Hebreux 8
1
Sée kó wún páipái' peii láà, à tó wun-lèè leng' bhe, àle yíkpáá-mɛ̀ɛ̀ kpáa sínmasìnma' kwɛi láà à tò ko gɔ̀n-yèa le. Atoosiwo àle lóyèa yalái lɔngwɛ́ɛ́ gi Aatana Gwilinɛ Kpáalàkpàà' yaa ebhà gwilinɛnɛ̀-gbòlò tà lee' gi láà à kɔɔ sɛ̀ gi bhi le.
2
À kɛ̀ɛ̀ kwɛiyè láà à gi, yíkpáá-mɛ̀ɛ̀ kpáè dɛ́ɛ láà, àle àa yaayèa gbàà gbáiwa' bhaamɛ̀ɛ̀bò' à dɔ' Aatana nɛ̀ fúà tà lii láà àle suu lé. Kɛ́ Gwilinɛ Kpáa' e lekini lɔ̀ɔ̀kɛɛ-lé ye' à baayèa lɔngwɛ́ɛ́ gi, ke àle àa bhaamɛ̀ɛ̀ ke kɔɔ gbólóá láà, è yaayèa àle lé le.
3
Sée mɛ̂ɛ óó mɛ̂ɛ' è to yíkpáá-mɛ̀ɛ̀ kpáèa, wò à yàà kwɛi, ke è Aatana lɔ̀ɔ̀kɛɛ-pɔ̀ɔ̀nbò ni sáàpɔɔnbò' kɔ́nɔ́wo à nɛ̀ le. È tò' àlei kwɛi, ke à-lèè ké à bhà ke ko pe yíkpáá-mɛ̀ɛ̀ kpáè láà, è pɔɔn' lézin-à Aatana bhà, à-pɔ̀ɔ̀n- zí tó' wo à tà le.
4
Sée Yesu' woo nù tóà sɛ́ɛ́ tà zé laá, yàa woo mɔɔ lefienɛ́ woii tóá yíkpáá-mɛ̀ɛ̀a, atoosiwo yíkpáá-mɛ̀ɛ̀ yemò' wó kpunglà zé, ke wò Aatana lɔ̀ɔ̀kɛɛ-pɔ̀ɔ̀n kɔ́nɔ́wo à nɛ̀, ke wò à kɛɛ Moizi-à tɔ́ng- à pe kɔɔ' gi à-kɔ̀ɔ̀ bhà láà, àngle wò bhe' wo le.
5
Kɛ́ yíkpáá-mɛ̀ɛ̀bò' wó kpunglà zé, wó Aatana lɔ̀ɔ̀kɛɛà tée' gi láà, ke wún ye' è kɛɛ lɔngwɛ́ɛ́ gi, wò àle bhɔ̀ɔ̀bhà ni à dìgó bhɛ́iwɛ́ɛ́bò kɛɛii le. Sée wò ziàn wúnbò láà à tó kɛ̀ɛ̀ ye Aatana' à pe' Moizi nɛ̀ ye: è à kɛ̂ɛ kɔɔ' bhà láà àle gi le. Atoosiwo é nuu ke Moizi yéè Aatana-à gbàà gbáiwa dɔ, Aatana ké wɩɩ' à nɛ̀ ye: Án n lɔ̀ɔ̀kɛ̀ɛ̀i-kwìì nai' gie' i nɛ̀ tɔɔn gwenglé láà, i gbáiwa' dɔà láà, è bhɔ àle bhà kɔɔtókɔ̀ɔ̀tó gi le.
6
Kɛ́ tenglé-yààn é àle gi, Aatana' dɔ̀lèè ye' à nuyèa Yesu nɛ̀ láà, àle ké kpáaá, le è gie yíkpáá-mɛ̀ɛ̀ fɔ́ɔ́yèbò láà àngle pe tà dɔ́ɔ́n-á le. Atoosiwo sɛ̀lúnɛ̀ dɛ́ɛ ye' Aatana' à daayèa à leni bhaamɛ̀ɛ̀bò ko finibhà, ke Yesu' à kɩ́ɩ́láá láà, àle ké zí sɛ̀a, le à lé- gie sɛ̀lúnɛ̀ fɔ́ɔ́yè' nuu láà àle tà dɔ́ɔ́n-á le. È gò' zí àle gi, Aatana' píní' wo', ke sɛ̀lúnɛ̀ dɛ́ɛ zi' gbaanyèa à gi láà, à leng lé ké gie é píní fɔ́ɔ́lé' wo', ke sɛ̀lúnɛ̀ fɔ́ɔ́yè zi' nuu gbaanyèa à gi láà àle tà dɔ́ɔ́n-á.
