Actes 9

Sée e nuu kwɛi, ke Gwilinɛ Kpáa pé-mɛ̀ɛ̀bò bhɔlɔ ké woo tuàn Sɔli túlú payèa, ke e àng zɛ-lèè guoii. É lò- yíkpáá-mɛ̀ɛ̀ kpáè pé àle gi,

le é bhàiwo' à zì ye: è sɛ́ikwɛ́ nu e nɛ̀, ke é ló nàa Zuifu-bòà Aatana-kwììbò bhɛɛ tà Damasi le. E nuu lóà kwɛi, ke è mɛnggoò yè' bhi miɔnbò ni nɔ́ngbòa Yesu-à zaa tà, ke é nù àng kún, ke é nu nàa àng gá Zelizalɛm.

É nuu ke e tuàn zaá, kɛ́ ke ya bhɔ waa lià Damasi-pɛ̀ɛ̀ yáànbhà, yéè e káá' wo, ke pɔngge zán' gó lɔngwɛ́ɛ́ gi, ke ya mɔ̀ng maa à zì bolongle.

É kɛɛ' kwɛi, le é pɛlɛ' sáalé, le wʋʋ ke' daa' à tóló gi, ke à-mɛ̀ɛ̀ ké à peii à nɛ̀ ye: Sɔli, Sɔli, mɛɛ kɛɛ le i n wɛ̀ikɛ̀ɛ̀wo kwɛi le?

Le Sɔli' wɩɩ' ye: Ile wáa bhi le, Gwilinɛ Kpáa? Le Gwilinɛ Kpáa ye: Nle Yesu' í n wɛ̀ikɛ̀ɛ̀woii láà, nle án bhi le.

Kɛ́ bhè walá, ke í daa pɛ́ɛ yáànbhà. I wún' à kɛɛà, wò à peà i nɛ̀ bhi' wo le.

À táá yóóbò' nuu à wɛì láà, wo dɔlɔ' wo tàsáná sɛ́iinlé, le wó nuu màiwoà à bhà le. Wo wʋʋ láà à ma', kɛ́ wòo mɛngge ye.

-9 É kɛɛ' kwɛi, le Sɔli' wala' sɛ́ɛ́ bhà, le é e yán lépolo' le. Kɛ́ àa nuu lɛngge yeà. A-wùn gi, wo à kɔɔ lékún' wo', le wó lo' nàa à gá Damasi le. E yáángɛɛn yaka kɛɛ' bhi, ke àa lee ye, ke àa pɔɔn bhɛlɛ, ke àa yí mi.

Yesu pe gi-mɛ̀ɛ̀ do ke' nuu Damasi bhi, wo nuu à leeà Anania. Le à yáin' daa', ke Gwilinɛ Kpáa ké à peii à nɛ̀ ye: Anania! Le à lekini' wɩɩ' à gɔ̀n ye:

Nle án é le, Gwilinɛ Kpáa! Le Gwilinɛ Kpáa ye: Bhè walá, ke í ló pɛ́ɛ zué-zàà-gbùlù ye' wò à lee zaa Dɔɔyè láà à tà. Mɛngge' wò à lee Zuda, àbhà kwíi ké zaa láà à pé. I wàà' bhi, mɛngge' è go Tasi, ke wò à lee Sɔli láà, í à guo.

Kó dɔɔ bha' bhà é, e bhàiwoii, le à yáin' daayèa mɛngge' wò à lee Anania à gá le. E à ye', ke e daaii kwíle, ke e e kɔɔ dɔii e tà, ke e yánlé- nù póló.

Kɛ́ Gwilinɛ' bo' à peá Anania nɛ̀ kwɛi, le é à yoobɔ' à gɔ̀n ye: Gwilinɛ Kpáa, án à mayèa bhaamɛ̀ɛ̀ bɛ́ɛ́ tà wo: mɛ̂ɛ láà e wúnyóo kɛɛyèa i pe gi-mɛ̀ɛ̀bò' wó Zelizalɛm láà àng gá miniminiyèa.

È nuyèa zí nàa yíkpáá-mɛ̀ɛ̀bòà wunmɛ̀ɛ̀bò wʋʋ' gá, ke mɛ̂ɛ páipái' wò bhàiwo i tɔ́á péng zé, è àng tó kún le.

Kɛ́ le Gwilinɛ Kpáa ye: Bhè ló-le wo. Atoosiwo nbhà bháála kɛɛ-mɛ̀ɛ̀' à gá le. Án à yaayèa pɛi, ke è nù ló nbhà ló gi lùu bhɛ́ibò' wàa n dɔn, ni gwilinɛbò, ni Izalae gbebò tó zué.

Kɛ́ à wɛ̀ilèè- góà n-wùn gi kɔɔ' gi, n lekini' an à tó tàpólóà à nɛ̀ le.

