Actes 13

Legilizi' nuu Antiɔsi láà, Aatana wʋʋ léban-mɛ̀ɛ̀bò ni legilizi dɔɔ-mɛ̀ɛ̀bò ké nuu à gi kpeá. À ke' nuu Banaba-a, le à ke' nuu Simon' wó nuu à leeà miɔn Tíi láà à gá, le à ke' nuu Lusiu Silɛni-miiá, le à ke' nuu Manaɛn' é kóló wo' sɛ́ɛ́nɛ Elɔdi wɛì láà à gá, le à ke' nuu Sɔli-a le.

Wó nuu goloà Gwilinɛ Kpáa-à golo gi kwɛnggei, ke wo súng waaii, le Aatana-à Waa Zaazaa' wɩɩ' àng nɛ̀ ye: Kà Banaba ni Sɔli sí ka finibhà, ke ká àng yaa n nɛ̀ pɛi, ke án àng daa' bháála' à kàngbhà láà, ke wò ló à kɛɛi.

À kɛ̀ɛ̀ kwɛiyè láà à gi, wó bo' súng waaá, ke wò bo bhàiwoá Aatana zì, le wó wo kɔɔ dɔ' àng tà, le wó wʋʋ kpɔ' àng bhà, le wó lo' le. Banaba ni Sɔli wàà Sipɛlɛ lùu gi-yè

Waa Zaazaa' Banaba ni Sɔli bɔ' wo' kwɛi láà, wo yɔɔ' Selesi, le wó daa' yítà-gɔ̀ɔ̀ gi bhi, le wó lo' Sipɛlɛ sɛ́ɛ́' é kɔ̀ɔ̀yí zué láà à gi le.

Wó waa' Salamini, wo lo' Aatana-à liangzɛi Zuifu-bòà bànkétà-kwììbò gi bhi. Záàn ké nuu àng wɛì, le é nuu àng tàkún-à le.

Wó bo' gieá Sipɛlɛ sɛ́ɛ́ láà à tó gi, ke wò ló flúúlé, ke wò waa Pafo, le wó zʋ́ʋ́-mii do ke ta' bhi le. Zuifu-mii ke' nuu à gá, le é nuu e leng tóà Aatana wʋʋ léban-mɛ̀ɛ̀a le. Wo nuu à leeà wo Baa Yesu, le wó nuu zí à leeà Gɛlɛki-wʋ̀ʋ̀ gi wo Elima le.

É nuu kúmana kpáè' à wɛì bhi, wo nuu à leeà Sɛɛzi Pɔlisi. Wún dɔn-mɛ̀ɛ̀ leng' nuu kúmana láà à gá, le é Banaba ni Sɔli lee' kwɛnggei, le é à pe' àng nɛ̀ ye: Aatana wʋʋ ma lɔ̀ɔ̀ ké e bhà le.

Kɛ́ zʋ́ʋ́-mii láà e nuu daaà Banaba ni Sɔli-nù yáin, le é nuu kúmana tóló gi gó-lèè guoà, ke òo nù wɩ́ɩ́ Aatana wʋʋ bhà le.

Kɛ́ le Sɔli' wó nuu à leeà wo Pɔli láà, Waa Zaazaa' à pa', le é yánwɛ́ɛ́ go' kɛlɛ gi,

le é wɩɩ' zʋ́ʋ́-mii láà à nɛ̀ ye: Gɔɔ̀yóoà nɛ́-mɛ̀ɛ̀' ileá kwɛi le. Dáin-bhààmɛ̀ɛ̀, ile-mii' mɛ̂ɛ tàbhɛlɛ lɔ̀ɔ̀' i gwí dɔyèa, ke wúnsɛ̀ kekekèke lɔ̀ɔ̀ àa i kɛɛ láà la ò, i i boà Gwilinɛ Kpáa kɔ̀ɔ̀là sieá mɔ̀bhà' wo le?

Gwilinɛ Kpáa' i kún' wo à gá tenglé lɛ́ɛ. Í tóà yánwiliá, le bha ke- gie i tà, ke yáá yáán ye koo le. É àle ma', e to' sáabhi, le à yáin' tala' tíiá bìlìbìlìle, le é gbaan' e kɔɔ wawíà, ke e zaa gò e gá-mɛ̀ɛ̀ guoii le.

Kúmana láà é àle-lèè ye' kwɛi, wó Gwilinɛ Kpáa-à liang' zɛ' láà, à-mài ké à ni' miniminiyèa, le é wɩɩ' à-wùn bhà le. Pɔli-nù wàà Antiɔsi Pizidi lùu gi-yè

Wó bo', le Pɔli ni e táá yóóbò' yaa' yítà-gɔ̀ɔ̀ gi Pafo, le wó lo' Pɛlɛzi Panfili sɛ́ɛ́ gi le. Kɛ́ wó nuu lóà kwɛi, le Záàn' kaan' àng bhà, le é sɛi', le é lo' Zelizalɛm le.

