Hebreux 9

Sée sɛ̀lúnɛ̀ fɔ́ɔ́yè' é nuu Aatana ni Izalae-bò finibhà láà, à pe kún-kɔ̀ɔ̀' wó nuu Aatana lɔ̀ɔ̀kɛɛà à bhà láà, e nuu bhe. È gò' àle gi, wó kpunglà zé-kwìì' dɔ' Aatana lɔ̀ɔ̀kɛ̀ɛ̀i-kwììa, e nuu bhe.

Aatana-kwìì' wó nuu à dɔyèa láà, à gélé-lèè ké nuu pééyèa à gi piilɛ. Wo nuu à fɔ́ɔ́yè leeà Aatana-kwìì gélé-lèè záázààyè. Làngbha dɔ̀ à lé-pɔ̀ɔ̀n oo, ni táabhɛlɛ oo, ni wò Aatana lɔ̀ɔ̀kɛɛ búlùbò' gá láà, àle nuu bhi-le bhà le.

Kwíi láà à gélé-lèè piilɛnàà' é nuu à gikààn-i-gbàà zele tia za láà, wo nuu à leeà Aatana-kwìì gélé-lèè záázààyè lenglèng.

Wó nuu làsikɔlɔ dɔà pailé Aatana nɛ̀ sánng gbɔnɛ́' à gi láà, ni Aatana-à tɔ́ng-kàànni' sánng' nuu zí maayèa à bhà lɛnói do gbalangle láà, àle nuu tiɛi za-le bhà le. Ko bhɛ́mabòà bhɛlɛ-pɔ̀ɔ̀n' go' lɔngwɛ́ɛ́ gi lii, wo nuu à leeà Mani. À wɛ́ɛ́' wó à to', é nuu zí sánng gbɔnɛ́ ye' gi oo, ni Aalon kɔlé-yìlì' é bín dɔ' lii oo, ninà gwɛɛ kóngpalanɛ́bò' Aatana-à tɔ́ng bɛɛn' nuu à tà láà, àle nuu kàànni láà à gi le.

Aatana-à kɩ́ɩ́la wunyè piilɛ' àbhà mɛ̂ɛnɛ̀ zán' nuu dɔà àng bhà, wo nuu àng nai dɔyèa kàànni láà à tà, le àng naibò láà àng gban gi' nuu pólóyèa à lé-pɔ̀ɔ̀n tà tɛ́nglà le. Sée kàànni lé-pɔ̀ɔ̀n tà-lèè' kɩ́ɩ́la piilɛ gban gi' nuu pólóyèa à tà láà, àle nuu Aatana zowɛ́ɛ́ zùɛ̀ bhaamɛ̀ɛ̀ pé-pɔ̀ɔ̀n yuɛn ban-léá le. Kɛ́ máá à pé ke án wúnbò láà àle tó zíà pe dolodolo dɔkɔ̀ɔ̀ é àle gi.

Pɔɔnbò láà à tó ké yaayèa ké bhɛɛá kwɛi dɔ́ɔ̀nle, le lee- kpɔɔ kɔi dolodolo, yíkpáá-mɛ̀ɛ̀bò- sɔɔ ziàn Aatana-kwìì gélé-lèè fɔ́ɔ́yè láà à gi, ke wò à lɔ̀ɔ̀kɛ̀ɛ̀a-pɔ̀ɔ̀n kɔ́nɔ́wo à nɛ̀ le.

Kɛ́ yíkpáá-mɛ̀ɛ̀ kpáè-le lengdo' sɔɔ à gélé-lèè piilɛnàà láà à gi gɛnyààn do fíoleá kwee bhà le. Sée é sɔɔà bhi tée' gi kwɛi láà, à-lèè ké à bhà ke tolo-pɔ̀ɔ̀n yuɛn' è tó à tà le. Atoosiwo wúnyóyoobò', àle ni Izalae-bò- à kɛɛ ziàn wo tíibhà láà, è wo lé-sòlòng kún-à Aatana nɛ̀ à-wùn gi yuɛn láà àleá le.