7
Sée sɛ̀lúnɛ̀ fɔ́ɔ́yè' nuu Aatana ni Izalae-bò ko finibhà láà, é woo nù tóà ke à gò à pé-lèè àa nuu woo à bhà laá, ke mɛngge àa woo à dɛ́ɛ ke daa-lèè guoii koo.
8
Kɛ́ sɛ̀lúnɛ̀ zìì' nuu Aatana ni Izalae-bò' àng finibhà láà, e yɛɛ ye' àng bhà, le é à pe', le wó à bɛɛnzɛ' àbhà sɛ́ikwɛ́ gi wo: Gwilinɛ Kpáa ké wɩɩ ye: yáángɛɛn ke' bhi, è bhɔ̀', án sɛ̀lúnɛ̀ dɛ́ɛ daaà ko ni Izalae-bò ni Zuda-kwìle-mɛ̀ɛ̀bò ko finibhà.
9
Atoosiwo án àng bhɛ́mabò kɔlé kun' tée' gi, ke án gó nà àng gá Ezite lùu gi láà, án sɛ̀lúnɛ̀ fɔ́ɔ́yè dàà ko nà àng gá ko finibhà tée poo àle gi le. Kɛ́ sɛ̀lúnɛ̀ dɛ́ɛ ye' an à daaà ko nà àng gá ko finibhà dɔ̀yáa gá é, àle àa tóii ye án à ye' à daa' ko ni àng bhɛ́mabò ko finibhà fɔ́ɔ́lé láà àle nɛ̀. Atoosiwo sɛ̀lúnɛ̀ ye' é nuu ko finibhà fɔ́ɔ́lé láà, wòo à gi-tààsí. Pɔɔn- à kɛɛ ke n lekini mɔ́ɔ́ yaa àng-zʋ̀ʋ̀gɔ̀ɔ̀n tà, àle lɛ́ɛ.
10
A-wùn gi, ká ka yáán tó bhi, án sɛ̀lúnɛ̀ dɛ́ɛ daaà ko ni Izalae-bò ko finibhà, ke à fɔ́ɔ́yè láà à pe lóó' bo gieá. An nbhà tɔ́ngbò daaà àng gwílé' wo, le è to àng yákiia, le an zí à bɛɛnzɛ àng zowɛ́ɛ́ pé le. Nle án tóà àngbhà Aatana-á, le àng leng wò to nbhà bhaamɛ̀ɛ̀bòa le.
11
À tée láà à gi, àng ke wàa wo bhá ke dɔɔii n-wùn-a koo, sée mɛngge àa zí à peii e laànɛ́ nɛ̀ koo ye: bhè wɩ́ɩ́ Aatana Gwilinɛ-wùn bhà, ke í à dɔn. Pɔɔn- à kɛɛ ke mɛngge àa à peii kwɛi koo láà, àle ye: è sí àng tó pɩ́ɩ́nɛ́yè bhà ke è zin nàa àng tó kpáè bhà, àng tó páipái ké n dɔn-à.
12
Atoosiwo án àng bhàwùn tóà àngbhà wúnyóyoobò-wùn gi, le n zʋʋ- go àngbhà táá-kɔ̀ɔ̀ yóyoobò tó-wùn-a le. Nle Gwilinɛ Kpáa nle án wɩɩ lɛ́ɛ.
13
Aatana' à pè' ye: é sɛ̀lúnɛ̀ dɛ́ɛ daaà àle ni bhaamɛ̀ɛ̀bò ko finibhà láà, ke e wɩɩ ye: à fɔ́ɔ́yè láà ya tó zììa. Sée wún ye' a tó zììa, ke àle gó-wùn' ya tó le.