Actes 10

Mɛngge' nuu Sezalee, wo nuu à leeà Kɔlɔnɛi. Sɔ́ya kpulu' wó nuu à leeà Itali-sɔ̀yábò láà, àngbhà kapitɛni do ke' nuu à gá, le é nuu sɔ́ya kàindini wunlé le.

Sùò Aatana gɔ̀n-mɛ̀ɛ̀' nuu à gá, le àle ni e bhà-mɛ̀ɛ̀bò tó' nuu daayèa Zuifu-bòà sée gi le. E nuu zí gba kpákpaa woà Zuifu-bò gɔ̀n, le é nuu bhàiwoà Aatana zì lɛ́nólɛ̀nó bhà le.

É nuu kwɛngge láà à gi, ke lɛ́ɛ́lɛ́ɛ́ yakanàà' bhɔ yáán seelá gi, le Kɔlɔnɛi yáin' daa', le é Aatana-à kɩ́ɩ́la do ke ye' kpákpálé, ke ya sɔɔ à tà kwíle, ke ya à sí tɔ́á ye: Kɔlɔnɛi!

Kɔlɔnɛi' à gaa' sɛ́inlé, ke súó' daa à gi, le é à bhàgilawo' ye: È bhi lɔ, Gwilinɛ! Le Aatana-à kɩ́ɩ́la láà é wɩɩ' à nɛ̀ ye: I bhài' wo ni i gbabò' wo ziàn láà, à-wʋ̀ʋ̀ ké waayèa Aatana lià lɔngwɛ́ɛ́ gi, le à zʋʋ' zana à tó-wùn-a le.

A-wùn gi, bhè mɛnggoò bɔ Zope, Simon' à tɔ́yààtà' Piɛli-a láà à lee lià tò!

E yii Simon ke' é kili káán-mɛ̀ɛ̀a láà à pé kwíle. Abhà kwíi ké kɔ̀ɔ̀yí kpúnglé.

Aatana-à kɩ́ɩ́la' é liangzɛ' à nɛ̀ kwɛi láà, é bo' lóá, le Kɔlɔnɛi' ebhà gùábò piilɛ ni sɔ́yabò' nuu à kɔlé láà àng do lee' le. Sɔ́ya-mii láà, sùò Aatana gɔ̀n-mɛ̀ɛ̀' nuu à gá le.

Wún' é kɛɛ' à gá láà, é bo' à tó gɛingóá àng nɛ̀, le é àng bɔ' Zope le.

À tàalà, ke mɛ̂ɛbò láà wo tuàn zaá, ke wa bhɔ waa lià péele, le Piɛli' daa' kwíi tà tɛ́nglà, ke è bhàiwo Aatana zì le. E nuu kwɛi, ke yáán' bhɔ yaa lià mɛ̂ɛ gwenglé zué.

Le vɔ́n' gbaan' à góà, le é nuu à pé ke è pɔɔn bhɛlɛ le. Wo to' à liéguo-pɔ̀ɔ̀n kpaa lià, le à yáin' daa' le.

Yéè e káá' wo, ke lɔngwɛ́ɛ́' lépóló, ke pɔngge' ye song gbɛ́ɛ́ ke nɛ̀, e góii tɛ́nglà. À bhɛɛ ké nuu dɔyèa à zɔ́ɔ́ yisɛ tó bhà, le é nuu yɔɔà sáaá le.

Kʋ̀sʋ̀ tà-wììbò oo, ni sáaá-pɔ̀ɔ̀nbò oo, ni maabò oo, à tó páipái suu ké nuu pɔɔn láà à gi.

É kɛɛ' kwɛi, le wʋʋ ke' daa' à tóló gi ye: Piɛli, walá, ke í pɔɔnbò láà à ke zɛ, ke í à bhɛlɛ.

Kɛ́ le Piɛli' wɩɩ' ye: Áááoo, Gwilinɛ Kpáa! Mɔ́ɔ́ daa n sɛ́ɛ́n lé do bhe.

Le wʋʋ do' wɩɩ' láà, é à pe ke wo' zí ye: Aatana' bo à peá pɔɔn ye' à bhà ye: bian àa à bhà, miá i gban kpɔ́ àleá koo.

Wó bo' à peá kwɛi gɛnyààn yakaá, le é to' le pɔɔn láà é sɛi', le é lo' lɔngwɛ́ɛ́ gi le.

Piɛli yáin' daa' láà, e woo tuàn à-wùn ban-à e kwenglé, le é to' le Kɔlɔnɛi-à gielá-mɛ̀ɛ̀bò' waa' bhi le. Wó bo' Simon-à kwíi-lèè gieá àng nɛ̀, le wó lo' bhi, le wó dɔ' kpóló lé,

le wó wo wʋʋ léwala', le wó bhàgilawo daa' wo: Simon' wò à lee Piɛli láà, à ya- zé' wo la è?