Wó go' Pɛlizi, wo lo', le wó waa' Antiɔsi-pɛ̀ɛ̀ ye' é Pizidi sɛ́ɛ́ gi láà à gi le. Golo-kwèèi' bhɔ', wo sɔɔ' Zuifu-bòà Aatana-kwìle bhi, le wó yala' le.

Kwíi láà à wunmɛ̀ɛ̀bò' bo' Aatana-à tɔ́ng-sɛ̀ikwɛ́ ni à wʋʋ léban-mɛ̀ɛ̀bòà sɛ́ikwɛ́-wʋ̀ʋ̀nɛ́ ke peá, le wó wʋʋ kpɔ' mɛngge bhà wo: è yɔ́n Pɔli ni Banaba maabhà, ke è àng bhàgilawo ye: N nɛànɛ́bò, ko bháa dɔ̀ Aatana-wùn bhà wʋʋnɛ́ ke- tò' ka gɔ̀n laá, kà à pe ko nɛ̀.

Wó à pe' kwɛi, le Pɔli' wala', le é àng tàkaan' e kɔɔá, le é wɩɩ' àng nɛ̀ ye: Izalae gbebò, ni mɛ̂ɛ bhɛ́ibò' ká sùò Aatana gɔ̀n-mɛ̀ɛ̀a, kò faiwo ka nɛ̀.

Izalae-bò' kó é, ko Aatana' à lɔ̀ɔ̀kɛɛ láà, àle ko bhɛ́mabò si' e zòà-mɛ̀ɛ̀bòa lii le. E bhɛɛ yaa' àng bhà, le wó pa', ke wo yàngpénɛ̀ gi Ezite lùu gi, le é zí àng si' nuanɛ̀ gi bhi kɔɔ kpókpó bhà le.

E kolo' àng bhà fúà tà, ke e àng wʋʋ kún-ii e bhà, le é to' nàa kwɛi flúúlé, le kwee kuà-yisɛ' bhɔ' zin lià kélé le.

Wó go' bhi, le Aatana' Kanaa-mɛ̀ɛ̀bòà lùu saapiilɛ wi', le é àngbhà sɛ́ɛ́ nu' ko bhɛ́mabò láà àng nɛ̀, le é to' àng peá le.

Ale zìpieta, pɔɔn' mɔɔà kwee kàin yisɛ-ni-kɔɔ-solu yɔ̀ɔ̀nsínma bhà, àle kɛɛ', ke Aatana ké liangzɛ̀ à bhà-mɛ̀ɛ̀bò yaaii ziàn àng wunlé le. Ale bhɛɛ' lo' flúúlé, le é léta' Aatana wʋʋ léban-mɛ̀ɛ̀ Samiɛ tà le.

É go' àle gi, le wó bhàiwo' Aatana zì wo: è dɔ gbáágbààa ke è gwilinɛ do yaa wo wunlé le. Wó à pe' kwɛi, le Aatana' Sauli yaa' àng wunlé kwee kuà-yisɛ tà le. Bɛnzamɛn-kwìle-mɛ̀ɛ̀' wó nuu à leeà Kisi láà àle gbe' nuu Sauli-a le.

Aatana' zí bo' Sauli góá fàànlé, le é Davi yaa' àngbhà gwilinɛá, le é à pe' à-wùn gi ye: N zʋʋ' nuu mɛ̂ɛ leng' bhà, má àle ye lɛ́ɛ. Ale Izai gbe Davi-a le. Ale n zòàwùn tó páipái kɛɛà le.

Davi do láà àle ginɛ́ ke' nuu zí Yesu-á le. Sée Aatana ké Yesu láà à nu-yì kpɔ' lii, le é à yaa' Izalae-bò ko la-mɛ̀ɛ̀a le.

Kɛ́ Yesu òo nu láà à woà bhe, Záàn ké à to' liélé, le é lòlòkpɔ' Izalae lùu tó nɛ̀ ye: wò wo kɔɔ gó wo sɔng lé, ke é nù àng zúlú le.

A-wùn gi, Záàn lé' to' kúlúá, e nuu wɩ́ɩ́à ye: nle máá mɛ̂ɛ ye' ká zʋʋgɔɔn-ii à gá láà àleá. Kɛ́ mɛngge' é nuii n zíà láà, nle máá bhɔyèa sàbha sì à gɛɛn bhà-nùà lefienɛ́ gi.

