Actes 12

Gwilinɛ Elɔdi' gbààn legilizi-mɛ̀ɛ̀ kemò wɛ̀ikɛ̀ɛ̀woà à tée do láà àle gi,

le é Záàn dóo Zaki kun', le wó à wunbílí yala' le.

Elɔdi' à gaa' ye à kɛ̀ɛ̀ kwɛiyè liá ké Zuifu-bò gi laá, le é zí wɩɩ' ye: wò Piɛli kún, le wó à kun' le. E nuu búlù' sɛ́kɛ àa tó à bhà, wò à bhɛlɛ fɛ́ɛti' à tà láà à tée gi.

Wó bo' Piɛli kún láà à woá, ke wò à daa kààso gi, le é à maakpɔ' sɔ́ya yisɛ yisɛ kpulu yisɛ bhà le. E nuu à zʋʋ pé ye: Paki fɛ́ɛti- gò' à lé, ke é à dɔ pɛ́ɛ-mɛ̀ɛ̀bò zué, ke wò à zɛ lɩ́ɩ́á.

Wó Piɛli tò- kààso gi àlei le. Kɛ́ àle' kɛɛii kwɛi láà, ke legilizi gi-mɛ̀ɛ̀bò-le wò à lébhài lesósó' woii Aatana zì le. Piɛli gò kààso gi-kɔ̀ɔ̀

Elɔdi yéè woo Piɛli dɔ pɛ́ɛ-mɛ̀ɛ̀bò zué kwee' gi, é to' ye tili nɛ̀, à pe-gbɛ̀i gi' nuu láà, Piɛli ké nuu yizɛà sɔ́ya piilɛ finibhà, ke wo à dɔyèa yɔ̀ɔ́bhɛɛ piilɛ lé. Kààso-kwìì maakɛɛ-sɔ̀yábò ké nuu zí dɔyèa kpóló lé.

Yéè e káá' wo, ke Gwilinɛ Kpáa-à kɩ́ɩ́la do' nu, ke mɔ̀ng' zí maa bolongle kààso-kwìle bhi. Le Aatana-à kɩ́ɩ́la láà é kɔɔ maa' Piɛli sián lé, le é à zana', ke e à peii à nɛ̀ ye: Bhè walá váánlé! É àle pe' kwɛi, yɔ̀ɔ́bhɛɛ tó' gó' wo' Piɛli kɔɔ bhà, le é banna' le.

Ale' bo' kɛɛá kwɛi, le Aatana-à kɩ́ɩ́la láà é wɩɩ' à nɛ̀ ye: Ibhà kiásili yele, ke í sàbha waa. Piɛli' bo' à tó kɛɛá kwɛi, le Aatana-à kɩ́ɩ́la' wɩɩ' à nɛ̀ ye: Ibhà gbàbhuu daa i bhà, ke í nu n wɛì.

É à pe' kwɛi, le Piɛli' wolo', le é dɔ' à wɛì, ke e à gi ye: e yáin bhɛ́i' daaii le. Àa nuu à gànnuà ye: Aatana-à kɩ́ɩ́la láà è e wolo lekini' woii à gá do lɛ́ɛ.

Wó bo' gieá yáán tò à bhà-mɛ̀ɛ̀bò kpulu fɔ́ɔ́yè ni à piilɛnàà tà, le wó waa' pɛɛ́ɛ́ kóng' é pɛ́ɛ zué-lèè bhà za láà à lià, le é lépolo' àng gɔ̀n e leng tà le. Wó wolo', le wó daa' pɛ́ɛ yáànbhà-zàà-gbùlù do ke tà, le é to' le Aatana-à kɩ́ɩ́la láà é kaan' Piɛli bhà le.

Piɛli yáin' bo' pɔnɔá, le é wɩɩ' ye: Sá! Má à gànnu maiá tò ma: Gwilinɛ Kpáa leng' ebhà kɩ́ɩ́la bɔyèa n nɛ̀ é le. È tò' kwɛi, ke Elɔdi ni Zuifu-bò zʋʋ' nuu à ye' nɛ̀ wo: è kɛ̂ɛ n gá láà, ya n la' wo àle tó gɔ̀n lɛ́ɛ.

É bo' e zʋʋgɔɔn-á, le é lo' Mali pé kwíle le. Sée Mali' nuu Záàn' à tɔ́yààtà' Maki-a láà à laúá le. Bhaamɛ̀ɛ̀ ké nuu banyèa ké tà à pé kwíle bhi kpáaá, le wó nuu bhàiwoà le.

