Actes 25

Fɛsitu' bo' waaá Sezalee, ke è yaa lùu láà à wunlé, e yáángɛɛn kɛɛ' bhi piilɛ. À yakanàà-kwèèi' bhɔ', le é tɔnng' Zelizalɛm le.

Yíkpáá-mɛ̀ɛ̀bòà wunmɛ̀ɛ̀bò ninà bhaamɛ̀ɛ̀ tiàntiànlebò' Zuifu-bò kpe gi, wó nu' à lià bhi, le wó Pɔli daa' à nɛ̀ le.

Wo bhàiwo' à zì wo: è dɔ gbáágbààa, ke è Pɔli bɔ wo nɛ̀ Zelizalɛm. Atoosiwo wo nuu kpɔ̀ à gɔ̀n gbá gi-lèè guoà, ke è nù' nui, ke wò à tó zaá, ke wò à zɛ.

Kɛ́ le Fɛsitu' à yoobɔ' àng gɔ̀n ye: Má à ma. Kɛ́ Pɔli- kààso' gi Sezalee le. È gò' zí àle gi, n lekini n sɛì ke án ló bhi gi àa dɔ́ɔ́n-á koo.

Kɛ́ mɛ̂ɛ' ká zé é, bhaamɛ̀ɛ̀ tiàànlebò' ka kpe gi, ke wò mɔɔà nuá Sezalee, wò yɔɔ n wɛì, ke mɛ̂ɛ láà à kɛɛ-wùn yóo ke- tò', wò à daa n nɛ̀ bhi' wo le.

Fɛsitu' yáángɛɛn' kɛɛ' Zelizalɛm bhi, é tò- saaka ɛ́ɛ́n buu kpáólé' à-nàà tà, le é to' le é sɛi', le é yɔɔ' Sezalee le. À tàalà' bhɔ', le é lo' yaai ebhà liangzɛ-gwɛ̀ɛ̀ tà, le é wɩɩ' ye: wò nu nà Pɔli-a e nɛ̀ le.

Wó bo' waaá nà Pɔli-a bhi, Zuifu-bò' go' Zelizalɛm ke wò yɔɔ láà, wo kɔnɔ' wo' à zì, le wó sɔɔ' wún bílíbílí kpe tó naaà à bhà le. Kɛ́ sée àng lekini wàa nuu mɔɔà à ke tò maiá-kɔ̀ɔ̀-le peá.

Wó bo', le Pɔli' e pe pe' ye: Zuifu-bòà tɔ́ng oo, ni tɔ́ng' è zin Aatana-kwìì-wùn bhà oo, ni gwilinɛ Sezaa-à tɔ́ng oo, máá à kekekèke sieyèa.

Kɛ́ e nuu Fɛsitu pé ye: e lekini-wùn liá- waa Zuifu-bò gi. É wɩ̀ɩ̀ Pɔli nɛ̀ àle gi ye: Í wɩ́ɩ́à lò Zelizalɛm-wùn bhà, ke i gi-lìang- nù zɛ n zué bhi è?

Kɛ́ le Pɔli' à yoobɔ' ye: Án dɔɔ tèbhenaani ye' à zué zé é, gwilinɛ Sezaa' àle yaayèa le. A-lèè ké à bhà ke wò n gi-lìangzɛ àle zué le. Mɔ́ɔ́ wúnyóo ke kɛɛ Zuifu-bòa. I lekini ké àle gànnu kpákpálé.

È tó-le wò' zí ye: lɩ́ɩ́ sɛ̀ àa n pé, sée ke wò mɛ̂ɛ zɛ wún' gi, an àle kɛɛyèa laá, ke máá kpaii n zɛ-wùn bhà àlei. Kɛ́ wó wúnbò' naaii n bhà láà, mai-wùn-le òo tò' à gi, mɛngge àa mɔɔii n lédɔá àng nɛ̀. É àleá, ke an lóà àlei Sezaa' à zué le.

É bo' à peá kwɛi, le Fɛsitu ni à wɛì-mɛ̀ɛ̀ tiàànlebò tó' lo' sɔ́nɔ́ gi le. Wó go' bhía, le Fɛsitu' à pe' Pɔli nɛ̀ ye: Sezaa zué-lèè' í à pé ke í ló bhi láà, i lóà bhi' wo le. Pɔli liangzɛ̀ Agilipa ni à lɔ́ɔ̀ loò zué-yè

Yáángɛɛnnɛ́ ke' gie', le gwilinɛ Agilipa ni à lɔ́ɔ̀ loò' wó nuu à leeà Belenisi láà, wó nu' wɩ́ɩ́i Fɛsitu bhà Sezalee le.

É nuu' wo' ke wo mɔ́ii bhi láà, le Fɛsitu' gie' Pɔli-à wún láà à pé Agilipa nɛ̀ ye:

Kúmana kpáè Felisi ké mɛngge to' kààso gi zé. Án waa' zé tée' gi, ke án tó ke án ló Zelizalɛm láà, le Zuifu-bòà yíkpáá-mɛ̀ɛ̀bòà wunmɛ̀ɛ̀bò ni àngbhà mɔaagbebò' à daa' n nɛ̀, ke wo à peii wo: án dɔ gbáágbààa, ke án lɩ́ɩ́ sie à bhà, ke wò à zɛ le.

