuu à-mɛ̀ɛ̀ leeà Simon. Silɛni-mii' nuu à gá, le é nuu Alesandele ni Lufu-nù nɛá le. Wo mɛ̂ɛ láà à kun', le wó à tàdɔ' Yesu zɛ̀ à bhà-yìlìa, ke è à sí à nɛ̀ le.
22	Wó go' bhi, le wó lo' nà Yesu-á lee' wò à lee Gɔligota láà à bhà le. Wò à pè' Gɔligota, ke wo wɩɩ wo: bhaamɛ̀ɛ̀ wunwɛ́ɛ́-tɔ̀ɔ̀n.
23	Wó waa' lee láà à gi, le pɔɔn' wò à lee Miili, ke è pɔɔn yùà mɛ̂ɛ bhà-yè lo loo lé, wó nuu à daayèa wɩ̂ɩ' à bhà láà, wó à dɔ' Yesu biin bhà le. Kɛ́ òo nù wɩ́ɩ́ à mi-wùn bhà.
24	É kɛɛ' kwɛi, le sɔ́yabò' à naa' yílí bhà, le wó pɔ́ngti gbaan' à kɔɔ ni à gɛɛnbò tà le. Wó bo', le àbhà gbààbò' wó à si' à bhà láà, wó kpékpé maa' à tà, ke à ye' è tóà mɛ̂ɛ ye' à gɔ̀n, wò à dɔn le.
25	Wó Yesu gbaan láà à wo' yílí bhà téei, ke lɛ́ɛ́lɛ́ɛ́' gie yaka lee kpɔɔyè zìpieta.
26	Wó à zɛ' gɛɛn' bhà, à bɛɛn ké nuu zɛyèa à tà tɛ́nglà wo: Zuifu-bòà gwilinɛ' é.
27	Wo zí yàà mɛ̂ɛ gɔ̀n zaa bhà-mɛ̀ɛ̀ piilɛ dɔ' Yesu wɛì, le wó àng gbaan' yílí bhà à pé le. Mɛngdo pe yílí ké nuu gbaanyèa à kɔɔ sɛ̀ tà, le mɛ̂ɛ dini pe' nuu à kɔɔ kpáná tà le. [
28	Sée wʋʋ' é bɛɛnzɛyèa Aatana-à sɛ́ikwɛ́ gi wo: Wo à daa' wúnyóo kɛɛ-mɛ̀ɛ̀bò bhɛɛ gi láà, àle gi-wùn' kɛɛ' à gá kwɛi lɛ́ɛ.]
29	É nuu yílí bhà, zaa gie-mɛ̀ɛ̀bò ké nuu sɔ̂ɔnwoà à gɔ̀n, le wò wo wunbílí mììmii, ke wo à peii à nɛ̀ wo: Èeè, ile-mii' i wɩɩ ye: í Aatana-kwìì kpáa' zé é à wíà, ke í à dɔ dɛ́ɛ wo yáángɛɛn yakaá é la ò,
30	i tò' à ká laá, bhè i lekini la, ke í gó i zɛ̀ à bhà-yìlì láà à bhà, ke í yɔɔ tò sée a.
31	Yíkpáá-mɛ̀ɛ̀bòà wunmɛ̀ɛ̀bò ni Aatana-à tɔ́ng dɔ-mɛ̀ɛ̀bò' nuu bhi, àng leng ké nuu sóósíà à bhà, le wò à pe wo ké nɛ̀ wo: Kà lɛgaa lɛ́ɛ. E nuu mɛ̂ɛ bhɛ́ibò-le laà oo, kɛ́ le àa mɔɔ e lekini-le laá tò le.
32	Ale-mii' é wɩɩ' ye: ele é Izalae-bòà gwilinɛ' wò à lee Klisi láà à gá é la ò, è gó e zɛ̀ à bhà-yìlì láà à bhà, ke è zinná tò bhêe. Ko yánwɛ́ɛ́- àle-lèè yè' laá, à-wùn- bhɔ' wo ko gi mai bhà le. Mɛ̂ɛbò' wó nuu gbaanyèa yílí bhà à zɛngpé zía ni zía láà, àng tó ké nuu sɔ̂ɔnwoà à gɔ̀n. Yesu ga-kɔ̀ɔ̀ (Matie 27:45-56; Luki 23:44-49; Záàn 19:28-30)
33	É si' yáán yàà mɛ̂ɛ gwenglé zué bha bhà, ke è zin nàa yáán seelá gi bhà, gbɛi ké yaa' sɛ́ɛ́ tà lɛnói tíiá mɔɔɔle do.