Piɛli ké to' e zʋʋgɔɔn-à à yáin' daa' láà à-wùn-a, le Waa Zaazaa' à pe' à nɛ̀ ye: Zé gaa, bhaamɛ̀ɛ̀ yaka ké i guoii.

Walá ke í zinná, ke í ló àng wɛì. Síka òo tóà i gi, nle án àng bɔyèa le.

Piɛli' zinnà- àle gi, le é à pe' mɛ̂ɛbò láà àng nɛ̀ ye: Nle án é, ka nle n guoii lɛ́ɛ. Ká nù- mɔ̀ng' gi le?

Le wó à yoobɔ' wo: Aatana-à kɩ́ɩ́la do ke' go' lɔngwɛ́ɛ́ gi, le é à pe' kapitɛni Kɔlɔnɛi nɛ̀ ye: è ko bɔ i lee lià, ke í nu, ke í nù liangzɛ à nɛ̀, ke è à ma le. Wúnsɛ̀ kɛɛ-mɛ̀ɛ̀' Kɔlɔnɛi láà à gá le. E suo Aatana gɔ̀n, le Zuifu-bò tó páipái- à tɔ́ sɛ̀ pe le.

Wó à pe' kwɛi, le Piɛli' sɔɔ' nà àng gá kwíle, le é àng yago' le. À tàalà' bhɔ', le é wala', le é lo' àng wɛì le. Yesu pe gi-mɛ̀ɛ̀bò' nuu Zope bhi, àng kemò ké lo' à dɔi Sezalee.

Wo waa' bhi à pe tàalà, ke Kɔlɔnɛi yáán ké àng gɔ̀n, ke ya e bhà-mɛ̀ɛ̀bò ni e sɛ̀lubò tó ban ké tà.

Piɛli' nuu sɔɔà kwíle, ke Kɔlɔnɛi' walá ke ya ló à légɔ̀n, le é bhuola' à gɛngpé, le é gbɛ̀óógbɛ̀ kɛɛ' à nɛ̀ le.

Kɛ́ le Piɛli' à léwala', le é wɩɩ' à nɛ̀ ye: Bhè walá ke í dɔ gɛɛn bhà. Bhaamɛ̀ɛ̀ bhɛ́iwɛ́ɛ́' n lekiniá ye i nɛ̀ le.

Ale ni Kɔlɔnɛi wo to' liangzɛà kiá, le wó sɔɔ' kwíle, le é bhaamɛ̀ɛ̀ kpe ta' banyèa ké tà bhi le.

E wɩɩ' àng nɛ̀ ye: Ka leng ká à gànnu ka: Zuifu-bò koà tɔ́ng ké wɩɩ ye: koo naaà mɛ̂ɛ' wàa ko suuá àng bhà. Ko gban' à gá le. Koo zí sɔɔ lefienɛ́ woà àng ke pé kwíle. Kɛ́ Aatana ké à tàpólóyèa nle n nɛ̀ ye: à-lèè àa à bhà ke án nàà bhaamɛ̀ɛ̀ ke bhà-yè gaa ye yànma-wùn ni mɛ̂ɛ gban zɛyè nɛ̀ koo.

Ale kɛɛ le, ká n lee' wo' láà, mɔ́ɔ́ dɔ à bhà dɔ́ɔ́n-á, le án à gi-nù woyèa é le. Má ka gílawo tò: ká n lèè mɔ̀ng' gi le?

Le Kɔlɔnɛi ye: À yáángɛɛn yisɛnàà' é, án nuu bhàiwoà n pé kwíle, à bha' é, ke lɛ́ɛ́lɛ́ɛ́ yakanàà' bhɔ yáán seelá gi. Máà n káá' wo, ke mɛngge láà e dɔɔ n wɛí, gbàà' é nuu à bhà, à zán ké nuu dɔà gɛ̀lɛ̀nggɛ̀lɛ̀ngle,

le é wɩɩ' n nɛ̀ ye: Kɔlɔnɛi, Aatana' wɩ́ɩ́ ibhà bhài wʋʋ bhà, le í gbabò' wo' wɛ̀i-mɛ̀ɛ̀bò gɔ̀n láà, à zʋʋ' zana à-wùn-a le.

A-wùn gi, bhè mɛ̂ɛ bɔ Zope Simon' wò à lee Piɛli láà à lee lià. E yii Simon kili káán-mɛ̀ɛ̀ pé kwíle kɔ̀ɔ̀yí kpúnglé.

Ale kɛɛ le án to' le án mɛ̂ɛ bɔ' i lee lià, le i lekini yé gɛ̀ilɛ tó nu-wùn-a lɛ́ɛ. A-wùn gi, konó kwéé waa Aatana zué' wo à gá zé é le. À kɛ̀ɛ̀ kwɛiyè láà à gi, Gwilinɛ Kpáa' wʋʋ' kpɔ' i bhà, bhè à tó pe, ke kó à ma. Ko tóló ké i tà tò! Piɛli' liang' zɛ' Kɔlɔnɛi pé kwíle

É bo' à peá kwɛi, le Piɛli' sɔɔ' liangzɛà ye: Kó à zɛ sii tà, má à gànnu tò ma: Aatana àa bhaamɛ̀ɛ̀bò gaa àng wɛí-lèè-le bhà, ke è mɛngge fìlayányè wo mɛngge bhà.