À kɛ̀ɛ̀ kwɛiyè láà à gi, Waa Zaazaa' nuu wún' à kpɔ̀ɔ̀bhàkpɔ́à ko nɛ̀ Aatana-kwìì gélé-lèè záázààyè lenglèng létà kweeá-yè bhà láà, àle ye: à lé àa nuu pólóyèa mɛnó gɔ̀n kɔɔ' gi láà, Aatana pé-zàà leng àa nuu zí lépólóyèa bhaamɛ̀ɛ̀bò gɔ̀n àle-kɔ̀ɔ̀ bhà le. Sée kwíi fɔ́ɔ́yè pe' nuu à bhà tée' gi láà, é nùù kwɛi àle téei le.

Kɛ́ wún ye láà àle tó' nùù à lekiniyè' kó à peii tenglé-yààn é à gi é, à kpɔ̀ɔ̀bhàkpɔ̀a-pɔ̀ɔ̀n' gá le. Pɔɔn- à kɛɛ ke an àle pe kwɛi, àle ye: tolo-pɔ̀ɔ̀n yáányèbò ni pɔɔn bhɛ́ibò' wò Aatana lɔ̀ɔ̀kɛɛ à gá ziàn láà, àle ke àa mɔɔ leng wo bɔ́n góá à-mɛ̀ɛ̀ bhà, ke à-mɛ̀ɛ̀ zowɛ́ɛ́- kpáá à gwílé ke è yizɛ.

Kɛ́ wò Aatana lɔ̀ɔ̀kɛɛ' wo kwɛi láà, wo à tó wo bhɛlɛ-pɔ̀ɔ̀n ni mi-pɔ̀ɔ̀n ninà bɔ́n gò mɛ̂ɛ bhà-zùlù wo-kɔ̀ɔ̀ suu bɛ́ɛ́á le. Sée wúlubò' è zin kpunglà zé-wùnbò lesósó bhà láà, à-lèè ké nuu à bhà ke àle- tó yaayèa kwɛi flúúlé, ke è zin nàa Aatana-wùn kún-kɔ̀ɔ̀ seelá bha bhà le.

Kɛ́ Klisi-le' tò- yíkpáá-mɛ̀ɛ̀ kpáèa dɔ̀yáa gá, ke wúnsɛ̀sɛ̀bò' à kɛɛ-wùn' nuu bhe, ke wó nuu à kpɔ̀ɔ̀bhàkpɔ́à kwɛi láà, è nù àle kɛ̂ɛ ko nɛ̀ le. A-wùn gi, àle' sɔɔ' Aatana-kwìì ye' à gélé láà, àle pe tiàànlenɛ̀-lɛ̀nggelɛ̀ngge àa zíà, le àle ni à ye' é kpunglà zé, wàa kpɔ̀ ké bhà-pɔ̀ɔ̀n lefienɛ́á le. Atoosiwo àa bhaamɛ̀ɛ̀bò dɔ-kwììa, àa zí lúyáán ye' Aatana' à daa' é, àle ke tà-pɔ̀ɔ̀n-a.

A-wùn gi, Klisi' sɔɔ' wo' Aatana-kwìì gélé-lèè záázààyè lenglèng gi láà, òo ló bhʋʋ ni dîlibò-le yuɛn ban-i bhi. É lò- nàa e lekini yuɛn' gá le. Sée é ko tàboo-sàà' go' kwɛi gɛnyààn do fíoleá e lekini yuɛn-á láà, à lé ké wɩ́ɩ́yèa, le à gi-lùbha- ko kún-à kwɛi kwɛi kwɛi, le à nààlé àa tó le.

Atoosiwo yíkpáá-mɛ̀ɛ̀bò-le wò bhʋʋbò ni dîli gɔ́ɔnbò' zɛ ziàn, le wò à yuɛn to bian gò bhaamɛ̀ɛ̀bò bhà-pɔ̀ɔ̀n-a le. È gò' bhi, wo zí dîli dábò dɔ pailé, le wò à yúé yí go, ke è zí tó bian gò mɛ̂ɛ bhà-yìa le.

È tò' kwɛi la ò, mɛɛ kɛɛ le Klisi' sáà' go' e lekini yuɛn-á láà, àle lé- kwii wɩ́ɩ́á ke è gie tolo-pɔ̀ɔ̀n-sàà bhɛ́ibò láà àngle pe tà dɔ́ɔ́n-á le? Sée Klisi' e leng tò- sáàpɔɔn ye' à bhàkáán-lèè àa bhe láà àleá Aatana nɛ̀ le. Kɛ́ é àle kɛ̀ɛ̀ kwɛi Waa Zaazaa' àa ga gbonggbongle, ke é nuu à gi láà àle bháa bhà le. È tò' kwɛi, ke à yuɛn láà àle ko kɛɛ-wùnbò' à tɔnɔ àa bhe Aatana zué à tó góà ko bhà, le è ko zowɛ́ɛ́ kpaa à-wùn gi, é kɛ̂ɛ kwɛi ke kó Aatana yáányè lɔ̀ɔ̀kɛɛ à lɔ̀ɔ̀kɛɛ-kɔ̀ɔ̀ leng tà le.

