Actes 22
1
N nɛànɛ́bò ka ni mɛ̂ɛkpáò, ko faiwo ka nɛ̀, ke n pe' n gɔ̀n, ke án à pe ka nɛ̀ tò!
2
Mɛ̂ɛ' wó nuu bhi, wó à gaa' wo: è liangzɛii wo nɛ̀ Ebɛlɛ-wʋ̀ʋ̀' gi laá, le lɛtà' ga' àng tà zilingle lekini wo, le Pɔli' wɩɩ' ye:
3
Zuifu' nleá le. Wo n kpɔ' Tasi Silisi lùu gi. Kɛ́ án kóló wò- pɛ́ɛ é àle gi le. Án nuu Gamaliɛ gɔ̀n kalanglé, le é n dɔɔ' ko bhɛ́mabòà tɔ́ng tóá, le án à dɔn' kpákpálé le. Aatana-wùn-pài ké nuu n tà bɩ́bɩ́lé, ye é ka lekini ka gɔ̀n kɔɔ' gi tenglé é à nɛ̀.
4
A-wùn gi, án nuu táásì Yesu-à zaa tà-mɛ̀ɛ̀bò wɛ̀ikɛ̀ɛ̀woà, ke àng tó- gó. Miɔnbò ni nɔ́ngbò' nuu zaa láà à tà, án nuu àng tó kún-à, le an àng daa kààso gi le.
5
Yíkpáá-mɛ̀ɛ̀ kpáè ni moaagbebò tó páipái ké n séeá àle gi. Wo n gba lefienɛ́ wo' sɛ́ikwɛ́á wo: án ló nà à gá ko nɛànɛ́ Zuifu-bò' wó Damasi àng nɛ̀. Án lo' zaa láà à tà-mɛ̀ɛ̀ yemò' nuu bhi àng yelei, ke án nu nà àng gá Zelizalɛm zé, ke wò wún gó àng yáin. Pɔli-à e dàà Yesu pe gi-kɔ̀ɔ̀ gɛingóyè
6
Kɛ́ n lóyèa, án bhɔ' waa lià Damasi, ke yáán' bhɔ yaa lià mɛ̂ɛ gwenglé zué, máà n káá' wo, ke pɔngge zán' go' lɔngwɛ́ɛ́ gi, ke à lé- gie yáán zán tà, ya mɔ̀ng maa n zì kpáaá bolongle.
7
Le án to' le án pɛlɛ' sáaá, le wʋʋ ke' daa' n tóló gi ye: Sɔli oo, Sɔli oo, mɛɛ kɛɛ le i n wɛ̀ikɛ̀ɛ̀wo kwɛi le?
8
Le án à bhàgilawo' ma: Gwilinɛ Kpáa, ile wáa-le í bhi le? Le é wɩɩ' n nɛ̀ ye: nle Yesu Nazalɛti-mii', í n wɛ̀ikɛ̀ɛ̀woii láà, nle án bhi le.
9
Ale' kɛɛii kwɛi láà, ke mɛ̂ɛ' wó nuu n wɛì, wo mɔ̀ng zán láà à ye, kɛ́ ke wàa mɛ̂ɛ' é nuu liangzɛà n nɛ̀ láà à wʋʋ ma.
10
É kɛɛ' kwɛi, le án wɩɩ' ma: Gwilinɛ Kpáa, è tò' kwɛi, án à kún lɔ? Le Gwilinɛ Kpáa' wɩɩ' n nɛ̀ ye: bhè walá ke í ló Damasi. Wún' án à pé ma: í à kɛ̂ɛ láà, i wàà' bhi, le wò à pe i nɛ̀ le.
11
É àle peii kwɛi láà, ke máá lɛnggelɛ̀ngge ye pɔɔn zán' án à ye' láà à-wùn gi. Le mɛ̂ɛ' wó nuu n wɛì bhi, wó n kɔɔ lékun', le án waa' Damasi le.
12
Kɛ́ mɛngge' nuu Damasi bhi, wo nuu à leeà Anania. E nuu súóà Aatana gɔ̀n, le é nuu Moizi-à tɔ́ng kún-à e sɔbhɛɛá le. A-wùn gi, Zuifu-bò tó páipái ké nuu à-wùn sɛ̀ peà pée bhi.
13
Anania láà e nu' n lià, le é wɩɩ' n nɛ̀ ye: Sɔli, n laànɛ́! Án wɩɩ ma: i yánlé- póló, ke í lee ye. Anania' à pe' kwɛi, án to' sáabhi le n yánlé' polo', le án à lekini ye', le é wɩɩ' n nɛ̀ ye:
14
Aatana do' ko bhɛ́mabò' nuu à lɔ̀ɔ̀kɛɛà láà, àle i daa', ke í à zòàwùn dɔn le. E sée i daa láà à wò- kwɛi, ke í nù yáánpá' wo àbhà yaa-mɛ̀ɛ̀' òo wúnyóo kekekèke kɛɛ láà à bhà, ke è zí gò' bhi ke í à líílé-wʋ̀ʋ̀ ma le.
15
Atoosiwo í tóà à séeá bhaamɛ̀ɛ̀ tó zué, pɔɔn' í à ye' ni í wún' ma' láà à-wùn gi.