N nɛànɛ́bò' ká Ablam ginɛ́bòa oo, mɛ̂ɛ bhɛ́ibò' ká sùò Aatana gɔ̀n-mɛ̀ɛ̀a zé oo, mɛ̂ɛ la-wʋ̀ʋ̀' kó à peii é, Aatana' à-nàà kpɔ̀- ko nà kanù kole ko nɛ̀ le.

Kɛ́ Zelizalɛm-mɛ̀ɛ̀bò ni àngbhà wunmɛ̀ɛ̀bò wòo Yesu dɔn wo la-mɛ̀ɛ̀a, le wó à zɛ' le. Sée wó à kɛɛ' wo' kwɛi láà, wàa nuu à gànnuà wo: wo Aatana wʋʋ léban-mɛ̀ɛ̀bò wʋʋ' gaa ziàn sɛ́ikwɛ́ gi golo-kwèèi tó bhà láà, wó àle gi-wùn kɛɛ' kwɛi lɛ́ɛ.

Sée wó à zɛ' wo' láà, à gɛɛn leng ke òo sɔlɔ àng gɔ̀n. Kɛ́ àle tó gi, wo gbaan' kúmana kpáè Pilati bhà wo: è à zɛ' wo do le.

À kɛ̀ɛ̀ kwɛiyè láà à gi, wún páipái' è zin Yesu-wùn bhà, ke é nuu bɛɛnzɛyèa Aatana-à sɛ́ikwɛ́ gi, wó bo' à tó kɛɛá à gá, le wó à-gèè si' à zɛ̀ à bhà-yìlì bhà, le wó lo' à bu kpɔ́i le.

Kɛ́ le Aatana' à go' gɔɔ̀le, le é à zana' le.

É bo' zanaá kwɛi, mɛ̂ɛ' wó go' Galilee sɛ́ɛ́ gi ke wó tɔnng' à wɛì fɔ́ɔ́lé Zelizalɛm láà, e e lekini gie' àng nɛ̀ yáángɛɛn kpeá. Angle wó à séeá dɔkɔ̀ɔ̀ é à gi Zuifu-bò finibhà le.

Ale kɛɛ le ko leng kó zí nâa sɛ̀ é à kpɔ́ii ka lekini ka nɛ̀, ke à gàn- tó ka yàan ka: Aatana' píní' wo' ko bhɛ́mabò nɛ̀ lii láà,

è àle gi-wùn kɛɛyèa àng ginɛ́bò ko nɛ̀ Yesu zanayèa le. Atoosiwo à bɛɛn ké zɛyèa Aatana-à táán-sɛ̀ikwɛ́ bɛɛn kpulu piilɛnàà gi wo: Aatana ké wɩɩ ye: Nbhà nɛ́' i gá le. Nle án i kpɔ́yèa tenglé le.

Aatana' Yesu gó' wo' gɔɔ̀le, ke àa tuàn sɛí dɛ́ɛ woà ke è ló búúi bhi koo láà, é nùù àle-wùn peà, le é wɩɩ' ye: Án lúbha' yaa' tùbhà, ke è tó Davi sànmáá láà, an àle woà ka bhà mai lekinilèkiniá le.

Ale kɛɛ le é bɛɛnzɛyèa zí zaa bhɛ́i keá ye: Gwilinɛ Kpáa, yáá wɩ́ɩ́ii à bhà, ke i zòà-mɛ̀ɛ̀-gèè- búú.

Sée Davi-le, Aatana' à daa' à pe lúyáán' bhà, é bo' àle tó kɛɛá à pe tée gi, e ga' wo', le é lo' e bhɛ́mabò pé, le à-gèè' buu' le.

Kɛ́ mɛ̂ɛ ye' wò à pe sɛ́ikwɛ́ gi wo: Aatana ké à zana' láà, àle-gèè òo búú le.

-39 À kɛ̀ɛ̀ kwɛiyè láà à gi, n nɛànɛ́bò, à gàn- tó ka yàànlé ka: gɛ̀ilɛ àa Yesu láà àle bhà, le Aatana- wúnyóo kɛɛ-mɛ̀ɛ̀bò bhàwùn to le. Ko àle-nàà kpɔ́ii ka nɛ̀ é le. Atoosiwo Moizi-à tɔ́ng kúnyè àa nuu mɔɔà bɔ́n yemò' à góá ka bhà láà, mɛ̂ɛ óó mɛ̂ɛ' i kpɔ Yesu lé, Aatana- àle tó gò i-mɛ̀ɛ̀ bhà Yesu láà àle sáà gi le.