Anania' wòlò- àle gi, le é lo', le é waa' kwíle bhi, le é e kɔɔ dɔ' Sɔli tà, le é wɩɩ' à nɛ̀ ye: N laànɛ́ Sɔli, Gwilinɛ Yesu' é kaa' i gi zaalé, ke í nuii láà, àle n bɔyèa, ke i yánlé- nù póló, ke àbhà Waa Zaazaa- nù daa i gi, ke è i pa le.

Anania' bo' à peá kwɛi, e to' sáabhi, le pɔngge' go' Sɔli yánlé ye vé kɛlɛ nɛ̀, le é to' le à yánlé' polo', le é lee ye' le. É go' bhi, le é wala', le wó à dàà Yesu pe gi-zùlù wo' le.

É bo' pɔɔn bhɛlɛá, le bháa' daa' à gi le. Sɔli ké Yesu-à kɩ́ɩ́lanɛ̀ kɛɛ' Damasi E yáángɛɛn kpe ke kɛɛ' Yesu pe gi-mɛ̀ɛ̀bò' nuu Damasi bhi láà àng pé,

le é to' le é gbaan' Yesu-wùn gɛingóà Zuifu-bòà Aatana-kwììbò bhɛɛ tà dɔ́ɔ̀nle ye: Yesu láà, Aatana gbe' à gá le.

Mɛ̂ɛ páipái' wó nuu à wʋʋ maà, à-mài ké nuu àng tó nià, le wò wɩɩ wo: Mɛ̂ɛ' é nuu ziàn bhàiwò Yesu tɔ́á-mɛ̀ɛ̀bò wɛ̀ikɛ̀ɛ̀woà miniminiyèa Zelizalɛm láà la ò, àle àa é wo è? Le é nuyè' gá zé é la ò, òo zí nu ke è àng kún-le wo, ke è àng yele, ke è ló nàa àng gá yíkpáá-mɛ̀ɛ̀bòà wunmɛ̀ɛ̀bò zué è?

Kɛ́ sée Aatana-à liangzɛ-bhàà' é nuu Sɔli gi láà, à ke' nùù daa lesósó' woà à tà le. Yesu tò Izalae-bò la-mɛ̀ɛ̀a-yè láà, é nùù Paul being let down N-90 àle tò maiá-lèè gieà Zuifu-bò' nuu Damasi láà àng nɛ̀ le. È nù pe é yɔ́n bhi, ke liang yoo àa sɔlɔ àng gɔ̀n koo.

Bhanɛ́ ke' gie', le Zuifu-bò' à zɛ-wùn yààkébhà kɛɛ' le.

Kɛ́ wó nuu à zɛ-wùn yààkébhà' kɛɛà láà, e à-wùn ma'. Wo nuu yáán tóà gbɛ̀ɛɛlé-zààbò tó bhà yáán gi ni gbɛi gi, ke wò nù à zɛ.

Gbɛi do ke gi, Sɔli-à kàlengbò' à yàà káin gi àlei, le wó à bɔ' tong tà tɛ́nglà, le wó à zinna' gbɛ̀ɛɛ zì le. Sɔli wàà Zelizalɛm-yè

Sɔli' lo' ke è waa Zelizalɛm, e dàà Yesu pe gi-mɛ̀ɛ̀bò bhɛɛ gi-lèè guo' e sɔbhɛɛ bhà. Kɛ́ mɛnó ké nuu súóà à gɔ̀n, atoosiwo à tò Yesu pe gi-mɛ̀ɛ̀a-wùn àa nuu bhɔà àng gi mai bhà.

A-wùn gi, Banaba' daa' wo' à nɛ̀ liélé, le é lo' à dɔi Yesu-à táá-mɛ̀ɛ̀bò lià le. Sɔli' yáánpa' Gwilinɛ Kpáa bhà zaalé kɔɔ' gi, ni Gwilinɛ Kpáa' liangzɛ' à nɛ̀ kɔɔ' gi, wó waa' bhi, le Banaba' à gɛingo' àng nɛ̀ le. É liangzɛ' bhaamɛ̀ɛ̀bò nɛ̀ Damasi kɔɔ' gi, ke è Yesu-wùn pe àng nɛ̀ zòikɛ̀ɛ̀ bhà láà, Banaba ké à tó gɛingo' àng nɛ̀.

É go' àle gi, Sɔli ké nuu gieà àng wɛì Zelizalɛm-pɛ̀ɛ̀ pé lɛnói, le é nuu Gwilinɛ Kpáa-à liangzɛà tàpúúá zòikɛ̀ɛ̀ bhà le.

E nuu zí liangzɛà Zuifu yemò' wó nuu Gɛlɛki-wʋ̀ʋ̀ pe-mɛ̀ɛ̀a àng nɛ̀, le àle ni àng gá-nù wó nuu wún gbègóà le. Kɛ́ mɛ̂ɛbò láà wó nùù à zɛ-lèè' guoà le.