16
Le àle' kwɛi, i tuàn yaa mɛɛ bhà koo le? Bhè walá ke í bhàiwo à tɔ́á, ke wò i dàà à pe gi-zùlù wo, ke Aatana- i bhàwùn tó. Pɔli lò liangzɛi mɛ̂ɛ' wàa Zuifu-a àng nɛ̀ gɛɛn
17
Án bo' Anania' wʋʋ' pe' láà àle gi-wùn kɛɛá, le án sɛsi', le án nu dɛ́ɛ wo' Zelizalɛm zé le. Án nuu bhàiwoà kwɛnggei Aatana-kwìle,
18
le n yáin' daa' Gwilinɛ Kpáa-á, ke e à peii n nɛ̀ ye: bhè à kɛɛ váánlé, ke í gó Zelizalɛm-pɛ̀ɛ̀ é à yáànbhà, atoosiwo í n-wùn' peii láà, mɛngge àa tóló dɔii à bhà zé.
19
Le án wɩɩ' ma: Gwilinɛ Kpáa, àng lekini ké à gànnu wo: án nuu lóà bànkétà-lèèbò bhɛɛ tà dɔ́ɔ̀nle fɔ́ɔ́lé, le án nuu kpɔ̀ i lé-mɛ̀ɛ̀bò daaà kààso gi, le an à pe ma: wò àng maa bòo ziàn le.
20
Wó lefiewo ibhà kɩ́ɩ́la dɔ-mɛ̀ɛ̀ Etiɛni yuɛn kpɔ' kwee' gi láà, n lekini ké nuu à-lèè bhà bhi. N zi ké nuu à zɛ-mɛ̀ɛ̀bò pé, le án nuu àngbhà gbààbò maakɛɛà le.
21
Kɛ́ án bo' à peá Gwilinɛ Kpáa nɛ̀ kwɛi, le é wɩɩ' n nɛ̀ ye: bhè ló-le wo, án tuàn i bɔà mɛ̂ɛ' wàa Zuifu-a àng finibhà lee dɔ́ɔ́n gi. Pɔli ké e tò Wɔlɔm-miiá-wùn tàpolo'
22
Gwiligbá láà àng tó ké wo tóló dɔ' Pɔli' wʋʋ' pe' láà à bhà flúúlé, kɛ́ é bhɔ' naa láà àle tà, àng tó' gbálá' wo' kpókpóá wo: Mɛ̂ɛ suu é, à zɛ- wo, à zɛ' è wo le. À tó òo woà bhi kwɛi.
23
Wó àle peii kwɛi láà, ke wo gbáláii, ke wo woà gbàà kɔɔnbò gimaaii, ke wo zí sɛ́ɛ́ biibò wɛin-ii tɛ́nglà ziàn.
24
Sɔ́yabòà kúmana láà é à-lèè ye' kwɛi, le é wɩɩ' ye: wò daa nàa Pɔli-a sɔ́ya-gbùnng gi, ke wò à biin lépóló fányanwɛ́ɛ́á, ke bhaamɛ̀ɛ̀' nuu zuaà à tà kwɛi wún' gi láà, é nù à-wùn dɔn.
25
Wó nuu Pɔli yeleà tée' gi, ke wóò à maa fányan-á, le é wɩɩ' kapitɛni' nuu bhi láà à nɛ̀ ye: É Wɔlɔm-mɛ̀ɛ̀bòà tɔ́ng gi la ò, wo àngbhà situayɛn maa ziàn, ke lɩ́ɩ́-le òo à zɛ bhe è?
26
Pɔli' àle pe' kwɛi, kapitɛni-mii láà e tó' wo' le é lo' à pei woà kúmana nɛ̀ ye: I à-kɔ̀ɔ̀ keeà lɔ? Atoosiwo mɛ̂ɛ láà, Wɔlɔm-sìtuayɛn' à gá le.
27
Kúmana leng' àle ma' laá, e nu' wo', le é wɩɩ' Pɔli nɛ̀ ye: Bhè mai-wùn pe n nɛ̀ bhee, Wɔlɔm-mii' i gá la è? Le Pɔli ye: Iin.
28
Le kúmana ye: Nle án n pe situayɛnnɛ̀-le lɔ́' wo' wɛ́i kpáalàkpààa le. Le Pɔli ye: Nle ké bhɔ' nà n peá.
29
É bo' à peá kwɛi, mɛ̂ɛbò' wóò woo à biin lépóló sàbhiliwɛ́ɛ́á láà, àng tó' káán' wo' à zì ké bhà le. Kúmana láà é à ma' wo' ye: Wɔlɔm-mii' Pɔli-a, kɛ́ ke a woo bo à yeleá láà, le à-wùn' síka daa' à gi le. Pɔli dɔ̀ Sanedɛnɛ zué-kɔ̀ɔ̀
30
À tàalà' bhɔ', sɔ́yabòà kúmana láà e nuu à pé ye: Zuifu-bò' Pɔli wɛì wún' gi, é à gɛɛn dɔn, le é bhɛɛ́ɛ́ polo' à bhà, le é à pe' yíkpáá-mɛ̀ɛ̀bòà wunmɛ̀ɛ̀bò ni Sanedɛnɛ tó nɛ̀ ye: wò ban ké tà le. Wó bo' ban láà à woá ké tà kwɛi, le kúmana' yɔɔ' nàa Pɔli-a, le é à dɔ' àng zué le.