Pɔɔn- à kɛɛ ke Klisi' tóyèa sɛ̀lúnɛ̀ dɛ́ɛ' é daayèa dɔ̀yáa gá Aatana ni bhaamɛ̀ɛ̀bò ko zué à finibhà-mɛ̀ɛ̀a, àle lɛ́ɛ. Sée Klisi ké daa' ko finibhà kwɛi, ke Aatana' mɛ̂ɛ' ko leeyèa dàà e pe gi-wùn-a, ke kó nù leekpɔ̀ɔ̀tili-sànma' àa búú gbonggbongle, ke é à nu-wùn píníwoyèa ko nɛ̀ láà àle sɔlɔ le. Kɛ́ sée leekpɔ̀ɔ̀tili-sànma' Aatana' à yaayèa, ke è tó ye e kée nɛ̀ ko gɔ̀n láà, ko mɔɔà à sɔlɔá kwɛi mɛ̂ɛ' é ga' ke è tó ko tàboo-pɔ̀ɔ̀n-a láà àle sáà gi le. Atoosiwo kó wúnyóyoobò' kɛɛ', ke kó tuàn àbhà sɛ̀lúnɛ̀ fɔ́ɔ́yè kɔ̀ɔ̀bhà láà, é àle tó bian go' ko bhà kwɛi lɛ́ɛ.

Sée wò nù à pe wó mɛngge kée gi-lìangzɛ laá, ke à-mɛ̀ɛ̀' ga' wo, ke mɛnó' à gànnu le.

Kɛ́ mɛ̂ɛ' é tuàn yáán ke òo ga bhe, yàani ya woo bo e kée gúlú-kɔ̀ɔ̀ tó bɛɛnzɛá sɛ́ikwɛ́ gi laá, mɛngge àa à-wùn yaa kulu lé líe, ke à-mɛ̀ɛ̀ leng òo ga-le wo bhe. À kɛ̀ɛ̀ kwɛiyè láà à gi, kée-sɛ̀ikwɛ́ láà, wò nù à pe wó à yaa kulu lé, ke kée tó-mɛ̀ɛ̀ láà àle a ga le.

Aatana- sɛ̀lúnɛ̀' daa àle ni bhaamɛ̀ɛ̀bò finibhà láà, à leng pe- zí kwɛi' wo le. Ale kɛɛ le sɛ̀lúnɛ̀ fɔ́ɔ́yè' é nuu Aatana ni Izalae-bò finibhà lii láà, à zi òo gó bhiá ke tolo-pɔ̀ɔ̀n-le yuɛn òo kpɔ́ bhe le.

E sée kwɛi maiá. Sɛ̀lúnɛ̀ láà é nuu daaà tée' gi, ke Moizi' bo Aatana-à tɔ́ngbò léban-á dolodolo, ke Izalae-bò tó bànkétàyè tóló ké à bhà laá, e bhʋʋ ni dîlibò yuɛn ni yí si'. É bo', le é zí gainkwɛ́ ni wii kua tɛ́ɛ́n si', le é yuɛn ni yí láà à fɛ̀nfɛ̀n go' à gá Aatana-à tɔ́ng' nuu bɛɛnyèa gwɛɛ kóngpalabò' bhà láà à tà, le é go' bhi le é à ke fɛ̀nfɛ̀n go' bhaamɛ̀ɛ̀bò' nuu bhi láà àng tó tà le.

É nuu à kɛɛà kwɛi tée' gi, ke e à peii àng nɛ̀ ye: Aatana' sɛ̀lúnɛ̀' à daayèa ka ni àng gá ka finibhà láà, à zigò à tà-pɔ̀ɔ̀n yuɛn' án à wɛin-ii ka bhà lɛ́ɛ.