Yesu pe gi-mɛ̀ɛ̀bò' bo' àle-tùlé yeá kwɛi, wó ló' wo' Sɔli dɔi Sezalee, le wó wʋʋ kpɔ' à bhà, ke è ló àng pé péng Tasi le.

E nuu kwɛi, ke legilizi tó ké yáinsaa gi Zudee sɛ́ɛ́ ni Galilee sɛ́ɛ́ ni Samali sɛ́ɛ́ tó gi. Wo nuu wo ké bháa dɔà, le wó nuu bhɛɛ yaaà Gwilinɛ Kpáa wʋʋ bhà, le Waa Zaazaa' nuu àng zʋʋ gbaan-à, le àng dààpé' nuu daa lesósó woà le. Enee tò kélékèlèa Piɛli wʋʋ lé-kɔ̀ɔ̀

Piɛli ké nuu gieà lùu pé lɛnólɛ̀nó gi, le é yɔɔ' nàa à tuléá Yesu pe gi-mɛ̀ɛ̀bò' nuu Lida àng pé le.

É mɛngge' ta' bhi láà, wo nuu à leeà Enee. À gɛɛn ké nuu banyèa, le ya woo kwee saaka kɛɛ kpááyèa kángwa gi le.

Le Piɛli' wɩɩ' à nɛ̀ ye: Yesu Klisi' i tó bhiá, Enee. Bhè walá, ke í ibhà sua kélé yele. Piɛli' à pe' kwɛi, le Enee' to' le é wala' le.

Lida-mɛ̀ɛ̀bò ni Salon bholo pé-mɛ̀ɛ̀bò' Enee tò kélékèlèa-lèè láà àle ye' kwɛi, àng tó páipái zowɛ́ɛ́' seelá' wo' Gwilinɛ Kpáa pé le. Dɔkasi zana-kɔ̀ɔ̀

Yesu pe gi-nɔ̀ng do ke' nuu Zope tée láà à gi, wo nuu à leeà Tabita, le wò à lee Gɛlɛki-wʋ̀ʋ̀ gi Dɔkasi le. Wò à pè' kwɛi, ke wo wɩɩ zolo. E nuu wúnsɛ̀ kɛɛà miniminiyèa, le é nuu wɛ̀i-mɛ̀ɛ̀bò gbaà lɛ́ile le.

Kángwa' à kun', le é ga' le. Wó bo' à zúlúá, le wó à kpaa' táázi-kwìì gélé-lèè do ke gi tɛ́nglà le.

É nuu' wo' ke Piɛli ké Lida Zope-lèè maabhà láà, Yesu pe gi-mɛ̀ɛ̀bò' nuu Zope, wó à tó bhi-wùn ma', le wó mɛ̂ɛ piilɛ bɔ' à lee lià, ke wò bhàiwo à zì wo: è táá wo pé zólé le.

Gielá-mɛ̀ɛ̀bò láà wó waa' bhi, ke wò wʋʋ láà à léban Piɛli bhà, e walá' wo', le é lo' àng wɛì le. É waa' bhi, le wó lo' à dɔi táázi-kwìì gélé tɛ́nglà le. Gɛɛn-nɔ̀ngbò' nuu bhi, àng tó páipái ké yɔn' à maabhà, ke wo wosí-ii, le Dɔkasi' nuu wélébò' kɛɛà, bhái wala-bhàibò ni gbàbhuubòa, ke e tuàn gieà láà, wó à tó gie' à nɛ̀ le.

Wó bo', le Piɛli' mɛ̂ɛbò' nuu bhi àng tó kɛɛ' kwíle le. Mɛnó' wolo', le é zinna' e kpóng gi, le é bhàiwo' Aatana zì le. É bo', le é seela' nɔ́ngnɛ́ láà à tà, le é wɩɩ' ye: Tabita, bhè walá. É à pe' kwɛi, le nɔ́ngnɛ́ láà é yán lépolo', le à yáán' daa' Piɛli tà kpàile, le é wala', le é yaa' gɛɛn bhà le.

É bo' yaaá gɛɛn bhà kwɛi, le Piɛli' kɔɔ daa' à kwenglé, le é à léwala' le. Nɔ́ngnɛ́ láà é bo' zanaá kwɛi, le Piɛli' Yesu pe gi-mɛ̀ɛ̀bò ni gɛɛn-nɔ̀ngbò láà àng lee', le é à kɔ́nɔ́wo' àng nɛ̀ le.

Zope-mɛ̀ɛ̀bò tó páipái ké wún láà à ma', le bhaamɛ̀ɛ̀ kpe' wɩɩ' Gwilinɛ Kpáa-wùn bhà le.

É go' bhi, Piɛli ké yáángɛɛn kpulu ke kɛɛ' Zope kili káán-mɛ̀ɛ̀ ke' wó nuu à leeà Simon láà à pé kwíle.