1 Corinthiens 16

Legilizi-bò' kɔɔ' ban-ii ké tà Yesu pe gi-mɛ̀ɛ̀ yemò' Zelizalɛm àng nɛ̀ láà, má zin à-wùn bhà tò. Legilizi yemò' wó Galati lùu gi, án wʋʋ kpɔ' àng bhà ma: wò à kɛ̂ɛ kɔɔ' gi láà, Kolɛnti-mɛ̀ɛ̀bò ka leng ká ka pe kɛ̂ɛ kwɛi' wo le.

Án wɩɩ ma: dimansi-kwèèi- bhɔ̀' ziàn, mɛ̂ɛ' i kɔɔ- mɔɔà pɔɔn ye' bhà, í à yaa tùbhà. Ká kɔi dolodolo láà, kanó ká ka pe sí ka pe pɔɔn ye-nàà tà. Kao dɔlɔ́à n wàà ka lià-yè gɔ̀n, ke ká nuu kaà kɔɔ bànkélà láà à zigóà.

Ka leng ka kpɔ́yè' mɛ̂ɛbò' àng lé ka finibhà, ká àngle yaa ka kɔɔá, ke wò nù ló nà kaà gɛ̀ilɛ tó-pɔ̀ɔ̀n láà à gá Zelizalɛm le. N lekini an wàà' ka lià, án àng bɔà nà àng kɔ́nɔ́ dàà à tà-sɛ̀ikwɛ́á.

È tò' zí kpáaá, ke è mɔɔ n lekini lò nàa-pɔ̀ɔ̀n bhà, án lóà àng dɔi. Pɔli' nuu wúnbò' à lóó kpɔ́à

Kɛ́ n giè Masedoni sɛ́ɛ́ gi-wùn ké tuàn bhe líe. An bò' gieá bhi, ke án nuu lóà ka lià.

Keèbhi, án mɔ́nɛ́ ke woà ka lià, ke án yíiín lóo gi lefienɛ́ kɛ̂ɛ ka pé bhi. È tò' kwɛi, an gò' bhi, an lóà lee' gi, ká mɔɔà n dɔá zaá.

Pɔɔn- à kɛɛ ke an àle pe kwɛi, àle ye: máá à pé, ke án ka ye nu-kɔ̀ɔ̀ do é à gi, ke án tó ke án gie ka tà víálé. Kɛ́ Gwilinɛ Kpáa- wɩ̀ɩ̀' à bhà, e n pé ke án bhanɛ́ ke kɛ̂ɛ ka lià.

Kɛ́ án tóà líe Efɛzi zé, le Pantikɔte fɛ́ɛti- bhɔ le.

Atoosiwo Aatana-à liangzɛ-zààlé ké pólóyèa n gɔ̀n gbɛ́ɛ́á. Kɛ́ mɛ̂ɛ' wó yaayèa à gɔ̀n gwili-yàn gi, wo zí kpeá yèèèle.

Timotee' bhia ka lià bhi. Kɛ́ è wàà' ka kpe gi, ká à-tɔ̀ɔ̀ kún sɛ̀a, ke súó òo nù à kɛɛ ka gɔ̀n. Atoosiwo Gwilinɛ Kpáa-à bháála kɛɛ-mɛ̀ɛ̀' à lengá ye n nɛ̀ le.

À kɛ̀ɛ̀ kwɛiyè láà à gi, mɛngge òo à yeà yáànbìlìtàa. È gò' àle gi, ká à dɔ zaá sɛ̀a, ke è gó bhi nà zowɛ́ɛ́ niidaaá, ke è nu n lià, atoosiwo n yáán ké àle ni ko laànɛ́bò gɔ̀n.

À ye' é ko laànɛ́ Apolo-le pe-wùn-a láà, án woo à bháa dɔ' n sɔbhɛɛ bhà ma: à leng- ló ka lià ko laànɛ́bò wɛì. Kɛ́ àa à leng-le sɛ̀ɛ̀nɛ̀-wùn-a gbonggbongle, ke è ló líe dɔkɔ̀ɔ̀ é àle gi. À kɛ̀ɛ̀ kwɛiyè láà à gi, è e leng sɔlɔà kwee' gi, le è nuu lóà ka lià le.

Ká yaa ka yáán, ke ká dɔ gbaiinle kpɔ̀ Aatana lé-yè gi. Ká à kún miɔnnɛ̀-zòwɛ́ɛ́á, ke ká ka bháa dɔ.

Ká ka finibhà-wùn tó kɛ̂ɛ lɔ̀ɔ̀ tò ké bhà gi.

À gàn ké ka yàan ka: Tefana ni à pé kwíle-mɛ̀ɛ̀bò láà àngle wó to' Yesu pe gi-mɛ̀ɛ̀bòà mɔɔfɔ́ɔ́á kaà Akai sɛ́ɛ́ láà à gi le. È gò' bhi zí, wo wo lekini daayèa Yesu pe gi-mɛ̀ɛ̀ paánbò gɔ̀n nuanɛ̀ gi.

Ale kɛɛ le, n laànɛ́bò, an wɩɩ ma: ká ka wunlé kpáá mɛ̂ɛ suu' wó kwɛi láà àngle nɛ̀ le. È gò' àle gi, ká zí ka wunlé kpáá mɛ̂ɛ páipái' àng kɔɔ' Aatana-à bháála láà à gi, ke wó gii sí-ii à bhà láà àng tó nɛ̀.

Tefana ni Fotinatu ni Akaiku-nù' nu' wo' ke wó n pé zé láà, e sɛɛyèa n nɛ̀.

Ka lɔ̀ɔ̀' kpɔ́yèa n lé láà, àngle wó yí máimài dɔyènɛ́ keá à lé le. Wo n zowɛ́ɛ́ kpááyèa, le wó zí ka leng ka pe kpááyèa le. An àle pè kwɛi ke ká nù dɔn' wo bhɛɛ yaaá mɛ̂ɛbò' kwɛi láà àng bhà sɛ̀a le.

Legilizi-bò' wó Azi sɛ́ɛ́ gi, woó wɩ́ɩ́ ka bhà. Akila ni àbhà nɔ́ng Pilisii ni legilizi-bò' wò ban ké tà ziàn àng pé kwíle, ke wó Gwilinɛ Kpáa-à zaawɛ́ɛ́ tà ye ka nɛ̀ láà, woó wɩ́ɩ́ ka bhà sɛ̀a.

Ko laànɛ́bò páipái' wó zé, àng tó woó wɩ́ɩ́ ka bhà. Ka leng ká wɩ́ɩ́ ka ké bhà ka ké kpíníbhà miyèa Aatana lɔ̀ɔ̀ bhà.

Wɩ̀ɩ̀bhà-nàà é, nle Pɔli n leng án àle bɛɛnzɛ' n kɔɔá le.

Koà Gwilinɛ Kpáa lɔ̀ɔ̀ àa mɛ̂ɛ' à kɛɛ láà, lángga- àle-mɛ̀ɛ̀ kún. Kɛ́ kole kó wɩɩ ko: Malanata. (Ko à pè' kwɛi, ke kó wɩɩ ko: Gwilinɛ Kpáa, bhè nu.)

Gwilinɛ Yesu- dɔ gbáágbààa ke è gɛ̀ilɛ tó ka bhà.

Kanó páipái ka lɔ̀ɔ̀ ké n kɛɛ Yesu Klisi-wùn gi.