Luc 3
1
-2 Aatana ké wʋʋ kpɔ' Zakali gbe Záàn bhà kwɛnggei dɔ̀ya, ke Záàn ké bhìng bhà. E kɛɛ' kwɛi gwilinɛbòà gwilinɛ' wó nuu à leeà Sezaa Tibɛɛ láà à yàà sɛ́ɛ́ wunlé-kwèè buu-ni wɛ́ɛ́-solunàà tà. Pɔnsi Pilati ké nuu kúmana kpáèa Zudee lùu wunlé, le Elɔdi' nuu Galilee sɛ́ɛ́nɛá, le à dóo Filipu' nuu Itulee sɛ́ɛ́ ni Talakoni sɛ́ɛ́nɛá, le Lizania' nuu Abileni sɛ́ɛ́nɛá le. Ani ni Kaifu' nuu Zuifu-bòà yíkpáá-mɛ̀ɛ̀ kpákpaabòa tée poo à gi le.
3
Záàn' bo' Aatana wʋʋ láà à maá kwɛi, le é wala', le é lo' gieá Zudɛɛn-gùàn pé lùu tó gi, ke e lòlòkpɔ́ii bhaamɛ̀ɛ̀bò nɛ̀ ye: Kà ka kɔɔ gó ka sɔng lé, ke ká nu, ke án ka zúlú, ke Aatana- nù ka bhàwùn tó.
4
Aatana wʋʋ léban-mɛ̀ɛ̀ Ezai' wʋʋ' bɛɛnzɛ' ebhà sɛ́ikwɛ́ gi lii, àle gi-wùn' nu' kɛɛi kwɛi lɛ́ɛ. E wɩɩ' ye: Mɛ̂ɛ' é lòlòkpɔ́ii bhìng bhà láà, e wɩɩ ye: kà Gwilinɛ Kpáa giè à tà-zàà baa, ke ká à lé-lèè tó mɔɔ kiá dɛlɛngle,
5
ke ká guluwɛ́ɛ́bò tó léta, ke ká tɔɔn ni tíníkpulunɛ́bò tó páipái wí. È gò' bhi, ke ká zaa kɔlɔngyèbò tó dɔ zué tɩnggbɩɩle, ke ká à lé-lèè yemò' è tóà yanggɩɩle à tó mɔɔ kiá.
6
È tò' kwɛi, Aatana- ebhà mɛ̂ɛ la-mɛ̀ɛ̀' à bɔà láà, mɛnómɛ̀nó ké yáánpáà à bhà. Aatana' wʋʋ' kpɔ' Ezai bhà fɔ́ɔ́lé lii Záàn-wùn gi, àle lɛ́ɛ.
7
À kɛ̀ɛ̀ kwɛiyè láà à gi, bhaamɛ̀ɛ̀ ké nuu gbuluà, le wó nuu nuà Záàn pé yèèèle, ke è nù àng zúlú le. Kɛ́ le é nuu à peà àng nɛ̀ ye: Bhei-bhààmɛ̀ɛ̀bò, Aatana yéè ka bhàgila kpáa' wo leekpɔ̀ɔ̀tili gi láà, wáa dàà à gɔ̀n kai-gwìlìkààn daa' ka bhà tò le?
8
È tò' ke ká ka kɔɔ góyèa ka sɔng lé maiá laá, kà à gi-wùn kɛɛ' wo tò le. Kɛ́ kao tóà à pe-le lengdo woà ziàn ka zowɛ́ɛ́ pé bhiá ka: Ablam ginɛ́bò' kale kaá le. Atoosiwo án wɩɩ ka nɛ̀ ma: Aatana ké mɔɔà à bhà, le è gwɛɛbò é à kemò gigala, le wò to Ablam ginɛ́á le.
9
Sée dua-le ké yaayè tóá yílí bɔ lɔ̀ɔ̀ nɛ̀ à sɩ́ɩ-nàà tà. A-wùn gi, yílí ye óó ye' àle àa wɛ́ɛ́ sɛ̀-le bha láà, à gàn- tó ka yàan ka: wóò àle bɔ' wo, ke wò pai daa à kián gi le.
10
Záàn' nuu à pe' woà kwɛi láà, mɛ̂ɛ' wó nuu bhi, wó nùù à bhàgilawoà àle gi wo: È tò' kwɛi, kó à-kɔ̀ɔ̀ kêe lɔ àlei?
