Actes 23
1
Pɔli' e yáán ta' Sanedɛnɛ gi-mɛ̀ɛ̀bò láà àng bhɛɛ tà, le é wɩɩ' ye: N nɛànɛ́bò, án táási' Aatana-à zaa tà kɔɔ' gi flúúlé ke tenglé' bhɔ é, n zowɛ́ɛ́ ké kpááyèa n gwílé à-wùn gi.
2
Pɔli' à pe' kwɛi, le yíkpáá-mɛ̀ɛ̀ kpáè' nuu bhi, ke wó nuu à leeà Anania láà, é wɩɩ' mɛ̂ɛ' wó nuu dɔɔ Pɔli maabhà àng nɛ̀ ye: wò Pɔli maa à biin bhà le.
3
Pɔli' wɩ̀ɩ̀ à nɛ̀ àle gi ye: Wɩ̀ɩ̀lʋʋ-bhààmɛ̀ɛ̀, mɛɛ kɛɛ le í yaa n gi-lìang zì mai-wùn' é Aatana-à tɔ́ng gi à-zàà tà, le i wɩɩ ye: wò n maa le? È tò' kwɛi, ke i leng yé tɔ́ng láà à sie' wo lɛ́ɛ. Aatana ké i lekini pe maa woà à-wùn gi.
4
É à pe' kwɛi, le mɛ̂ɛ' wó nuu dɔɔ Pɔli maabhà láà wó wɩɩ' wo: I sɔ̂ɔn' woii loô Aatana-à yíkpáá-mɛ̀ɛ̀ kpáè gɔ̀n láà la o.
5
Le Pɔli ye: N nɛànɛ́bò, máá nuu à gànnuà ma: yíkpáá-mɛ̀ɛ̀ kpáè' à gá le. Atoosiwo à bɛɛn ké zɛyèa Aatana-à sɛ́ikwɛ́ gi wo: Koo wʋʋ yóo peà ko wunlé-mɛ̀ɛ̀ nɛ̀.
6
Ale' kɛɛii kwɛi láà, ke Pɔli ké à gànnu ye: mɛ̂ɛ' wó banyèa ké tà bhi láà, àng zɛngpé do ké Sadusiɛn-bòa, le àng pɛ́ɛ́n dini' Faliziɛn-bòa le. Ale kɛɛ le é e wʋʋ léwala', le é wɩɩ' ye: N nɛànɛ́bò, Faliziɛn gbe' n gá, le n lekini án Faliziɛn-a le. Yáán tò ga-mɛ̀ɛ̀bò zanayè gɔ̀n-wùn láà, wò n kúnyèa àle gi é le.
7
É bo' àle peá kwɛi, línaa ké daa' Faliziɛn-bò ni Sadusiɛn-bò' nuu bhi àng finibhà, le bànkétà láà é pee' à gi le.
8
Atoosiwo Sadusiɛn-bò ké wɩɩ wo: ga-mɛ̀ɛ̀bò zana-wùn àa bhe. Wo wɩɩ zí wo: Aatana-à kɩ́ɩ́labò, ni yínaabò lefie ke àa bhe. Kɛ́ le Faliziɛn-bò-le wò wɩɩ wo: à tó ké bhe le.
9
Wó nùù ké gbègóà àle bhà gban`nggbanngle, le Aatana-à tɔ́ng dɔ-mɛ̀ɛ̀bò ye' wó Faliziɛn-bò pe gi láà àng kemò' wala', le wó sɔɔ' gbáláà kpókpóá wo: Ááoo! Kwáá wúnyóo kekekèke yeyèa mɛ̂ɛ é à bhà. Kɛ́ yínaa ke ɛ́ɛ́n Aatana-à kɩ́ɩ́la ke' ya nù liangzɛ à nɛ̀ yíiín lɛ́ɛ.
10
Kɛ́ línaa láà é nùù lóà daa lesósó' woà à lé le. Kúmana' nuu súóà, ke wòo woo Pɔli zɛ do, le é à pe' ebhà sɔ́yabò nɛ̀ ye: Kà yɔɔ ke ká Pɔli sí mɛ̂ɛbò láà àng finibhà, ke ká ló nà à gá sɔ́ya-gbùnng gi.