É waa' bhi, le é kɔɔ maa' wáfɔ lé-kòng tà, le gùá-nɔ̀ng do ke' wó nuu à leeà Wɔlɔdi láà, é nu' kpooi bhi le.

É bo' Piɛli wʋʋ dɔn-á, le à zowɛ́ɛ́ nii' daa' le. Kɛ́ è kwíi-le lépólóà à gɔ̀n líe fɔ́ɔ́lé láaá, òo àle kɛɛ, e ló' wo' à pei bàlàa ye: Piɛli ké dɔɔ kpóló lé le.

Le wó wɩɩ' à nɛ̀ wo: Pɔàin' i tà la è? Kɛ́ é nuu' wo' naaà à gi ye: Mai' à gá láàá, le wó wɩɩ' wo: Àbin, Aatana-à kɩ́ɩ́la' à wɛì láà, i àle nai yeyèa lebhà lɛ́ɛ.

Sée àle' kɛɛii kwɛi láà, ke Piɛli ké kɔɔ maa lesósó woii kóng tà.

Wó lo', ke wò kwíi lépóló à gɔ̀n, yáánpà à bhà-wùn-mài ké àng ni' miniminiyèa. Piɛli' bo' àng tàkáán-á e kɔɔá, le Gwilinɛ Kpáa leng' à wolo' kààso gi kɔɔ' gi, é à gɛingo' àng nɛ̀, le é wɩɩ' ye: Kà ló à pei Zaki ni ko laànɛ́ paánbò nɛ̀. É bo', le é wolo', le é lo' zaa bhɛ́i keá le.

Lee' bo' kpɔɔá, Piɛli wòlò kààso gi-kɔ̀ɔ̀ láà e sɔ́yabò giviin' miniminiyèa. Le wó nuu wɩ́ɩ́à wo: Kó àle kún lɔ' wo é le?

Elɔdi' Piɛli guo', ke è kwii, le é zin' sɔ́yabò láà àng lé, le é wɩɩ' ye: wò ló àng zɛi le. É go' bhi, le Elɔdi' go' Zudee sɛ́ɛ́ gi, le é yɔɔ' Sezalee, ke è yiiyààn kpulu ke kɛɛ bhi le. Elɔdi ga-kɔ̀ɔ̀

E nuu kwɛi, ke Elɔdi ké e lààwùn kpáa yeyèa Tiili-mɛ̀ɛ̀bò ni Sidon-mɛ̀ɛ̀bò pé. Kɛ́ pɛ́ɛ piilɛ láà à gi-mɛ̀ɛ̀bò' bo' ban-á ké tà, ke àng wʋʋ' tó do, le wó nu' à pé le. Wó waa' bhi, le wó daa' àbhà kwíi maakɛɛ-mɛ̀ɛ̀' wó nuu à leeà Balasu láà à zíà le. Ang wʋʋ' bo' mɔɔá àle bhà, wo solong kún' wo' gwilinɛ nɛ̀ le. Atoosiwo àng pe lùu légbàa-pɔ̀ɔ̀n tó' nùù góà gwilinɛ Elɔdi láà àle pe lùu gi le.

Gwilinɛ Elɔdi' lóó' kpɔ' àng nɛ̀, é bo' bhɔá, le é ebhà gwilinɛnɛ̀-gbààbò daa' e bhà, le é yala' ebhà gbòlò tà, le é liangzɛ' téng-lé, le é à zɛ', le é à zɛ', le é bhaamɛ̀ɛ̀ tó zʋʋ kun',

le mɛnó' gbala' wo: áatana ke wʋʋ' lebhà é le. Ale àa bhaamɛ̀ɛ̀ bhɛ́i-le ke wʋʋá.

Wʋʋ láà à gò àng biinlé-yè' to' kpókpóá, le é to' le Gwilinɛ Kpáa-à kɩ́ɩ́la do' wún go' Elɔdi yáin, le yuun' daa' à gi, le é to' sáabhi le é ga', à yáán' gie' wo' Aatana gi láà à-wùn gi le.

Sée àle' kɛɛii kwɛi láà, ke Aatana wʋʋ ké lóii liélé do.

É go' àle gi, Banaba ni Sɔli' lo' nà kɔ́nɔ́' gá Zelizalɛm láà, wó bo' à daaá, le wó Záàn' à tɔ́yààtà' Maki-a láà à si' wo gɛin, le wó sɛi' wó lo' Antiɔsi le.