11
Wó à pe' kwɛi, le Záàn' à yoobɔ' àng gɔ̀n ye: Bhái piilɛ' mɛ̂ɛ' i gɔ̀n laá, í à gúlú, ke pɔngge àa mɛ̂ɛ' à gɔ̀n láà, í à dini nu à nɛ̀, ke lígó' mɛ̂ɛ' i gɔ̀n, i leng í zí à gúlú à-kɔ̀ɔ̀ do láà à gi kwɛi.
12
É go' bhi, le wɛ́i kún-mɛ̀ɛ̀bò' zí nu' wo zúlú-wùn gi Záàn pé, le wó à bhàgilawo' wo: Wunmɛ̀ɛ̀, le kole wɛ, kó à-kɔ̀ɔ̀ kêe lɔ?
13
Le Záàn' yoobɔ' àng gɔ̀n ye: Wò wɛ́i kún-nàà' peà ka nɛ̀ láà, ká à kún à tà, kao gieà àle tà le.
14
É go' àle gi, le sɔ́yabò leng' zí nu' à bhàgilawoi wo: Le kole wɛ, kó à-kɔ̀ɔ̀ kêe lɔ? Le Záàn' à yoobɔ' àng gɔ̀n ye: Kao mɛnggeà pɔɔn síà sɔ̀ngtàa, sée kao zí à síà námana bhà. A-lèè ké à bhà ke ka saa' wò à go láà, ká ka bhàwùn gó àleá le.
15
À tée láà à gi, lùu tó yáán ké nuu Izalae-bò la-mɛ̀ɛ̀ Klisi' wó nuu à peà láà à nuyè gɔ̀n. A-wùn gi, mɛnómɛ̀nó ké nuu màiwoà Záàn bhà, ke wo à peii wo zowɛ́ɛ́ pé wo: Izalae-bò la-mɛ̀ɛ̀' à nu-wùn' bhe láà, àle àa é wo è?
16
Kɛ́ le Záàn' wɩɩ' àng nɛ̀ ye: Nle laá, nle an ka zúlúii yí' gá le. Kɛ́ mɛ̂ɛ ye' é nuii láà, àle ké kpókpóá e gie nle n tà. Atoosiwo nle an mɛɛá, ke máá ni bhɔyèa àbhà sàbha bhɛɛ lépòlò à gɛɛn bhà-nùà lefienɛ́ gi le? Ale nuà, le è ka zulu Waa Zaazaa ni paiá le.
17
Abhà láwa ké à kɔlé. È bò' ebhà mini maaá gwɛɛ́sáa lé, ke è à pie láwa láà à gi, e à wɛ́ɛ́ wóóà, le è à ban ebhà sàwa gi le. Kɛ́ à sèlè ni à fɩɩ' è tóà láà, è àle dɔ' woà pai' àa líí gbonggbongle à lé le.
18
Záàn ké nuu zí liè bhɛ́ibò dɔà àng tà bɛ́ɛ́á. Wúnsɛ̀' è go Aatana pé láà, é nuu à-nàà kpɔ́à bhaamɛ̀ɛ̀bò nɛ̀ kɔɔ' gi, àle lɛ́ɛ.
19
Sée e nuu kwɛi, ke gwilinɛ Elɔdi' e dóoà nɔ́ng' wó nuu à leeà Elodia láà à sí à gɔ̀n. Ale kɛɛ le Záàn' nuu mai-wùn yɛ́ɛ́à à yán bhà é wúnyóo' kɛɛ' láà à-wùn gi le. E nuu zí mai-wùn peà à nɛ̀ é nuu wúnyóyoo bhɛ́i yemò' kɛɛà à ye láà à pé à tó-wùn gi.