Kɛ́ le án wɩɩ' àng nɛ̀ ma: Wɔlɔm-mɛ̀ɛ̀bò-le kole kwáá mɛngge zɛ lɩ́ɩ́á bhiábhiá, ke à-mɛ̀ɛ̀ ni à daa-mɛ̀ɛ̀bò-le wòo lɩ́ɩ́ kpɔ́ kiá, ke à-mɛ̀ɛ̀ òo e pe pe-lèè ye bhe.

Wó nù- n wɛì zé àle gi, le mɔ́ɔ́ lóó kpɔ́ àng gɔ̀n, kɛ́ le à tàalà' bhɔ', le án to' le án yaa' liangzɛ-gwɛ̀ɛ̀ tà, le án à pe' ma: wò nu nà mɛ̂ɛ láà à gá n zué le.

À leni à daa-mɛ̀ɛ̀bò láà wó dɔ' ké wɛí n zué, wòo wúnyóyoo yemò' nle án nuu zʋʋgɔɔn-à à gá láà àle kekekèke tɔ́ lefienɛ́ pe à bhà.

Kɛ́ àng pe Aatana lɔ̀ɔ̀kɛɛ-kɔ̀ɔ̀ pɛiyè láà, wó àle gbègo' kià nà à gá le. È gò' àle gi, mɛngge' wó nuu à leeà Yesu, ke é ga', kɛ́ ke Pɔli-le- wɩɩ ye: e yáán láà, wo zí àle leng-wùn gbègo' kiá le.

Án à gaa' àlei ke liang suu láà à zɛ-kɔ̀ɔ̀ àa n yàan, le án Pɔli bhàgilawo' ma: e wɩ́ɩ́à lò Zelizalɛm-wùn bhà, ke wò à gi-lìangzɛ bhi è?

Kɛ́ le Pɔli' wɩɩ' ye: e lóà e liélé za' wo, ke e gi-lìang láà, gwilinɛ Sezaa lekini- nù à zɛ le. Án wɩ̀ɩ̀ àle gi ma: wò à tó kààso gi zé flúúlé, ke à bɔ̀ gwilinɛ Sezaa nɛ̀-kwèèi- bhɔ.

Fɛsitu' bo' à peá kwɛi, le Agilipa' wɩɩ' à nɛ̀ ye: N lekini án à pé ke án n tóló dɔ mɛ̂ɛ láà à wʋʋ bhà. Le Fɛsitu ye: Tili- bhɔ̀', ke è liangzɛ i zué.

À tàalà' bhɔ', le gwilinɛ Agilipa ni à lɔ́ɔ̀ loò Belenisi wó nu' ke wo zúlúyèa yaiinle, ke bhaamɛ̀ɛ̀ ké àng wɛì yèèèle, le wó sɔɔ' tèbhenaani-kwìle kià nà sɔ́ya wunmɛ̀ɛ̀ kpákpaabò ninà pɛ́ɛ-mɛ̀ɛ̀ tiàntiànlebòa le. Wó waa' bhi, le Fɛsitu' wɩɩ' ye: wò nu nà Pɔli-a le.

Wó bo' nuá nà à gá, le Fɛsitu' wɩɩ' ye: Gwilinɛ Agilipa, ka ni mɛ̂ɛ páipái' ká zé é, ko faiwo ka nɛ̀. Mɛ̂ɛ' ká à yeii é, Zuifu-bò tó páipái ké nu' tìng dɔi à-wùn gi n zué fɔ́ɔ́lé ke án Zelizalɛm, le wó nu ke wo' zí n lià Sezalee zé dɔ̀ya, ke wo gbáláii wo: òo tóà sɛ́ɛ́ tà koo le.

Kɛ́ nle ké à gànnuyèa ma: wò mɛ̂ɛ zɛ wún' gi, mɛ̂ɛ é àa à kekekèke kɛɛyèa. Kɛ́ à lekini' à peyè' gá ye: é lóà gwilinɛ Sezaa zué láà, àle kɛɛ le é n lekini n gi sɛ̀a, ke è ló à zué le.

Kɛ́ an mai-wùn lekinilèkini' bɛɛnzɛà sɛ́ikwɛ́ gi, ke án à bɔ Sezaa nɛ̀, mɔ́ɔ́ àle ye bhe le. Pɔɔn- à kɛɛ ke án à dɔyèa ka zué zé é, àle lɛ́ɛ. Kɛ́ an à dɔyèa ile gwilinɛ Agilipa-mɛ̀ɛ̀ ile fɔ́ɔ́lé i zué, é kɛ̂ɛ kwɛi ke bhàgilawo- bò' daaá à gɔ̀n, ke wʋʋ' è bɛɛnzɛà sɛ́ikwɛ́ gi, è sɔlɔ le.

Àa àleá, kààso gi-mɛ̀ɛ̀ bɔyè' é Sezaa zué, ke wó à kúnyèa wún' gi, à gɛɛn leng ke àa bhe láà, e bhɔ n gi tàmaa-wùn bhà.