11
Wó bo' lóá à síi bhi, à pe gbɛi' yaa' láà, Gwilinɛ Kpáa ké yɔn' Pɔli maabhà, le é liangzɛ' à nɛ̀ ye: Bhè i zʋʋ gbaan, í n-wùn gɛingo' kɔɔ do' gi Zelizalɛm zé láà, à-lèè ké à bhà ke í zí à gɛingó à-kɔ̀ɔ̀ do láà àle gi Wɔlɔm leng bhà le. Pɔli zɛ-yàngbha
12
À tàalà yué' bhɔ', le Zuifu-bò' Pɔli zɛ-wùn yààkébhà kɛɛ', le wó wo kaiwo' wo: wo pɔɔn bhɛ̀lɛ̀' ɛ́ɛ́n wo yí mì', ke wóó Pɔli zɛ bhe, wúnsɛ̀ òo kɛɛà wo nɛ̀.
13
Mɛ̂ɛ' wó wo ké gba' zʋʋá kwɛi láà, àng tó bànkétàyè ké nuu gieà bhaamɛ̀ɛ̀ kuà-yisɛ tà.
14
Wó lo' yíkpáá-mɛ̀ɛ̀bòà wun-mɛ̀ɛ̀bò ni mɔaagbebò lià, le wó à pe' àng nɛ̀ wo: Kwéé ko kaiwo ko: bhɛlɛ-pɔ̀ɔ̀n-le do ke àa líe zin-ii ko biin bhà, ke kóó Pɔli-le zɛ bhe.
15
Le àle' kwɛi, ka lekini kà mɔɔ à gi tò, ka ni Sanedɛnɛ tóá, ke ká à pe kúmana nɛ̀, ke è nu nà à gá ka zué. Ka lò', ká à pe ka: káà àbhà wún láà àle gisɔi ke wo le. È tò' kwɛi, ko leng kó mɔɔà à zɛá, ke òo waa ka zué bhe.
16
Wó yàngbha' yaa' Pɔli bhà kwɛi láà, à lɔ́ɔ̀-loò ke' nuu bhi, à gbe ké à-wùn ma', le é lo' sɔ́ya-gbùnng gi, le é à pe' Pɔli nɛ̀ le.
17
Pɔli ké to' le é kapitɛni do ke lee', le é wɩɩ' à nɛ̀ ye: Bhè dɔ gbáágbààa ke í ló minɛ́ é à dɔi kaà kúmana lià. E à pé ke é nâa ke kpɔ́ à nɛ̀.
18
Kapitɛni láà é dàà à nɛ̀ liélé àle gi, le é lo' à dɔi àngbhà kúmana lià, le é à pe' à nɛ̀ ye: Pɔli' é kààso gi láà, àle n lee', le é bhàiwo' n zì ye: án nu minɛ́ é à dɔi i lià le. Ibhà nâawʋʋ ke ké à pé.
19
Le kúmana' minɛ́ láà à kun' à kɔɔ bhà, le wó lo' wun dɔi piilɛ gi, le é à bhàgilawo' ye: Mɔ̀ng' à-wùn' i gɔ̀n, ke í à pe n nɛ̀ le?
20
Le minɛ́ ye: Zuifu-bò wʋʋ ké mɔɔyèa wo: wó à peà i nɛ̀, ke í nu nàa Pɔli-a Sanedɛnɛ zué tili. Wo à kɛɛà ye mɛ̂ɛ' à-wùn gimà sɛ̀a-lèè guoii à nɛ̀.
21
Kɛ́ miá à zìdɔ, atoosiwo bhaamɛ̀ɛ̀ kpe' wò gie kuà-yisɛ tà, àng tó ké kpɔ̀ à gɔ̀n gbá gi-lèè guoii, le wa woo wo kaiwo, wo: wáá pɔɔn bhɛlɛii, sée wáá yí mi-ii, ke wóó Pɔli zɛ bhe le. Ale òo kɛ̀ɛ̀', lángga- wo kún. Kó dɔɔ' wo yáán é à gi é, wa woo wo tà tó kún. Wò wo yáán tóii ile i pe wɩ̀ɩ̀ à bhà-yè lengdo' gɔ̀n le.