20
Kɛ́ àle tó gi, Elɔdi' wúnyóo páipái' kɛɛ' láà, e zí àle ke daa' wo' à tà Záàn dàà kààso gi-yèa le. Yesu zúlúyè (Matie 3:13-17; Maki 1:9-11)
21
Kɛ́ é nuu fɔ́ɔ́lé ke Elɔdi òo Záàn kún bhe, mɛnómɛ̀nó ké nuu lóà à pé, ke è nù àng zúlú. Yesu leng' zí lò- à pé à-kɔ̀ɔ̀ do láà àle gi, le Záàn' à zulu' le. Yesu' nuu bhàiwoà tée' gi, le lɔngwɛ́ɛ́' lépolo',
22
le Waa Zaazaa' go' bhi, ke ya gigálá ke ya tó ye tìnìng nɛ̀, le é yɔɔ' Yesu tà le. Ale' kɛɛii kwɛi láà, ke wʋʋ ke ké góii Aatana pé lɔngwɛ́ɛ́ gi ye: Nbhà nɛ́ wùndɔ̀yóoá' i gá le. I lɔ̀ɔ̀' è n kɛɛ láà, à nààlé àa bhe. Yesu kpogó-lèè (Matie 1:1-17)
23
Yesu' wolo' mɔ̀nglé tée' gi láà, ke àbhà kwee' tó kuà-yaka yɔ̀ɔ̀nsínmáá. E nuu bhaamɛ̀ɛ̀bò gi wo: à nɛ leng' nuu Zozɛfu-a le. Zozɛfu láà à nɛ' nuu Eli-a, le Eli nɛ' nuu Mata-a,
24
le Mata nɛ' nuu Levi-a, le Levi nɛ' nuu Mɛlɛki-a, le Mɛlɛki nɛ' nuu Zanglai-a, le Zanglai nɛ' nuu Zozɛfu-a,
25
le Zozɛfu nɛ' nuu Matatia-a, le Matatia nɛ' nuu Amosi-a, le Amosi nɛ' nuu Naum-a, le Naum nɛ' nuu Esili-a, le Esili nɛ' nuu Nagai-a,
26
le Nagai nɛ' nuu Maatu-a, le Maatu nɛ' nuu Matatia-a, le Matatia nɛ' nuu Semɛin-a, le Semɛin nɛ' nuu Zozɛku-a, le Zozɛku nɛ' nuu Zoda-a,
27
le Zoda nɛ' nuu Zoana-a, le Zoana nɛ' nuu Leza-a, le Leza nɛ' nuu Zolobabɛli-a, le Zolobabɛli nɛ' nuu Salatiɛli-a, le Salatiɛli nɛ' nuu Neli-a,
28
le Neli nɛ' nuu Mɛlɛki-a, le Mɛlɛki nɛ' nuu Adi-a, le Adi nɛ' nuu Kosam-a, le Kosam nɛ' nuu Elimadam-a, le Elimadam nɛ' nuu Ɛli-a,
29
le Ɛli nɛ' nuu Yesu-á, le Yesu nɛ' nuu Eliezɛli-a, le Eliezɛli nɛ' nuu Zolim-a, le Zolim nɛ' nuu Mata-a, le Mata nɛ' nuu Levi-a,
30
le Levi nɛ' nuu Simeon-a, le Simeon nɛ' nuu Zuda-a, le Zuda nɛ' nuu Zozɛfu-a, le Zozɛfu nɛ' nuu Zonam-a,
31
le Zonam nɛ' nuu Eliakim-a, le Eliakim nɛ' nuu Melea-a, le Melea nɛ' nuu Mena-a, le Mena nɛ' nuu Matata-a, le Matata nɛ' nuu Natan-a, le Natan nɛ' nuu Davi-a, le Davi nɛ' nuu Izai-a,
32
le Izai nɛ' nuu Zobedi-a, le Zobedi nɛ' nuu Boazi-a, le Boazi nɛ' nuu Sala-a, le Sala nɛ' nuu Naazon-a, le Naazon nɛ' nuu Aminadabu-a, le Aminadabu nɛ' nuu Adamɛ-a,
33
le Adamɛ nɛ' nuu Aani-a, le Aani nɛ' nuu Ezolom-a, le Ezolom nɛ' nuu Falɛzi-a, le Falɛzi nɛ' nuu Zuda-a,
34
le Zuda nɛ' nuu Zakɔbu-a, le Zakɔbu nɛ' nuu Izaaki-a, le Izaaki nɛ' nuu Ablam-a, le Ablam nɛ' nuu Tala-a, le Tala nɛ' nuu Nakɔɔ-a, le Nakɔɔ nɛ' nuu Seluki-a,
35
le Seluki nɛ' nuu Alago-a, le Alago nɛ' nuu Falɛki-a, le Falɛki nɛ' nuu Ebɛɛ-a, le Ebɛɛ nɛ' nuu Sala-a,
36
le Sala nɛ' nuu Kainam-a, le Kainam nɛ' nuu Alafasa-a, le Alafasa nɛ' nuu Sɛm-a, le Sɛm nɛ' nuu Noe-a, le Noe nɛ' nuu Lamɛki-a,
37
le Lamɛki nɛ' nuu Matuzala-a, le Matuzala nɛ' nuu Enɛki-a, le Enɛki nɛ' nuu Zalɛdi-a, le Zalɛdi nɛ' nuu Maleɛli-a, le Maleɛli nɛ' nuu Kaina-a,
38
le Kaina nɛ' nuu Enɔsi-a, le Enɔsi nɛ' nuu Sɛti-a, le Sɛti nɛ' nuu Adam-a, le Adam nɛ' nuu Aatana-á le.