Wánglafila, mɛ̂ɛ' è suo à gɔ̀n, ke è wúnsɛ̀ kɛɛ, é lùu óó lùu' à gi-miiá, àle-mɛ̀ɛ̀ liá- to à gi le.

É nâa sɛ̀' kpɔ' Izalae-bò nɛ̀, àle ké ka yàan. É Yesu Klisi' bɔ' àng nɛ̀, ke è nù tó ninà àng gá-nù kɔɔ wì kéi-mɛ̀ɛ̀a láà, àle nu' nà nâa sɛ̀ láà à gá le. Sée Yesu do láà àle zí bhaamɛ̀ɛ̀ tó páipáià Gwilinɛ Kpáa-á le.

Záàn' mɛ̂ɛ zúlú-wùn lòlò' kpɔ' láà, é si' à bha bhà, Yesu' bháála' kɛɛ', ke é à zigo' Galilee sɛ́ɛ́ gi, ke é daa' nàa Zudee sɛ́ɛ́ tó gi láà, à leng-nàà ké ka yàan.

Kanó ká à gànnu zí ka: Aatana ké Waa Zaazaa bháa daa' Yesu Nazalɛti-mii láà à gi kpáaá, le é nuu lóà wúnsɛ̀ kɛɛá pɛ́ɛ bhɛɛ tà dɔ́ɔ̀nle, le mɛ̂ɛ' wó nuu kún gi gɔɔ̀yóo gɔ̀n, é nuu àng tó páipái tóà kélékèlèa le. Aatana' nuu' wo' kɔɔ yaayèa à bhà láà, àle kɛɛ le é nuu mɔɔà wúnbò láà à tó kɛɛá kwɛi le.

É wúnsɛ̀sɛ̀bò' kɛɛ' Zelizalɛm ni Zuifu lùu tó gi láà, kole kó à tó páipái séeá le. Sée Yesu do láà, wo àle zɛ' yílí bhà pɔ́ngti gbààn à kɔɔ ni à gɛɛn tà-yèa le.

Kɛ́ Aatana ké à go' gɔɔ̀le à yáángɛɛn yakanàà-kwèèi, le é à zana', le é à lébhɔ' kpunglà le.

Kɛ́ òo e leng gie mɛnó nɛ̀. Aatana' woo mɛ̂ɛ' ko yaa à séeá fɔ́ɔ́lé lii láà, kole kó yáánpa' à bhà, le kó lígo' kiá nà à gá à zanayè zìpieta le.

Yesu' wʋʋ kpɔ̀- ko bhà àle gi ye: kó ló lòlòkpɔ́i lùu tó nɛ̀, ke kó à pe ko: Aatana- ele e yaayèa yáán-mɛ̀ɛ̀bò ni ga-mɛ̀ɛ̀bò tó bhàgila kpáa wo-mɛ̀ɛ̀a le.

Sée Aatana wʋʋ léban-mɛ̀ɛ̀bò' nuu lii láà, àng tó páipái ké à-wùn to' liélé, le wó à pe' wo: mɛ̂ɛ óó mɛ̂ɛ' à kpɔ́yè- tóà à lé, Aatana ké à-mɛ̀ɛ̀ bhàwùn tóà à nɛ̀. Waa Zaazaa nù mɛ̂ɛ' wàa Zuifu-a àng pé-kɔ̀ɔ̀

Wʋʋ láà à paán ké to' Piɛli biinlé, le Waa Zaazaa' yɔɔ' mɛ̂ɛ' wó nuu wo tóló dɔà à bhà láà àng tó tà le.

Aatana' ebhà Waa Zaazaa nu' wo' mɛ̂ɛ' wàa Zuifu-a àng tó nɛ̀ kwɛi láà, à-mài ké Zuifu-bò' nuu Yesu pe gi-mɛ̀ɛ̀bòa, ke wó nuu Piɛli wɛì bhi láà àng tó ni'.

Atoosiwo wó nuu wʋʋ dɛ́dɛɛbò' peà oo, ni wó nuu Aatana tɔ́ bhɔ' woà oo, àng tóló ké nuu à tó bhà.

É kɛɛ' kwɛi, le Piɛli' wɩɩ' ye: Mɛ̂ɛ' wa bo Waa Zaazaa sɔlɔá ye ko nɛ̀ é la ò, wáa tuàn kpaà àng zùlù yí wɛ́ɛ́-wùn-a koo le?

É wɩ̀ɩ̀ àle gi ye: wò àng dàà Yesu Klisi pe gi-zùlù wo le. Wó bo' àng zúlúá, le wó bhàiwo' Piɛli zì wo: è tó wo pé bhi yáángɛɛnnɛ́ keá le.