22
Minɛ́ láà é bo' à peá kwɛi, le kúmana' wʋʋ kpɔ' à bhà ye: Í wʋʋ' pe' n nɛ̀ láà, miá i biin gó à tà mɛngge nɛ̀. Pɔli bɔ̀ kúmana kpáè Felisi zué-kɔ̀ɔ̀
23
Minɛ́ láà é bo' góá bhi, le sɔ́yabòà kúmana' kapitɛni piilɛ lee', le é wɩɩ' àng nɛ̀ ye: Kà sɔ́yabò kàin piilɛ yaa ka-kɔ̀ɔ̀a, ninà sʋʋ tà-mɛ̀ɛ̀ kuà-saapiilɛ, ni dí bili-mɛ̀ɛ̀ kàin piilɛá, ke ká walá lɛlàdɔ gi, ke ká ló Sezalee.
24
Kà sʋʋbò tó tàkún, ke ká ló ke ká waa nà Pɔli kélékèlèyèa kúmana kpáè Felisi zué bhi.
25
Sɔ́yabòà kúmana ké sɛ́ikwɛ́ bɔ' àng tà kúmana kpáè láà à nɛ̀, le é wɩɩ' à gi ye:
26
Nle Kolodi Lizia nle án bhi le. Kúmana kpáè kólósɛ̀-mɛ̀ɛ̀ Felisi, má wɩ́ɩ́ i bhà, má wɩ́ɩ́ i bhà sɛ̀a.
27
Mɛ̂ɛ é, Zuifu-bò' woo à kún, le wa woo bhɔ à zɛ lià le. Án wàà bhi àle téei nà sɔ́ya kpuluá, le án à la' àng gɔ̀n, ke má à ma wo: Wɔlɔm-mii' à gá le.
28
Án lò- nàa à gá àngbhà Sanedɛnɛ zué àle gi, ma ke wó nuu à kún-à wún' gi, án à gɛin ma le.
29
Án waa' bhi, nle án n pe' ye' à gi, àle ye: wò à wɛì àngbhà tɔ́ng kemò' wò à gbègo wo kiá láà àle-wùn gi le. Kɛ́ wúngge bhɛ́i ke àa à bhà, ke è tó à zɛ gɛɛn-á, ɛ́ɛ́n ke è tó lefienɛ́ wo à kùn-i-wùn-a.
30
Án à mayè' gá wo: wa kpɔ́ à gɔ̀n gbá gi láàá, àle kɛɛ le án à ba4ɔii i lià gɛngdo le. An à peyèa àle gi à lɩ́ɩ́ kpɔ́ yóóbò nɛ̀ ma: wò zin ile i bhà à-wùn gi le.
31
Sɔ́yabòà kúmana' à pe' àng nɛ̀ kɔɔ' gi, wó à kɛ̀ɛ̀ àle-kɔ̀i, le wó Pɔli si', le wó wala' nà à gá gbɛi gi, le wó lo', le wó waa' Antipati le.
32
À tàalà' bhɔ', le wó sɛi' le wó nu' sɔ́ya-gbùnng gi Zelizalɛm le. Sʋʋ tà-mɛ̀ɛ̀bò lengdo' lo' Pɔli dɔi Sezalee le.
33
Wó waa' bhi, le wó sɛ́ikwɛ́ láà à nu' kúmana kpáè nɛ̀, le wó Pɔli kɔ́nɔ́wo' à nɛ̀ le.
34
Kúmana kpáè' bo' sɛ́ikwɛ́ gaaá, le é Pɔli gòi-lùu bhàgilawo' le.
35
É à ma' ye: è gò Silisi sɛ́ɛ́ gi, le é wɩɩ' ye: Ka nà mɛ̂ɛ' àng gá ká ké bhà láà, wò wàà' zé, ke án nuu i bhàgilawoà. É bo' à peá kwɛi, le é wɩɩ' ye: wò ló Pɔli maakɛɛi Elɔdi' gwilinɛnɛ̀-gbùnng' dɔ' láà à gi le.