34	Yáán seelá gi lɛ́ɛ́lɛ́ɛ́ yakanàà' bhɔ', le Yesu' gbala' kpókpóá ye: Eloi, Eloi, Lama Sabatani! Wò à pè' Ebɛlɛ-wʋ̀ʋ̀ gi kwɛi, ke wo wɩɩ wo: Éké, n nɛ Aatana, éké, n nɛ Aatana, mɛɛ kɛɛ le í i kɔɔ góyèa n zì kwɛi le?
35	Mɛ̂ɛ' wó nuu dɔɔ bhi láà, àng kemò ké à wʋʋ láà à ma', le wó wɩɩ' wo: Kà dɔ bhee. E Eli leeii wà!
36	Le mɛngdo' lo' bàlàa, le é fùù sɔɔ' wɩ̂ɩ waanwaanyè bhà, le é à yaa' gaawɛ́ɛ́ lé, le é à dɔ' Yesu biin bhà, ke è nù à mi le. E nuu wɩ́ɩ́à ye: Kwàa ko yáán tó bhi, fún ke Eli- nuà à síi yílí bhà, ke è à yɔɔ è.
37	Kɛ́ é à pe' kwɛi, le Yesu' to', le é gbala' kpókpóá, le à tɛ́i-wàà' yɛn', le é to' à gayèa le.
38	É kɛɛ' kwɛi tée' gi láà, Aatana-kwìì kpáa' nuu Zelizalɛm bhi láà, à gélé-lèè gikààn-i-gbàà ké pee' zué gbaànle bha do láà à bhà. Sée é péé zì do' go' tɛ́ng gi vɛ́ɛ̀ɛ̀le láà, é wàà nà àleá sáaá le.
39	Kapitɛni-mii' nuu dɔɔ Yesu wɛí bhi láà, é bo' à ga-kɔ̀ɔ̀ láà à yeá kwɛi, le é wɩɩ' ye: Áá, Aatana gbe' nu' tói mɛ̂ɛ é à gá mai lekinilèkiniá la wà!
40	Nɔ́ngbò kemò ké zí nuu bhi. Kɛ́ àngle ké nuu dɔyèa dɔ́ɔ́nnɛ́ keá, le wó nuu à-lèè gaaà le. Mali Madala ké nuu bhi, le Mali ye' é nuu Zaki bhááɛ̀n ni Zoze-nù laúá láà é nuu bhi, le Salome' nuu bhi le.
41	Yesu' nuu Galilee lùu gi tée' gi, nɔ́ngbò láà wo nuu à wɛì, le wó nuu à légièwoà le. È gò' àle gi, nɔ́ng bhɛ́ibò kpe ké nuu zí nuyèa Yesu wɛì Zelizalɛm, le àng leng' nuu à zɛ lià bhi le. Yesu kpɔ̀lèè góyè (Matie 27:57-61; Luki 23:50-56; Záàn 19:38-42)
42	-43 Yáánpa' woo bhɔ tó wo, le mɛngge' wó nuu à leeà Zozɛfu, ke é nuu Alimatee-miiá láà, é to' le é waa' bhi le. Mɛ̂ɛ tiàànle' nuu à gá Sanedɛnɛ gi-mɛ̀ɛ̀bò finibhà, le à yáán' nuu Aatana-à gwilinɛnɛ̀ yàà à bhà lóó gɔ̀n le. Sée é nu láà wò- kwɛi Zuifu-bòà gòlòbhàlóó yáanná' è to lóó láà à gi-gièwo-kwèèiá láà àleá le. À kɛ̀ɛ̀ kwɛiyè láà à gi, e e zʋʋ gbaan', le é lo' Pilati pé, le é bhàiwo' à zì ye: è Yesu-gèè nu e nɛ̀ le.
44	Kɛ́ à pèló wo: Yesu ké ga' pálé kwɛi láà, à-mài ké Pilati ni', le é kapitɛni láà à lee', le é à bhàgilawo' ye: À ga lɔ̀ɔ́' woo mɔ́ è?
45	É bo' àle iin peá, Pilati' wɩ́ɩ́' wo' à bhà, ke Zozɛfu- Yesu-gèè sí le.
46	Zozɛfu' lo', le é fɛ́nggbɛ púú lɔ', le é lo' Yesu-gèè síi yílí bhà, le é à daa' à gi le. É bo', le é lo' à kpɔ̀lèè gói le. Kɛ́ wó à kpaa' yɛɛ' à gi láà, wo nuu à pɔ́nyèa gwɛɛ gi fɔ́ɔ́lé. Wó à kpaa' bhi, le wó gwɛbílí kábháko ke gini', le wó à bhuo' bu láà à lé le.
47	Sée Mali Madala ni Zoze laú Mali ké nuu bhi, le wó nuu à kpɔ̀lèè gó-lèè gaaà le.