Le àle' kwɛi, ká à kɛ̂ɛ sɛ̀a ke wún' Aatana wʋʋ léban-mɛ̀ɛ̀bò' à pe' lii láà, òo nù kɛɛ kaá. Atoosiwo wo wɩɩ' wo:

Yánbhà sɔ́n-mɛ̀ɛ̀bò, kà lɛgaa. Kà màiwo, ke ká waa sɛ́ɛ́á. Atoosiwo án wúnngdo ke kɛɛà ka-kwèè tà. A-wùn láà, wó woo nù à gɛingóà ka nɛ̀, yàa bhɔii ka gi mai bhà.

Pɔli ni Banaba-nù' nuu woloà Aatana-kwìle téei, ke wa bo liangzɛá, le mɛ̂ɛ' wó nuu bhi láà wó bhàiwo' àng zì wo: wò nu liang do láà à ke zɛi golo-kwèèi dɔ̀yayè bhà le.

Bànkétà' bo' yɛn-á, Zuifu-bò' nuu bhi, ni mɛ̂ɛ bhɛ́i yemò' nuu àng pe gi, àng kpe ké dɔ' àng wɛì. Le Pɔli ni Banaba-nù' liangzɛ' àng nɛ̀, le wó wɩɩ' àng nɛ̀ wo: Kà ka zʋʋ gbaan, ke Aatana' gɛ̀ilɛ' tóyèa ka bhà láà, ká à kún kpókpóá.

Golo-kwèèi ye' dɔ' à ye láà à pé, pɛ́ɛ láà à gi-mɛ̀ɛ̀ kpáè-lèè tó ké ban' ké tà, ke wò wo tóló dɔ Aatana-à liang bhà.

Kɛ́ Zuifu-bò' bhaamɛ̀ɛ̀ ting láà àng ye', bhɔlɔ' àng pa' wo' kpainkpainle, le wó gbaan' daaà Pɔli yáin, le é nuu liang' zɛà láà, wó nuu à gbègóà, ke wo sɔ̂ɔnwoii à gɔ̀n le.

Pɔli ni Banaba' à pè- àng nɛ̀ àle gi, ke síka ke àa àng gi wo: Aatana ké woo wɩɩ' ye: wúnsɛ̀' é go' à pé láà, kó à-nàà kpɔ́ kale fɔ́ɔ́lé ka nɛ̀ woo le. Kɛ́ le káá wɩ́ɩ́yèa à-wùn bhà, le káá zí bhɔyèa ka lekini gi sii' àa yɛn à sɔlɔ-mɛ̀ɛ̀ gi laá, ko leng kwéé koà seelá wo mɛ̂ɛ bhɛ́ibò' wàa Zuifu-a láà àng tà àle gi.

Atoosiwo Gwilinɛ Kpáa ké wʋʋ kpɔ' ko bhà, le é wɩɩ' ye: An i yàà, ke í tó lùu bhɛ́ibò tó yán lépóló-mɛ̀ɛ̀' gá, ke í ló mɛ̂ɛ là à bhà-wʋ̀ʋ̀ láà àle peá flúúlé, ke è waa sɛ́ɛ́ zìnkélé-lé le.

Mɛ̂ɛ' wàa Zuifu-a láà wó àle ma', àng tó ké nuu wo liágóà à-wùn lé, le wò wɩɩ wo: Gwilinɛ Kpáa wʋʋ ké sɛ̀a. À kɛ̀ɛ̀ kwɛiyè láà à gi, mɛ̂ɛ ye óó ye' àngle wó nuu sii' àa yɛn à sɔlɔ-mɛ̀ɛ̀a, àng tó ké wɩɩ' à-wùn bhà.

Gwilinɛ Kpáa wʋʋ ké nuu lóà saá kwɛi lùu láà à gi zanózànóá.

Kɛ́ le tɔ́-nɔ̀ngbò' wó nuu Zuifu-bò pe gi oo, ni pɛ́ɛ yánwɛ́ɛ́bò' nuu bhi oo, Zuifu-bò' àng zi yaa', le wó gbaan' Pɔli ni Banaba-nù piékɛɛà àng pé sɛ́ɛ́ gi bhi le.

Pɔli ni Banaba-nù' wo gɛɛn maanà- pɛ́ɛ láà à gi-mɛ̀ɛ̀bò tɔ́á àle gi, ke boi lefienɛ́' naa' àng gɛɛn bhà bhi láà, à tó- gó wo bhà le. Wó go' bhi, le wó lo' Ikoni le.

Kɛ́ sée Yesu pe gi-mɛ̀ɛ̀bò' to' bhi láà, àngle zowɛ́ɛ́ nii ké nuu daayèa tɔ̀kpɛ́tɔ̀kpɛ́lé, ke Waa Zaazaa ké àng payèa.