É go' bhi, Moizi ké zí tolo-pɔ̀ɔ̀n yuɛn fɛ̀nfɛ̀n go' Aatana-à gbàà gbáiwa ni à gélé-pɔ̀ɔ̀n páipái' wò à lɔ̀ɔ̀ kɛɛ à gá láà à tó tà.

A-wùn gi, mɛ̂ɛ ké à-lèè ye Aatana-à tɔ́ng gi wo: bɔ́n suu páipái' è to mɛ̂ɛ bhà láà, à kpáè-lèè tó gò mɛ̂ɛ bhà-pɔ̀ɔ̀n- tò yuɛn' gá, le Aatana àa mɛngge bhàwùn tó bhiábhiá, fɔ́nni ke pɔɔn yáányè ke yuɛn' ya kpɔ́ à-wùn gi le. Klisi' to' sáà' gá láà, àle bɔ́n gó leng wo mɛ̂ɛ bhà le

Bɔ́n gò kpunglà zé-pɔ̀ɔ̀n tó bhà-kɔ̀ɔ̀' nuu bhe lii, àle lɛ́ɛ. Sée wún yemò' è kɛɛ lɔngwɛ́ɛ́ gi, àle dìgó bhɛ́iwɛ́ɛ́' nuu kpunglà-pɔ̀ɔ̀nbò' kwɛi láà àle tóá le. È tò' àlei kwɛi, à-lèè ké à bhà ke lɔngwɛ́ɛ́ gi-wùnbò láà, wò àle bhà-sàà góà pɔɔnbò' gá, à tó- tó tiàntiànle, ke à lé- gie à dìgóbò pe bhà-sàà gòa-pɔ̀ɔ̀nbò-le tà.

Atoosiwo Klisi-le òo sɔɔ Aatana lɔ̀ɔ̀kɛ̀ɛ̀i-kwìì ye' bhaamɛ̀ɛ̀bò' à dɔ' wo kɔɔá, ke è tó Aatana yàlèè lekini bhɔ̀ɔ̀bhàa sɛ́ɛ́ tà zé láà àle gi. É sɔ̀ɔ̀ lɔngwɛ́ɛ́ gélé-lèè lekinilèkini' bhà, é kɛ̂ɛ kwɛi ke è dɔ Aatana zué ko-wùn gi tenglé-yààn é à gi le.

Zuifu-bòà yíkpáá-mɛ̀ɛ̀ kpáè láà àle- sɔ̀ɔ̀ ziàn kwee bhà dolodolo' wo Aatana-kwìì gélé-lèè záázààyè lenglèng láà à gi le. Sée è lò ziàn nàa tolo-pɔ̀ɔ̀n yuɛn' gá bhi le. Kɛ́ Klisi-le' sɔɔ' wo' lɔngwɛ́ɛ́ gi láà, òo sɔɔ bhi ke è e lekini tó sáàa gɛnyààn kpe-leá.

Yàa woo àleá, ke é si' lúyáán daayè bhà liilììlii, ke Klisi' gbaan' wɛ̀ilèè' yeà láà, ke è woo tuàn nàa àleá kwɛi kwɛi do le. Kɛ́ é nu' wo' lúyáán tà láà, e à wo' gɛnyààn do-kini-dòa kwɛi fíole, é kɛ̂ɛ kwɛi ke è nù wúnyóo kɛɛ-wùn yɛn' wo e lekini nù sáà gi-yèa le. Sée é àle kɛɛii kwɛi tée' gi láà, ke lúyáán yɛn bha' bhɔ tó wo kúlúá.

Kɛ́ sée ga pe gɛnyààn do-le-kpàn ké bhaamɛ̀ɛ̀ tó páipái lé, le Aatana-à gílawo kpáa' tuàn zí mɛnómɛ̀nó bhà àng gayè zìpieta le.

Klisi leng' zí e wunbílí lénù- gɛnyààn doá à-kɔ̀ɔ̀ do láà àle gi, ke è tó bɔ́n gò bhaamɛ̀ɛ̀ kpe kpáalàkpàà tó bhà-sààa le. Sée Yesu ké zí tuàn nu piilɛnàà woà. Kɛ́ è àle woà kwɛi mɛ̂ɛ' wó wo yáán tóii à gɔ̀n láà àngle la-wùn gi le. Àa tuàn nuà bɔ́n gò bhaamɛ̀ɛ̀bò bhà-wùn-le gi koo.